તા.૨૪/૧૨/૨૦૨૪
વાત્સલ્યમ્ સમાચાર
વિવિધ જિલ્લાના ૩૫૨ સ્પર્ધકોએ કૌવત બતાવ્યુ રાજ્ય સરકાર દ્રારા ૨.૩૪ લાખના ઈનામ વિતરણ કરાયા
રાજ્ય સરકાર રમત-ગમત અને રમતવીરોને હંમેશા પ્રોત્સાહન આપે છે ધારાસભ્યશ્રી ડો. મહેન્દ્રભાઈ પાડલીયા
ભાઈઓ અને બહેનો બંને સ્પર્ધામાં રેકોર્ડ તૂટ્યા ભાઈઓમાં પ્રથમ નંબરે બારૈયા પિયુષ ૯.૧૩ મિનિટમાં તેમજ હેનોમાં બાવળીયા ત્રિશા ૧૨.૭ મિનિટમાં સ્પર્ધા પૂર્ણ કરી વિજેતા બન્યા
Rajkot, Dhoraji: ઓસમ ડુંગરની ગોદમાં ડિસેમ્બરની કડકડતી ઠંડીમાં વહેલી સવારે ઉમંગ અને ઉત્સાહ સાથે પાંચમી ઓસમ આરોહણ – અવરોહણ સ્પર્ધાનો ધારાસભ્યશ્રી ડો. મહેન્દ્રભાઈ પાડલીયાએ લીલી ઝંડી દ્રારા શુભારંભ કરાવ્યો હતો. આ સ્પર્ધામાં વિવિધ સાત જિલ્લાના ૩૫૨ સ્પર્ધકોએ ભાગ લીધો હતો. ૨૦ વિજેતાઓને રૂ.૨.૩૪ લાખના ઈનામથી મહાનુભાવોએ સન્માનિત કર્યા હતા.
યુવા અને સાંસ્કૃતિક પ્રવુતિઓ વિભાગ – ગાંધીનગર અને રાજકોટ જિલ્લા વહીવટી તંત્રના ઉપક્રમે પાંચમી ઓસમ આરોહણ – અવરોહણ સ્પર્ધા”નું આયોજન કરાયુ હતું,
આ સ્પર્ધામાં ભાઈઓમાં ૯.૧૩ મિનિટ સાથે બારૈયા પિયુષ પ્રથમ ક્રમાંકે તેમજ બહેનોમાં ૧૨.૭ મિનિટ સાથે પ્રથમ ક્રમાંકે બાવળીયા ત્રિશા વિજેતા થયા હતા.
પાટણવાવ ખાતે ઓસમ ડુંગર ઉપર આવેલાં માત્રી માતાના મંદિરથી ટપકેશ્વર મહાદેવ થઈ તળેટીએ સ્પર્ધકો પરત પહોંચ્યા હતા.
આ તકે ધારાસભ્યશ્રી ડો. મહેન્દ્રભાઈ પાડલીયાએ ભાગ લેનાર સ્પર્ધકોને અભિનંદન અને વિજેતાને ઈનામ વિતરણ કરી જણાવ્યું કે, “કોઈપણ સ્પર્ધામાં ભાગ લેવો એ સ્પર્ધા જીતવા બરાબર જ હોય છે, ગુજરાતના પનોતા પુત્ર એવા વડાપ્રધાનશ્રી નરેન્દ્રભાઈ મોદીએ રમતગમતને હંમેશા પ્રાધાન્ય આપ્યું છે. ખેલમહાકુંભ જેવા મહોત્સવોથી યુવાનોને એક રમત ક્ષેત્રે પ્લેટફોર્મ મળ્યુ છે. મુખ્યમંત્રીશ્રી ભૂપેન્દ્ર પટેલના માર્ગદર્શનમાં રાજ્ય સરકાર રમતગમતને પ્રોત્સાહન આપી રમતવીરોનુ સન્માન કરે છે.
ત્યારે આજે ઓસમ ડુંગરમા યોજાયેલ પાંચમી આરોહણ અવરોહણ સ્પર્ધામા વિજેતા સ્પર્ધકોને રાજ્ય સરકાર પ્રોત્સાહિત કરે છે અને વિજેતા સ્પર્ધકો આગામી તા.૫ જાન્યુઆરીના રોજ ગીરનાર ખાતે યોજાનાર સ્પર્ધામા ભાગ લઈ શકશે તેમ ધારાસભ્યશ્રીએ ઉમેર્યુ હતુ.
પ્રાત અધિકારીશ્રી નાગાજણ તરખાલાએ પોતાના ઉદ્બોધનમા રાજ્યમાં વિવિધ સ્થળોએ યોજાતી આરોહણ-અવરોહણ સ્પર્ધાનો ઉલ્લેખ કરી જિલ્લા વહિવટી તંત્ર વતી મહેમાનો અને સ્પર્ધકોને આવકાર્યા હતા.
જિલ્લા યુવા વિકાસ અધિકારીશ્રી હિતેષ દિહોરાએ શાબ્દિક સ્વાગતમાં ઓસમ આરોહણ-અવરોહણ સ્પર્ધામાં મહેમાનો, ગ્રામજનો અને સ્પર્ધકોને આવકારી સ્પર્ધાની વિસ્તૃત જાણકારી આપી હતી.
જેમાં રાજ્યના રાજકોટ, જુનાગઢ, ગીર-સોમનાથ, મોરબી, સુરેન્દ્રનગર, ભાવનગર, બોટાદ, જામનગર એમ કુલ ૮ જિલ્લામાંથી ૧૪ થી ૧૮ વર્ષના ૧૯૭ ભાઈઓ તથા ૧૫૫ બહેનો સહિત ૩૫૨ ખેલાડીઓએ ભાગ લીધો હતો.
ખેલાડીઓને ચેસ્ટ નંબર આપી રેડિયો ફ્રિકવન્સી આઇડેન્ટીફિકેશન ચીપ સીસ્ટમ સાથે સ્પર્ધાનું પરિણામ તૈયાર કરવામાં આવ્યું હતું. તેમજ સ્પોર્ટ્સ ઓથોરીટી ઓફ ગુજરાત કોચિંગ મેન્યુઅલ ટાઈમિંગની પણ મદદ લેવામાં આવી હતી. સ્પર્ધાનુ આયોજન તથા સ્પર્ધકોનો ઉત્સાહ વધારવા માટે શિક્ષકો, વ્યાયામ શિક્ષકો, કોચ, સ્વયંસેવકો, વિદ્યાર્થીઓ, ગ્રામજનો જોડાયા હતા.
રાજ્ય સરકાર દ્વારા સ્પર્ધામાં પ્રથમ નંબરે વિજેતા ને રૂ. ૨૫ હજાર, દ્વિતિય નંબરને રૂ.૨૦ હજાર, તૃતિય નંબરને રૂ. ૧૫ હજાર એમ કુલ મળી ૧ થી ૧૦ નંબર સુધી વિજેતા થયેલ ખેલાડીઓને કુલ રૂ.૨.૩૪ લાખના ઈનામો, પ્રમાણપત્ર અને ટ્રોફી એનાયત કરી સ્પર્ધકોને પ્રોત્સાહિત કરવામાં આવ્યા હતા. સ્પર્ધાનું સંચાલનશ્રી હારૂનભાઈ વિહળે કર્યુ હતું.
કાર્યક્રમમા તાલુકા પંચાયતના પ્રમુખ શ્રી રવિભાઈ વડાલીયા, જિલ્લા પંચાયતના સદસ્ય વિરલભાઈ પનારા, સરપંચ શ્રી પ્રવીણભાઈ, અગ્રણીશ્રી મયુરભાઈ, મામલતદાર, તાલુકા વિકાસ અધિકારી, ચીફ ઓફિસર, પોલીસ અને ફોરેસ્ટ વિભાગ, પીજીવીસીએલ, આરોગ્ય સહિત સંબંધિત વિભાગના અધિકારીશ્રીઓ, કર્મચારીશ્રીઓ, વિદ્યાર્થીઓ તથા ગ્રામજનો બહોળી સંખ્યામાં ઉપસ્થિત રહ્યા હતા.
આ સ્પર્ધામા વિજેતા સ્પર્ધકોને પાટણવાવ ગામના અગ્રણી રાજુભાઈ પેથાણી તરફથી ૫૧ હજાર રૂપિયાની રકમ દ્રારા સન્માનિત કરાયા હતા.
