તા.૨૫/૨/૨૦૨૫
વાત્સલ્યમ્ સમાચાર
પશુ આરોગ્ય, નફાકારક પશુપાલન, પશુ સંવર્ધન પર નિષ્ણાતો આપશે માર્ગદર્શન
Rajkot: જિલ્લા પંચાયત રાજકોટની પશુપાલન શાખા દ્વારા તા.૨૭ ફેબ્રુઆરીના રોજ જામકંડોરણાના વિમલનગરના પટેલ સમાજ ખાતે જિલ્લા કક્ષાની પશુપાલન શિબિર સહ પ્રદર્શન યોજાશે.
પશુ દવાખાના જામકંડોરણા તથા પશુપાલન શાખા જિલ્લા પંચાયત દ્વારા આ શિબિરનું આયોજન કરાયું છે. આ શિબિરમાં જામકંડોરણા તાલુકાના પશુપાલકો પશુ આહાર, પશુ માવજત, પશુ સંવર્ધન અને પશુ આરોગ્યલક્ષી માહિતી નિષ્ણાતો પાસેથી મેળવી શકશે.
તા.૨૭ ને સવારે ૮:૦૦ કલાકે પશુપાલકોના રજીસ્ટ્રેશન બાદ સવારે ૯:૦૦ કલાકે ઉદઘાટન કાર્યક્રમ યોજાશે, ત્યારબાદ પશુ આરોગ્ય તથા પોષણ, પશુ સંવર્ધન અને માવજત, પશુપાલનનું પ્રાકૃતિક સજીવ ખેતીમાં મહત્વ, નફાકારક પશુપાલન, પ્રગતિશીલ પશુપાલકોના અનુભવો તથા પ્રશ્નોત્તરી સહિતના વિષય પર નિષ્ણાતો વક્તવ્ય આપશે.
જામકંડોરણા તાલુકાના પશુપાલકો આ શિબિરમાં જોડાઈ પશુપાલન વિશે વિસ્તૃત જાણકારી મેળવી શકશે તેમ પશુ ચિકિત્સા અધિકારી, જામકંડોરણા દ્વારા અખબારી યાદીમાં જણાવાયું છે.
