વાત્સલ્યમ્ સમાચાર,
પૂજા ઠક્કર – મુંદરા કચ્છ.
જીવમાત્ર પ્રત્યે મૈત્રી, કરુણા અને સંરક્ષણનો ભાવ જ સાચી સંક્રાંતિ છે-જૈનમુની નયશેખર મહારાજ સાહેબ
શંખેશ્વર જૈન મહાતીર્થથી માનવતાના મસીહા પ.પૂ.આ.શ્રીમદ્દ વિજય રત્નશેખરસૂરીશ્વરજી મહારાજાના શિષ્યરત્ન પૂજય મુનિરાજ શ્રી નયશેખર મહારાજ સાહેબ એ જણાવેલ કે જૈન ધર્મમાં પર્વોની મહત્તા બાહ્ય ઉજવણી કરતાં આંતરિક પરિવર્તન સાથે જોડાયેલી છે. તેથી મકર સંક્રાંતિ પર જીવદયાનો ભાવ અપનાવવો એ જૈન દર્શન મુજબ શ્રેષ્ઠ સાધના ગણાય છે. જૈન ધર્મનું મૂળ સિદ્ધાંત અહિંસા પરમો ધર્મઃ છે. દરેક જીવ સ્થાવર હોય કે જંગમ સુખ ઇચ્છે છે અને દુઃખથી દૂર રહેવા માંગે છે. મકર સંક્રાંતિના દિવસે ઠંડીની તીવ્રતા વધી જાય છે ત્યારે પક્ષીઓ, પશુઓ અને નાના જીવો વધુ કષ્ટ અનુભવે છે. આવા સમયે તેમને અન્ન, પાણી, આશ્રય અને સુરક્ષા આપવી એ જીવદયાનું ઉત્તમ સ્વરૂપ છે. જૈન શાસ્ત્રોમાં જીવદયાને ધર્મનું પ્રાણ તત્વ માનવામાં આવ્યું છે. જીવદયાથી કરાયેલ દરેક કાર્યથી કર્મોની નિર્જરા થાય છે અને આત્મા શુદ્ધ બને છે. મકર સંક્રાંતિ પર દાણા-પાણીની પરબ, પક્ષીઓ માટે ચણ, ગાય-પશુઓ માટે ચારો તથા ઠંડીથી બચાવ માટે વ્યવસ્થા કરવી આ બધું જ જીવદયાના પાવન કાર્યો છે. આ કાર્યોમાં કોઈ દેખાડો નહીં પરંતુ કરુણા અને સમભાવ હોવો જરૂરી છે. જૈન દર્શન અનુસાર જીવદયા માત્ર એક દિવસ પૂરતી સીમિત ન રહેવી જોઈએ પરંતુ આ પર્વ આપણને વર્ષભર અહિંસા અને સંયમનો સંકલ્પ કરાવે છે. જેમ સૂર્ય ઉત્તરાયણમાં પ્રવેશ કરીને અંધકારથી પ્રકાશ તરફ જાય છે તેમ માનવ જીવન પણ હિંસાથી અહિંસા તરફ, નિર્દયતાથી કરુણા તરફ વળવું જોઈએ. અંતે કહી શકાય કે મકર સંક્રાંતિ પર જીવદયાનો મહિમા એ જૈન ધર્મની આત્મા છે. જીવમાત્ર પ્રત્યે મૈત્રી, કરુણા અને સંરક્ષણનો ભાવ જ સાચી સંક્રાંતિ છે જે આત્મકલ્યાણ અને સર્વ જીવોના હિત તરફ દોરી જાય છે. જૈન શાસ્ત્રોમાં સર્વ જીવોને સમાન ચેતનાવાળા માનવામાં આવ્યા છે. એક ઇન્દ્રિયથી માંડી પાંચ ઇન્દ્રિય સુધીના બધા જીવો સુખ ઇચ્છે છે અને દુઃખથી બચવા માંગે છે. જે વ્યક્તિ આ સત્યને સમજે છે તે સ્વભાવિક રીતે કરુણાશીલ બને છે. જીવદયાનો ભાવ જાગૃત થતાં ક્રોધ, લોભ, માન અને માયા જેવી કષાયો ધીમે ધીમે શાંત થાય છે અને આત્મા શુદ્ધ બનવા લાગે છે. જીવદયાના અનેક સ્વરૂપો છે—ભૂખ્યા ને અન્ન આપવું, તરસેલા ને પાણી આપવું, બીમાર જીવની સારવાર કરવી, ઠંડી-ગરમીથી પીડાતા પ્રાણીઓને રક્ષણ આપવું તેમજ કોઈપણ જીવને અનાવશ્યક કષ્ટ ન પહોંચાડવું. જૈન ધર્મમાં દાણા-પાણીની પરબ, પશુ-પક્ષી સેવા, તેમજ અહિંસાત્મક જીવનશૈલીને વિશેષ મહત્ત્વ આપવામાં આવ્યું છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
