2013ની FIRથી લઈને વર્તમાન વિવાદ સુધી: ધારાસભ્ય ગોપાલ ઈટાલિયાનો હર્ષ સંઘવી પર તિખો પ્રહાર
ગુજરાતમાં પોલીસના પટ્ટા ઉતારવાના મુદ્દે રાજકીય ચર્ચા ગરમાઈ રહી છે. વિવિધ પક્ષોના નેતાઓ આ મુદ્દે એકબીજાને ઘેરતા નિવેદનો આપી રહ્યા છે. આજે આમ આદમી પાર્ટીના વિસાવદરના ધારાસભ્ય ગોપાલ ઈટાલિયાએ હર્ષ સંઘવીના તાજેતરના નિવેદનોની સામે મોરચો ખોલ્યો અને 2013માં હર્ષ સંઘવી સામે નોંધાયેલી FIRને જાહેર મંચ પર ફરીથી ઉઠાવી.
ગોપાલ ઈટાલિયાએ 14 સપ્ટેમ્બર 2013ના છપાયેલા એક સમાચારનો ઉલ્લેખ કરતાં જણાવ્યું કે 2014ની લોકસભા ચૂંટણીની રજામાં નરેન્દ્ર મોદીને ભાજપે પ્રધાનમંત્રી પદ માટે પ્રોજેક્ટ કર્યા બાદ હર્ષ સંઘવી અને અન્ય કેટલાક ભાજપના નેતાઓએ કોઈ પરવાનગી વિના ભીડ એકત્રીત કરી ફટાકડા ફોડ્યા હતા, જેના કારણે ટ્રાફિક જામ સર્જાયો. ઘટનાની જાણ થતાં પોલીસ ઇન્સ્પેક્ટર સ્થળે પહોંચ્યા, પણ સમજાવવાને બદલે હર્ષ સંઘવીએ પોલીસને ચાર-પાંચ લાફા માર્યા, ગાળો આપી અને ધક્કા મૂકી કર્યા હતા. તેમની સાથે રહેલા અન્ય લોકો દ્વારા પણ PSI સાથે મારામારી કરવામાં આવી હોવાનું પણ FIRમાં દર્શાવાયું છે.
તે સમયે ઉમરા પોલીસ સ્ટેશનમાં દાખલ થયેલી FIRમાં 143, 147, 186, 188, 192, 201, 203, 294, 342, 353, 504 અને 506(2) સહિતની અનેક ગંભીર કલમો લગાવવામાં આવી હતી. ગોપાલ ઈટાલિયાના કહેવા મુજબ બાદમાં હર્ષ સંઘવીના રાજકીય પ્રભાવને કારણે તપાસ અધિકારીની બદલી કરવામાં આવી અને નવી તપાસ દરમિયાન મોટાભાગની કલમો FIRમાંથી દૂર કરાઈ, માત્ર 143 અને 188 જેવી જાહેરનામા ભંગની કલમો જ રાખી. આખો મામલો ઠંડો પાડવાનો પ્રયાસ રાજકીય દબાણ હેઠળ થયો હોવાનો આરોપ પણ તેમણે મુક્યો.
ગોપાલ ઈટાલિયાએ વર્ષ 2019ની બીજી ઘટનાનો ઉલ્લેખ કરતાં જણાવ્યું કે સુરતમાં ધારાસભ્ય તરીકે હર્ષ સંઘવીએ નવી સિવિલ હોસ્પિટલમાં ફરતા સમયે એક સરકારી કર્મચારી સાથે અપમાનજનક ભાષા વાપરી હતી. મીડિયા દ્વારા પૂછતાં સંઘવીએ પોતાના નિવેદન પર અફસોસ ન હોવાનો જવાબ આપ્યો હતો. ઈટાલિયાએ સવાલ ઉઠાવ્યો કે “સંસ્કાર”ની વાત કરનારા લોકો પોતાનું વર્તન યાદ કરે.
તદુપરાંત ઈટાલિયાએ અનેક પોલીસ અધિકારીઓ અને કર્મચારીઓ સંબંધિત મુદ્દાઓ ઉઠાવ્યા. તેમણે આરોપ લગાવ્યો કે રાજ્યમાં નાના કોન્સ્ટેબલો પર અન્યાય થાય છે, જ્યારે ઉચ્ચ અધિકારીઓ અને રાજકીય નેતાઓ વચ્ચેનો સબંધ પોલીસ તંત્રમાં ભેદભાવ અને દબાણ જેવી પરિસ્થિતિ ઊભી કરે છે. તેમણે અમરેલીથી લઈને વડોદરા અને સુરત સુધીના ઉદાહરણો આપી જણાવ્યું કે રાજકીય દબાણ હેઠળ પોલીસ અધિકારીઓની બદલી થતી રહી છે.
તેઓએ જનતાને સંબોધતા કહ્યું કે હાલના વિવાદમાં ચાર પક્ષકારો છે—વિપક્ષ, ભાજપ, સામાન્ય પોલીસ કર્મચારીઓ અને ઉચ્ચ પોલીસ અધિકારીઓની લોબી. તેમના કહેવાથી ગેરકાયદેસર પ્રવૃત્તિઓમાંથી થતા નફામાંથી સામાન્ય પોલીસ કર્મચારીને કશું મળતું નથી, પરંતુ તેમને મુશ્કેલીઓ અને દબાણનો સામનો કરવો પડે છે.
છેલ્લે ગોપાલ ઈટાલિયાએ દાવો કર્યો કે છેલ્લા દસ વર્ષમાં પોલીસ વિભાગની છબી નુકસાન પામી છે અને ઘણા પોલીસ કર્મચારીઓ સાધન-સુવિધાના અભાવે તેમજ દબાણને કારણે મુશ્કેલીઓનો સામનો કરી રહ્યા છે. તેમના જણાવ્યા મુજબ પોલીસને આપવામાં આવતી કિટની ગુણવત્તા પણ અત્યંત ખરાબ સ્થિતિમાં છે.
ઈટાલિયાએ ગુજરાતની જનતાને અપીલ કરી કે “પોલીસ અને જનતા વચ્ચે અસમંજસ ઊભું કરનારી નીતિઓમાં સુધારો આવશ્યક છે. આઠ પાસની નીતિને દૂર કરો—ગુજરાત બચાવો.”
આ મુદ્દે હર્ષ સંઘવી અથવા રાજ્ય સરકાર તરફથી હજી કોઈ નવી પ્રતિક્રિયા જાહેર કરવામાં આવી નથી.
