રાજ્યના કેટલાક વિસ્તારોમાં હળવો થી મધ્યમ વરસાદ પડી શકે છે. : હવામાન વિભાગ
રાજ્યમાં છેલ્લા કેટલાક દિવસોથી ગરમીનો પ્રભાવ ઝડપથી વધતો જોવા મળી રહ્યો છે. ઘણા શહેરોમાં તાપમાન વધી રહ્યું છે અને લોકો ગરમીથી પરેશાન થઈ રહ્યા છે. પરંતુ આ વચ્ચે હવે હવામાનમાં થોડો ફેરફાર થવાની શક્યતા વ્યક્ત કરવામાં આવી છે. હવામાન વિભાગના અનુમાન મુજબ આગામી બે દિવસ દરમિયાન રાજ્યના કેટલાક વિસ્તારોમાં હળવો થી મધ્યમ વરસાદ પડી શકે છે. આ બદલાવને કારણે ગરમીમાંથી થોડી રાહત મળી શકે છે.
હવામાન વિભાગ અનુસાર 19 માર્ચે ઉત્તર ગુજરાતના કેટલાક જિલ્લામાં હળવો વરસાદ પડી શકે છે. ખાસ કરીને બનાસકાંઠા, પાટણ અને કચ્છ વિસ્તારમાં વાદળછાયું વાતાવરણ સાથે ઝરમર વરસાદ જોવા મળી શકે છે.
આગામી 20 માર્ચે દક્ષિણ ગુજરાતના કેટલાક જિલ્લામાં પણ માવઠાની સંભાવના વ્યક્ત કરવામાં આવી છે. તેમાં નર્મદા, ભરૂચ, સુરત અને તાપીનો સમાવેશ થાય છે. આ વિસ્તારોમાં હળવો વરસાદ કે ઝાપટાં પડવાની શક્યતા છે.
હવામાન વિભાગ મુજબ મધ્ય ગુજરાતના કેટલાક વિસ્તારોમાં પણ હવામાનમાં બદલાવ જોવા મળી શકે છે. વડોદરા, છોટા ઉદેપુર અને સુરેન્દ્રનગર જિલ્લામાં પણ હળવા વરસાદની શક્યતા વ્યક્ત કરવામાં આવી છે. હાલ રાજ્યમાં ગરમી ધીમે ધીમે વધી રહી છે. પરંતુ આવનારા દિવસોમાં વાદળછાયું વાતાવરણ અને વરસાદને કારણે તાપમાનમાં થોડો ઘટાડો થઈ શકે છે.
