ગોધરાની મેટરનિટી હોસ્પિટલમાં માનવ તસ્કરીનો પર્દાફાશ, 8 ઈસમો સામે ગુનો નોંધાયો
પંચમહાલ ગોધરા
નિલેશભાઈ દરજી શહેરા 
ગોધરા, : પંચમહાલ જિલ્લાના મુખ્ય મથક ગોધરામાં આવેલી દીપ મેટરનિટી અને ચિલ્ડ્રન હોમમાં માનવ તસ્કરીનો એક સનસનીખેજ કિસ્સો સામે આવ્યો છે. પોલીસે આ ઘટનામાં સંડોવાયેલા હોસ્પિટલના સંચાલકો સહિત કુલ 8 આરોપીઓ સામે ગુનો નોંધીને વધુ તપાસ હાથ ધરી છે, જેના પગલે સમગ્ર જિલ્લામાં ખળભળાટ મચી ગયો છે.
આ કૌભાંડનો પર્દાફાશ ત્યારે થયો જ્યારે એક અજાણી મહિલાએ દીપ મેટરનિટી હોસ્પિટલમાં બાળકીને જન્મ આપ્યા બાદ તેને ત્યજી દીધી. આ તકનો લાભ ઉઠાવીને હોસ્પિટલના સંચાલકો અને સ્ટાફે એક સુનિયોજિત કાવતરું ઘડ્યું. તેમણે નવજાત બાળકીને ગેરકાયદેસર રીતે ગોધરા તાલુકાના એક ગામના ઈસમોને વેચી દીધી. આ પ્રક્રિયાને ‘દત્તક’ તરીકે રજૂ કરવાનો પ્રયાસ કરાયો હતો, પરંતુ તે સ્પષ્ટપણે બાળકીનું ખરીદ-વેચાણ હતું.
વડોદરાના તબીબની સતર્કતાથી ભાંડો ફૂટ્યો
ગેરકાયદેસર રીતે વેચાયેલી બાળકીની તબિયત બગડતાં તેને સારવાર માટે વડોદરાની ખાનગી હોસ્પિટલમાં લઈ જવામાં આવી. ત્યાંના એક તબીબને બાળકીની પૃષ્ઠભૂમિ શંકાસ્પદ લાગી, જેથી તેમણે તાત્કાલિક પોલીસને જાણ કરી. પોલીસે આ મામલે સત્વરે કાર્યવાહી કરતા સમગ્ર કૌભાંડનો પર્દાફાશ થયો.
આ ઘટનાની પ્રાથમિક ફરિયાદ વડોદરાના સાવલી પોલીસ સ્ટેશનમાં નોંધાઈ હતી. જોકે, ઘટનાસ્થળ ગોધરાનું હોવાથી કેસ ગોધરા શહેર એ ડિવિઝન પોલીસ મથકે ટ્રાન્સફર કરવામાં આવ્યો છે. પોલીસે આ ગુનામાં સંડોવાયેલા દીપ મેટરનિટી હોસ્પિટલના સ્ટાફ, બાળકીને ત્યજી દેનાર મહિલા અને તેને ગેરકાયદેસર રીતે ખરીદનાર સહિત કુલ 8 આરોપીઓ સામે ગુનો દાખલ કર્યો છે. હાલ તમામ આરોપીઓની પૂછપરછ ચાલી રહી છે અને આ કાંડમાં વધુ મોટા ખુલાસા થવાની શક્યતા છે.
