રિપોર્ટ : પુજા ઠક્કર, મુંદરા-કચ્છ.
પીટીસીના બીજા વર્ષના ૫૨૦૦ વિદ્યાર્થીઓને ટેટ-૧ પરીક્ષા આપવા સરકાર મંજૂરી આપશે?
રતાડીયા, તા.૫ : ગુજરાત રાજ્ય પરીક્ષા બોર્ડ દ્વારા આયોજિત શિક્ષક યોગ્યતા કસોટી ટેટ-૧ પરીક્ષા માટેના આવેદનપત્રો ભરવાની પ્રક્રિયા હાલમાં ચાલી રહી છે ત્યારે કચ્છ જિલ્લાના મુંદરા તાલુકાના રતાડીયા જલારામ સખી મંડળના પ્રમુખ તિતિક્ષાબેન પ્રકાશચંદ્ર ઠક્કર દ્વારા રાજ્યના હજારો પીટીસી (ડીએલએડ) વિદ્યાર્થીઓના પક્ષે રાજ્ય સરકાર સમક્ષ એક અત્યંત મહત્ત્વપૂર્ણ અને ભાવુક વિનંતી કરવામાં આવી છે. આ વિનંતીનો મુખ્ય સૂર પીટીસી (ડિપ્લોમા ઇન એલિમેન્ટરી એજ્યુકેશન) ના છેલ્લા (દ્વિતીય) વર્ષમાં અભ્યાસ કરતા આશરે ૫૨૦૦ વિદ્યાર્થીઓને આ વર્ષની ટેટ-૧ પરીક્ષામાં બેસવા માટે તાત્કાલિક ધોરણે મંજૂરી પ્રદાન કરવા અંગે છે.
વર્તમાનપત્રોના અહેવાલો મુજબ આ બાબતે રાજ્ય પરીક્ષા બોર્ડ દ્વારા પણ ગુજરાતની સંવેદનશીલ સરકાર પાસે સત્તાવાર મંજૂરી માંગવામાં આવી છે જે આ વિદ્યાર્થીઓની માંગણીને સમર્થન આપે છે. રાજ્યમાં ધોરણ ૧ થી ૫ ના પ્રાથમિક શિક્ષણ ક્ષેત્રે હાલમાં શિક્ષકોની નોંધપાત્ર ઘટ પ્રવર્તે છે. જો આ ૫૨૦૦ જેટલા પ્રતિભાશાળી વિદ્યાર્થીઓને પરીક્ષા આપવાની તક પૂરી પાડવામાં આવે તો તેઓ શિક્ષક બનવાની દિશામાં આગળ વધી શકશે અને ભવિષ્યમાં રાજ્યના પ્રાથમિક શિક્ષણના મૂળભૂત માળખાને સુદૃઢ કરવામાં મોટો સહયોગ આપી શકશે. તિતિક્ષાબેન ઠક્કરે આ તકે ભારપૂર્વક જણાવ્યું હતું કે, “શિક્ષણના આગ્રહી દેશના વડાપ્રધાન નરેન્દ્રભાઈ મોદીના માર્ગદર્શન હેઠળ ચાલતી ગુજરાતની લોકલાડીલી ડબલ એન્જિનની સરકાર લોકહિતના નિર્ણયો માટે જાણીતી છે. અમે અમારા દયાળુ મુખ્યમંત્રી ભૂપેન્દ્રભાઈ પટેલને આ હજારો વિદ્યાર્થીઓના ભવિષ્ય અને રાજ્યના શિક્ષણના ઉન્નતીકરણના હિતમાં તાત્કાલિક અને સકારાત્મક નિર્ણય લેવા વિનવીએ છીએ.” તેમણે ઉમેર્યું હતું કે આ તમામ વિદ્યાર્થીઓ પરીક્ષા માટેની તમામ શરતો અને ફી ભરવા માટે સંપૂર્ણપણે કટિબદ્ધ છે.
આશા છે કે ગુજરાત સરકાર અત્યંત ટૂંકા ગાળામાં (૨૪ કલાકમાં) આ વિષયે હકારાત્મક નિર્ણય લઈને હજારો વિદ્યાર્થીઓને તેમની કારકિર્દીની પ્રથમ સોપાન પ્રદાન કરશે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
