અમદાવાદ સિવિલ હોસ્પિટલનો ઐતિહાસિક માઇલસ્ટોન: ૨૨૨ અંગદાતાઓના દાનથી ૭૧૩ દર્દીઓને નવું જીવન
રિપોર્ટર
હિતેન્દ્ર ગોસાઈ
અમદાવાદ
અમદાવાદ સિવિલ હોસ્પિટલએ અંગદાન ક્ષેત્રમાં એક પ્રેરણાદાયક અને ઐતિહાસિક સિદ્ધિ હાંસલ કરી છે. હોસ્પિટલમાં તાજેતરમાં ગુપ્તદાન સ્વરૂપે થયેલા ૨૨૨મા અંગદાન બાદ અત્યાર સુધીમાં ૭૩૫ અંગો અને ૧૮૭ પેશીઓ મળી કુલ ૯૨૨ અંગો તથા પેશીઓનું દાન પ્રાપ્ત થયું છે. આ વિશાળ કાર્યના કારણે ૭૧૩ જરૂરિયાતમંદ દર્દીઓને નવા જીવનનો પ્રકાશ પ્રાપ્ત થયો છે. અંગદાનની માનવતાને આગળ ધપાવવાની સતત કવાયતથી સિવિલ હોસ્પિટલ રાજ્યમાં અંગદાનનું એક અગ્રણી કેન્દ્ર બની છે.
૨૨૨મું ગુપ્ત અંગદાન: મધ્યપ્રદેશના દર્દીના અવસાન બાદ પરિવારનો માનવતાભર્યો નિર્ણય
સિવિલ હોસ્પિટલના આઈસીયુમાં દાખલ મધ્યપ્રદેશના ૪૪ વર્ષીય પુરુષ દર્દી સારવાર દરમિયાન ૨૫ નવેમ્બરના રોજ બ્રેઇનડેડ જાહેર થયા હતા. અંગદાન ટીમના ડૉ. મોહિત ચંપાવત દ્વારા સમજણ આપવામાં આવતા પરિવારજનોને અંગદાન માટે સંમતિ આપી હતી. આ દાનથી મળેલા બે કિડની અને એક લીવર સિવિલ મેડિસિટી કેમ્પસની જ કિડની હોસ્પિટલમાં સારવાર લઈ રહેલા દર્દીઓમાં પ્રત્યારોપણ કરવામાં આવશે. હોસ્પિટલના અધિકારીઓ મુજબ આ દાનના કારણે ત્રણ પરિવારોને નવી આશાનો શ્વાસ મળ્યો છે.
ચક્ષુદાન: દીકરીને અન્યની દ્રષ્ટિમાં જીવંત રાખવા પરિવારનો સંકલ્પ
ચક્ષુદાનના એક હૃદયસ્પર્શી કિસ્સામાં, અમરાઈવાડીની ૨૩ વર્ષીય શ્વેતાબેન પ્રજાપતિના અવસાન બાદ હોસ્પિટલના સ્ટાફ દ્વારા સમજાવતાં પરિવારજનોએ તેમની આંખોનું દાન કરવાનું નક્કી કર્યું હતું. મળેલી બંને આંખો એમ. એન. જે. આઈ. હોસ્પિટલ દ્વારા સ્વીકારવામાં આવી છે. ચક્ષુદાનથી બે વ્યક્તિઓને ફરીથી દ્રષ્ટિ પ્રાપ્ત થશે, અને પરિવારજનોએ દીકરીની યાદને એક અનોખું સન્માન આપ્યું છે.
અંગદાનની જટિલ અને સતત પ્રક્રિયા
અંગદાન સંબંધિત સંપૂર્ણ પ્રક્રિયા અંગે માહિતી આપતાં સિવિલ હોસ્પિટલના તબીબી અધિક્ષક ડૉ. રાકેશ જોશીએ જણાવ્યું કે એક અંગદાન પાછળ લગભગ ૪૮ થી ૭૨ કલાક સુધી ચાલતી જટિલ મેરેથોન જેવી પ્રક્રિયા હોય છે. દર્દી બ્રેઇનડેડ જાહેર થયા બાદ એપનીઆ ટેસ્ટિંગ, પરિવારજનોની કાઉન્સેલિંગ, સોટો સાથેનું સંકલન, પ્રત્યારોપણ માટે દર્દીઓની પસંદગી તથા ઓપરેશનના સમયનું આયોજન — આ તમામ કામગીરી સમયસર અને SOP મુજબ કરવી અત્યંત જરૂરી બને છે.
ત્યારે બીજી બાજુ ગ્રીન કોરિડોર બનાવવા માટે પોલીસ વિભાગ સાથેનું સંકલન અને પોસ્ટમોર્ટમ પ્રક્રિયા માટે જરૂરી તંત્રો સાથેનું સુમેળ — આ તમામ તબક્કાઓમાં હોસ્પિટલની ટીમ ૨૪×૭ સેવા ભાવના સાથે કાર્યરત રહે છે. ડૉ. જોશીના જણાવ્યા અનુસાર ટીમની શિસ્ત, તાલમેલ અને માર્ગદર્શિકા મુજબ કાર્ય કરવાની પદ્ધતિને કારણે જ અંગદાનની આ અવિરત યાત્રા સફળતાપૂર્વક આગળ વધી રહી છે.
અંગ્રદાનમાં સિવિલ હોસ્પિટલની આંકડાકીય સિદ્ધિઓ
હોસ્પિટલ દ્વારા આજદિન સુધી મેળવાયેલ અંગો અને પેશીઓની વિગતો નીચે મુજબ છે:
-
કુલ અંગદાતાઓ: ૨૨૨
-
કુલ અંગોનું દાન: ૭૩૫
-
૧૯૬ લીવર
-
૪૦૮ કિડની
-
૭૧ હૃદય
-
૧૮ સ્વાદુપિંડ
-
૩૪ ફેફસાં
-
૬ હાથ
-
૨ નાનાં આંતરડાં
-
-
કુલ પેશીઓનું દાન: ૧૮૭
-
૧૬૦ ચક્ષુ
-
૨૭ ચામડી
-
-
કુલ દાન (અંગો + પેશીઓ): ૯૨૨
આમાંથી ૭૩૫ અંગો થકી ૭૧૩ દર્દીઓને અત્યાર સુધી સફળતાપૂર્વક નવું જીવન મળી ચૂક્યું છે.
માનવતાની આ અવિરત યાત્રા આગળ પણ ચાલુ રહેશે
સિવિલ હોસ્પિટલના અધિકારીઓના જણાવ્યા મુજબ રાજ્યમાં અંગદાન અંગે જાગૃતિ વધતી જતા ભવિષ્યમાં વધુ પરિવારો આગળ આવી શકે છે. તબીબી ક્ષેત્રની આ મહાન સેવા સાથે ઘણા પરિવારોને નવી ખુશીઓ મળી રહી છે, અને દાતાઓના માનવતાભર્યા નિર્ણયોથી અનેક જીવનો પ્રકાશિત થઈ રહ્યાં છે.
