સમયમર્યાદા પૂર્વે SIR-2025 પૂર્ણ કરનાર 49 BLOનો સન્માન: અમદાવાદ જિલ્લામાં ચૂંટણી તંત્રની પહેલ
રિપોર્ટર
હિતેન્દ્ર ગોસાઈ
અમદાવાદ
મતદારયાદી ખાસ સઘન સુધારણા ઝૂંબેશ (SIR) 2025 અંતર્ગત અમદાવાદ જિલ્લામાં કામગીરી ઝડપી ગતિએ આગળ વધી રહી છે. આ ઝૂંબેશના પ્રથમ તબક્કામાં એન્યુમરેશન ફોર્મના વિતરણ અને પરત મેળવવાની કામગીરી 4 ડિસેમ્બર સુધી પૂર્ણ કરવાની છે. પરંતુ શહેર-જિલ્લાના 21 વિધાનસભા મતવિસ્તારોના 49 બુથ લેવલ ઓફિસર્સ (BLO) એ પોતાને સોંપાયેલી કામગીરી સમયમર્યાદા પહેલા જ પૂર્ણ કરીને ઉત્તમ કામગીરીનું ઉદાહરણ પૂરું પાડ્યું છે.
આ 49 કર્તવ્યનિષ્ઠ BLOને કલેક્ટર કચેરી ખાતે આયોજિત કાર્યક્રમમાં નિવાસી અધિક કલેક્ટર ભાવિન સાગર અને અધિક જિલ્લા ચૂંટણી અધિકારી યોગેશ ઠક્કર દ્વારા પ્રશસ્તિપત્ર આપી સન્માનિત કરવામાં આવ્યા. કાર્યક્રમ દરમિયાન અધિકારીઓએ BLOની કામગીરીને સરાહતાં જણાવ્યું કે આવા કર્મચારીઓ ચૂંટણી પ્રક્રિયાને વધુ અસરકારક અને પારદર્શક બનાવવા મહત્વપૂર્ણ ભૂમિકા ભજવી રહ્યા છે.
સન્માનિત BLOએ SIR દરમિયાનના પોતાના અનુભવો પણ વહેંચ્યા. તેમના જણાવ્યા મુજબ ઘરોમાં જઈને મતદારયાદી સુધારણા માટે જનજાગૃતિ કરવી, નાગરિકોના પ્રશ્નોનું નિરાકરણ લાવવું અને જરૂરી દસ્તાવેજોની ચકાસણી કરવી—આ તમામ કામગીરીમાં જાનેહજુદ અને સેવાભાવ બંને જરૂરી હતા. BLOના આ અનુભવોએ કાર્યક્રમમાં હાજર અન્ય સ્ટાફ માટે પ્રેરણારૂપ વાતાવરણ ઊભું કર્યુ.
આ પ્રસંગે નિવાસી નાયબ કલેક્ટર હાર્દ શાહ, જિલ્લા પુરવઠા અધિકારી દિનતા કથિરીયા સહિત જિલ્લા ચૂંટણી તંત્રના અન્ય અધિકારીઓ અને મોટી સંખ્યામાં બુથ લેવલ ઓફિસર્સ ઉપસ્થિત રહ્યા.
ચૂંટણી તંત્ર દ્વારા જણાવાયું કે આગામી તબક્કામાં પણ આવી જ ગતિશીલતા અને જવાબદારીપૂર્વક કામગીરી કરવાથી અમદાવાદ જિલ્લો SIR-2025માં રાજ્ય સ્તરે આદર્શ જિલ્લો બની શકે છે.
