આણંદમાં 44 BLO એ 100% SIR કામગીરી પૂર્ણ કરી તેમને પ્રમાણપત્ર આપી સન્માન કરાયું.
આણંદમાં 44 BLO એ 100% SIR કામગીરી પૂર્ણ કરી તેમને પ્રમાણપત્ર આપી સન્માન કરાયું.
તાહિર મેમણ – આણંદ – 28/11/2025 -આણંદ જિલ્લામાં ભારતના ચૂંટણી પંચ દ્વારા જાહેર કરાયેલા મતદારયાદીના ખાસ સઘન સુધારણા કાર્યક્રમ અંતર્ગત, 44 બૂથ લેવલ ઓફિસર (BLO) દ્વારા SIR (Special Summary Revision) કામગીરી 100 ટકા પૂર્ણ કરવામાં આવી છે. આ કામગીરીનો ગણતરીનો તબક્કો ચાલી રહ્યો છે અને 4 ડિસેમ્બર સુધીમાં BLOs દ્વારા SIR સંબંધિત કામગીરી પૂર્ણ કરાશે. આ ઝડપી અને શ્રેષ્ઠ કામગીરી બદલ, જિલ્લા ચૂંટણી અધિકારી અને કલેક્ટર પ્રવીણ ચૌધરીએ આણંદ કલેક્ટર કચેરી ખાતે આયોજિત એક કાર્યક્રમમાં આ 44 BLOs ને પ્રમાણપત્ર આપી સન્માનિત કર્યા હતા.
સન્માનિત કરાયેલા 44 BLOs માં ખંભાત વિધાનસભા મતવિસ્તારના 15, બોરસદના 4, આંકલાવના 4, ઉમરેઠના 6, આણંદના 4, પેટલાદના 5 અને સોજીત્રા વિધાનસભા મતવિસ્તારના 6 BLOs નો સમાવેશ થાય છે. કલેક્ટર પ્રવીણ ચૌધરીએ 100 ટકા કામગીરી પૂર્ણ કરનાર BLOs ને અભિનંદન પાઠવ્યા હતા અને તેમની કામગીરીને બિરદાવી હતી. તેમણે અન્ય BLOs ને તેમની બાકી રહેલી કામગીરીમાં મદદરૂપ થવા પણ અનુરોધ કર્યો હતો.
જિલ્લા ચૂંટણી અધિકારીની આ અપીલને સ્વીકારીને, આ 44 BLOs એ ખાતરી આપી હતી કે તેઓ પોતાની કામગીરી પૂર્ણ થયા બાદ અન્ય BLOs ને મદદરૂપ બનશે. આ પ્રસંગે નાયબ જિલ્લા ચૂંટણી અધિકારી અનિતાબેન લાછુન સહિત ચૂંટણી શાખાના અધિકારીઓ અને કર્મચારીઓ ઉપસ્થિત રહ્યા હતા.
