ઇકોઝોનના વિરોધમાં વિસાવદર ખાતેની ટ્રેક્ટર રેલીમાં અંતે ભાજપે ખેડૂતો સામે ઝૂકવું પડ્યું : પ્રવીણ રામ

 સૌરાષ્ટ્રમાં ઇકોઝોનનો વિરોધ દિવસેને દિવસે વધી રહ્યો છે, ઇકોઝોનની વિરુદ્ધના એક પછી એક પ્રોગ્રામો સફળ થઈ રહ્યા છે પરંતુ ગઈ કાલે યોજાયેલી વિસાવદરની ટ્રેક્ટર રેલીએ સરકારની ચિંતામાં વધારો કર્યો છે કારણકે ટ્રેક્ટર રેલીને પરમિશન ના આપી હોવા છતાં વિશાળ સંખ્યામાં ખેડૂતો ઉપસ્થિત થતા અંતે તંત્રએ મજબુરીમાં પરમિશન આપવી પડી.નેતાઓ અને પોલીસ વચ્ચે ઘર્ષણના ઘટનાઓ પણ જોવા મળી હતી,આમ સંઘર્ષ બાદની આ ખેડૂતોની રેલી ઐતિહાસિક હતી. આ તકે આમ આદમી પાર્ટીના નેશનલ જોઈન્ટ સેક્રેટરી અને મહારાષ્ટ્રના પ્રદેશ સહ પ્રભારી ગોપાલ ઇટાલિયા, પ્રદેશ ફ્રંટલ સંગઠન પ્રમુખ પ્રવિણ રામ, પરેશભાઈ ગોસ્વામી, કિસાન સેલ પ્રદેશ પ્રમુખ રાજુ કરપડા, પ્રદેશ પ્રવક્તા કરશનબાપુ ભાદરકા, લલિતભાઈ વસોયા, પાલભાઈ આંબલીયા, સેજલબેન સહિત મોટી સંખ્યામાં આમ આદમી પાર્ટીના પદાધિકારીઓ અને કાર્યકર્તાઓ તેમજ ખેડૂતોએ હાજરી આપી લડતને વધારે મજબૂત બનાવી હતી, તેમજ સાથે સાથે સ્થાનિક આગેવાનો હરેશભાઈ સાવલિયા, કરશનભાઇ વારોતરિયા, હિતેશ વઘાસિયા, રાજુભાઈ બોરખતરીયા, મહેન્દ્રભાઈ, મથુરભાઈ, ભદ્રેશભાઈએ આ રેલીને સફળ બનાવવા માટે ખૂબ જ મહેનત કરી એ બદલ ઇકોઝોન માટે લડત લાંબા સમયથી લડત લડનાર આપનેતા પ્રવીણ રામે જાહેરમાં પણ આભાર વ્યક્ત કર્યો હતો.

આ રેલીમાં આંદોલનકારી અને આમ આદમી પાર્ટીના પ્રદેશ ફ્રન્ટલ સંગઠન પ્રમુખ પ્રવિણ રામે ઇકોઝોનની વિરુદ્ધમાં આગામી પ્રોગામો જાહેર કરતા જણાવ્યું હતું કે, આજે હું ત્રણ મહત્વપૂર્ણ કાર્યો લોકોને સોંપવા જઈ રહ્યો છું. પહેલું કાર્ય, ઘરની આગળ આપણે રંગોળી કરીએ છીએ, આ આપણી સંસ્કૃતિ છે. તો આ રંગોળીમાં ઇકોઝોનનો વિરોધ દેખાય તે રીતની રંગોળી બનાવવામાં આવે. આ રીતે ઘરે ઘરે રંગોળી બનાવીને લોકોએ પોતાનો વિરોધ દર્શાવવાનો છે. બીજું કાર્ય, જ્યારે તમે ફટાકડા ફોડો તો તે ફટાકડા પર ઇકોઝોનનું સ્ટીકર લગાવજો અને પછી એ ફટાકડો ફોડજો જેનાથી ફટાકડાની સાથે સાથે ઇકોઝોનના પણ ટુકડે ટુકડા થઈ જાય. ત્રીજું કાર્ય, અત્યાર સુધી વ્યક્તિગત રૂપે 25000 લોકોએ ઇકોઝોન વિરુદ્ધ વાંધા અરજી કેન્દ્ર સરકારને પહોંચાડી છે, હવે બેસતા વર્ષથી આપ તમામ લોકોએ વધુને વધુ લોકોને ઈમેલ અને બીજા ડિજિટલ માધ્યમથી કેન્દ્ર સરકારને એક લાખથી વધુ વાંધા અરજીઓ મોકલવાની છે. આપના ગીરના તમામ 196 ગામડાઓમાંથી વાંધા અરજીઓ જવી જોઈએ. આ તમામ કાર્યોના ફોટો અને વિડીયો બનાવીને એકબીજાને મોકલજો જેનાથી વધુને વધુ લોકો આ કાર્યો કરવા માટે પ્રેરાય અને વિરોધને આપણે વધુ મજબૂત બનાવીએ.