પંચમહાલમાં ખનીજ વિભાગની મોટી કાર્યવાહી : શહેરા અને ગોધરા તાલુકામાંથી ₹1.10 કરોડનો મુદ્દામાલ જપ્ત
પંચમહાલ ગોધરા
નિલેશભાઈ દરજી શહેરા 
ગોધરા: પંચમહાલ જિલ્લામાં ખનિજ ચોરી સામે કામગીરીને વધુ તીવ્ર બનાવતા, ખનિજ વિભાગે શહેરા અને ગોધરા તાલુકામાંથી રેતી અને ક્વાર્ટઝ ખનન કરતા કુલ સાત વાહનો ઝડપીને અંદાજિત ₹1.10 કરોડનો મુદ્દામાલ કબ્જે કર્યો છે.
વિભાગને મળેલી ચોક્કસ બાતમીના આધારે શહેરા અને ગોધરા તાલુકાના ધાનિત્રા, ટીંબા સહિતના વિસ્તારોમાં દરોડા યોજવામાં આવ્યા હતા. આ દરોડા દરમિયાન બિનઅધિકૃત રીતે ખનન અને ઓવરલોડ વાહન પરિવહન કરતી હાલતમાં પાંચ ટ્રક અને બે ટ્રેક્ટરો પકડી પાડવામાં આવ્યા હતા.
ધાનિત્રા ગામે કુણ નદીના પટ્ટામાં રેતી ખનન માટે પહોંચેલા ખાલી ટ્રેક્ટરો અને અન્ય સ્થળોએ રેતી તથા ક્વાર્ટઝ ભરેલ વાહનો ઝડપાતા ખનિજ વિભાગે તાત્કાલિક કાયદેસરની કાર્યવાહી શરૂ કરી છે. પકડાયેલા તમામ વાહનો અને સામગ્રી કલેક્ટર કચેરી ખાતે જમા કરવામાં આવી છે તથા ખનન કરનારા વ્યક્તિઓની અટકાયત પણ કરવામાં આવી છે.
આ કાર્યવાહીથી ખનીજ ચોરી કરનારા તત્વો પર કડક સંદેશો ગયો છે અને આગામી સમયમાં પણ આવી ચક્રવ્યૂહિય કાર્યવાહી ચાલુ રહેશે તેવી શક્યતાઓ સેવાઈ રહી છે.
