ઈસનપુર તળાવ વિસ્તારમાં મેગા ડિમોલિશન ડ્રાઇવ: અમદાવાદ શહેર પોલીસની દેખરેખમાં 30% અતિક્રમણ દૂર
રિપોર્ટર
હિતેન્દ્ર ગોસાઈ
અમદાવાદ
અમદાવાદ શહેરમાં તળાવોનું સંરક્ષણ અને તેમના કુદરતી ફેલાવાનું પુનઃસ્થાપન સુનિશ્ચિત કરવા માટે મ્યુનિસિપલ તંત્ર અને પોલીસ વિભાગ દ્વારા ચાલતી કાર્યવાહી વધુ ગતિશીલ બની રહી છે. એપ્રિલ મહિનામાં ચંડોળા તળાવ વિસ્તારમાં હાથ ધરાયેલી મેગા ડિમોલિશન ડ્રાઇવ બાદ હવે ઈસનપુર તળાવ આસપાસના બિનઅધિકૃત દબાણો દૂર કરવાની કાર્યવાહી શરૂ કરવામાં આવી છે.
અમદાવાદ શહેર પોલીસ કમિશ્નર જી. એસ. મલિક આજે ઈસનપુર તળાવ વિસ્તારમાં પહોંચી સમગ્ર કાર્યવાહીનું સ્થલ પર નિરીક્ષણ કર્યું હતું. કમિશ્નરે અધિકારીઓ પાસેથી કામગીરીની વિગતો મેળવી અને કાયદો તથા વ્યવસ્થા જળવાઈ રહે તે માટે જરૂરી સૂચનાઓ આપી હતી.
અધિકારીઓ મુજબ ઈસનપુર તળાવના કુદરતી ફેલાવામાં અવરોધરૂપ બનેલા બાંધકામો અને અતિક્રમણો સામે કાર્યવાહી અત્યંત સુચનાત્મક રીતે હાથ ધરવામાં આવી. આ વિસ્તારમાં અંદાજે 30% જેટલો ભાગ અતિક્રમિત ગણાતો હતો, જેમાંથી મોટો હિસ્સો સફળતાપૂર્વક દૂર કરવામાં આવ્યો છે. કાર્યવાહી દરમિયાન કાયદો અને વ્યવસ્થાનો કોઈ મોટો બનાવ નોંધાયો નથી, જે પોલીસની સચોટ આયોજનશક્તિ અને ટીમવર્કને દર્શાવે છે.
ચંડોળા તળાવ વિસ્તારમાં અગાઉ કરાયેલા મેગા ડિમોલિશન અભિયાનના સકારાત્મક પરિણામો હવે સ્પષ્ટ દેખાઈ રહ્યા છે. ત્યાંના અતિક્રમણો દૂર થવા પામ્યા બાદ તળાવમાં સ્વાભાવિક રીતે પાણી ભરાઈ ગયું છે, જે પાણી સંરક્ષણ માટેના પ્રયાસોને મજબૂતી આપે છે. તંત્રનો વિશ્વાસ છે કે ઈસનપુર તળાવ વિસ્તારની કામગીરીથી પણ આવનારા મોસમમાં તળાવનું પુનર્જીવન વધુ સચોટ રીતે થઈ શકશે.
સ્થાનિક તંત્ર દ્વારા જણાવવામાં આવ્યું છે કે આવનારા સમયમાં શહેરના અન્ય તળાવોમાં પણ અતિક્રમણ વિરોધી અભિયાન તબક્કાવાર હાથ ધરવામાં આવશે. અમદાવાદના પર્યાવરણ અને જળ સ્ત્રોતોની સુરક્ષા માટે આવી કામગીરીને જરૂરી ગણવામાં આવી રહી છે.
