વિજાપુર સ્વામિનારાયણ સ્કૂલમાં ૮ વર્ષીય બાળકી સાથે દુર્વ્યવહારનો આક્ષેપ, પોલીસમાં ફરીયાદ નોંધાઈ
વાત્સલ્યમ સમાચાર
સૈયદજી બુખારી વિજાપુર
વિજાપુરમાં આવેલી સ્વામિનારાયણ સ્કૂલમાં અભ્યાસ કરતી ધોરણ–૨ની એક બાળકી સાથે અજાણ્યા યુવાને દુર્વ્યવહાર કર્યો હોવાનો આક્ષેપ સામે આવતા ચકચાર મચી છે. ઘટના અંગે બાળકીના વાલીએ વિજાપુર પોલીસ સ્ટેશનમાં લેખિત ફરીયાદ નોંધાવી છે.મળતી માહિતી મુજબ, ઘટનાના દિવસોમાં બાળકી દરરોજની જેમ સ્કૂલમાં જતી હતી. આ દરમિયાન તા.૧૯ તથા ૨૦ નવેમ્બર ૨૦૨૫ના રોજ અજાણ્યા છોકરાએ બાળકીનો હાથ પકડીને સ્કૂલ પ્રાંગણના પાછળના બગીચામાં લઇ જઇ તેના શરીરના પાછળના ભાગે હાથ ફેરવી દુર્વ્યવહાર કર્યો હોવાનો આક્ષેપ કરવામાં આવ્યો છે. ફરીયાદ મુજબ આરોપીએ બાળકીના હાથ પર ઇન્જેક્શન જેવું કંઈક આપ્યું હોવાની પણ માહિતી સામે આવી છે તથા ઘટનાની બાબતે કોઈને ન કહેવાની ધમકી આપી હોવાનું પણ જાણવા મળે છે.બાળકી દ્વારા આ અંગે ઘરે જઈને વાલીઓને જાણ કરાતા તેઓ તરત જ સ્કૂલમાં પહોંચી જવાબદાર સાથે વાતચીત કરી હતી. સ્કૂલ સંચાલકોએ પ્રથમ સી.સી.ટી.વી. ફૂટેજ તપાસવાની વાત કરી હતી, પરંતુ ઘટનાસ્થળે કેમેરા ન હોવાને કારણે હકીકત સ્પષ્ટ થઈ શકી નહોતી. બાદમાં શાળાના કેટલાક વિદ્યાર્થીઓને ઓળખ માટે ઉભા રાખવામાં આવ્યા હતા, porém બાળકી કોઈ ચોક્કસ વિદ્યાર્થીની ઓળખ કરી શકી નહોતી.સાંજે બાળકીના હાથમાં અને પેટમાં દુખાવો થવા લાગતા વાલીએ તેને સારવાર માટે વિજાપુર સિવિલ હોસ્પિટલમાં ખસેડી હતી.આરોપિત છોકરો અજાણ્યો હોવાથી પોલીસે અજ્ઞાત વ્યક્તિ સામે જાતીય શોષણ તથા ધમકી આપવાનો ગુનો દાખલ કરી વધુ તપાસ હાથ ધરી છે. સ્કૂલ તથા આસપાસની જગ્યાના સી.સી.ટી.વી. ફૂટેજ સહિત તમામ શક્ય દિશામાં તપાસ ચાલી રહી છે.વિજાપુરમાં બનેલી આ ઘટનાએ વાલીઓ અને શાળાઓમાં સુરક્ષા અંગે ફરી એકવાર ચિંતા વ્યકત કરી છે. પોલીસ દ્વારા બાળકીના નિવેદન, સ્કૂલ સ્ટાફની પૂછપરછ અને ટેકનિકલ તપાસના આધારે જરૂરી પગલાં લેવામાં આવશે.
