વાત્સલ્યમ સમાચાર
મદન વૈષ્ણવ
રાજ્યનાં ચેરાપૂંજી તરીકે ઓળખાતા ડાંગમાં ચોમાસામાં પડતા 100 ઈંચ વરસાદથી લોકોને પાણી મળી રહે તે માટે કરોડો ગ્રાન્ટની ફાળવણી છતા યોજનાઓ ક્યાંક અધુરી તો ક્યાંક કાગળ ઉપર જ જોવા મળતા લોકોની હાલત કફોડી..
રાજ્યના છેવાડે આવેલા અને ચેરાપૂંજી તરીકે ઓળખાતા ડાંગ જિલ્લામાં ચોમાસાની ઋતુમાં 100 ઈંચથી વધુ વરસાદ પડે છે. તેવામાં ડાંગ જિલ્લાનાં લોકોને પીવાનાં, પશુપાલન અને ખેતીક્ષેત્રે પાણીની ભરપૂર સુવિધાઓ મળી રહે તે હેતુસર કેન્દ્ર અને રાજય સરકાર દ્વારા વર્ષ દહાડે અનેક યોજનાઓ અમલમાં મૂકી કરોડો રૂપિયાનાં ગ્રાન્ટની ફાળવણી કરવામાં છે.પરંતુ ડાંગ જિલ્લામાં પાણી પુરવઠા વિભાગનાં અધિકારીઓની બંદરબાટ નિતી અને ગ્રાન્ટનું આંધણ કરાતા આ યોજનાનો સાર્થક થવાનાં બદલે ક્યાંક અધૂરી તો અમુક જગ્યાએ કાગળ પર અથવા પાણી વગર કોરીકટ જોવા મળે છે. જેમાં ડાંગ જિલ્લાનાં આહવા તાલુકામાં આવેલ વાસુર્ણા ખાતે લોકોને વપરાશ સહિત પીવાનું પાણી મળી રહે તે માટે ડાંગ જિલ્લા પાણી પુરવઠા વિભાગ દ્વારા મીની પાઇપ લાઈન યોજના મંજુર કરવામાં આવી હતી.જેનું કામ 03/11/2023 ના દિને ચાલુ થયુ હતુ અને 27/04/2024 ના દિને કામ પૂર્ણ થયુ હતુ.જેના માટે કુલ રકમ 5 લાખ ફાળવેલ હતી પરંતુ ત્યારથી લઇને આજ દિન સુધી એક ટીપુ પાણીનું નળમાં આવ્યુ નથી.આ યોજના પાણી વગર કોરીકટ બની પાણી પુરવઠા વિભાગનાં ભ્રષ્ટાચારની ગવાહી પુરે છે.તેમ છતાંય પાણી પુરવઠા વિભાગનાં કાર્યપાલક ઈજનેર સહીત અધિકારીઓને કોઈ પણ પડી નથી. જેમાંય ડાંગ જિલ્લામાં પાણી પુરવઠા વિભાગનાં કાર્યપાલક ઈજનેર તરીકે જ્યારથી આર.જે.ચૌધરીની નિમણૂક થઈ છે.ત્યારથી આ ભ્રષ્ટ અધિકારીનાં પગલે જિલ્લાનાં ગામડાઓમાં પાણીની યોજનાઓ પડી ભાંગી છે.આ અધિકારીને ડાંગ જિલ્લાનાં લોકોનાં પ્રાણ સમાન પાણીનાં ઉકેલની કામગીરીમાં કોઈ રસ નથી.ડાંગ જિલ્લા પાણી પુરવઠા વિભાગનાં કાર્યપાલક ઈજનેર આર.જે.ચૌધરીની આડોડાઈ અને ખાયકી નીતિનાં પગલે ડાંગ જિલ્લા પાણી પુરવઠા વિભાગ દ્વારા ગામડાઓની પાણીની યોજનાઓમાં કોઈ પણ જાતનું સુપરવિઝન ન કરાતા પ્રધાનમંત્રી મોદી અને મક્કમ મુખ્યમંત્રી ભુપેન્દ્રભાઈ પટેલનાં સપનાને ચકનાચૂર કરી નાખ્યા છે.ત્યારે ઘોર નિદ્રામાં પોઢેલ ડાંગ જિલ્લા પાણી પુરવઠા વિભાગ ઉનાળાની પહેલા ગામે ગામ સર્વે કરી પાણીની યોજનાઓ સફળ બનાવે તેવી લોકમાંગ ઉઠી છે.વાસુર્ણા ગામનાં મહિલા શીતલબેન કાશીનાથ વાઘમારે એ જણાવ્યુ હતુ કે બે વર્ષ પહેલા પાણી પુરવઠા વિભાગ દ્વારા મીની પાઈપલાઇનની યોજના અમલમાં મૂકી છે.પરંતુ આજદિન સુધી એક પણ ટીપુ પાણી મળ્યુ નથી. જેથી સરકાર આ બાબતે તુરંત જ તપાસ કરાવી અમોને પાણી ઉપલબ્ધ કરાવે.જ્યારે આ બાબતે ડાંગ જિલ્લા પાણી પુરવઠા વિભાગનાં નાયબ કાર્યપાલક ઈજનેર સંદીપભાઈ ચૌધરીએ જણાવ્યુ હતુ કે આ યોજના પાણી પુરવઠા દ્વારા બનાવવામાં આવી છે.પરંતુ કોઈ ફોલ્ટનાં કારણે અટકી પડી છે.જેથી સોમવારે તપાસ કરાવી ઘટતી કાર્યવાહી હાથ ધરીશુ..
