જો કોઈ સ્ત્રી તેના પતિ સિવાય બીજા કોઈ પુરુષ પ્રત્યે આકર્ષાય છે પણ શારીરિક સંબંધ બાંધતી નથી, તો તેને ‘વ્યભિચાર’ ગણી શકાય નહીં. : હાઈકોર્ટ
મધ્યપ્રદેશ હાઈકોર્ટે એક ચુકાદો આપ્યો છે કે પત્નીનો તેના પતિ સિવાય અન્ય કોઈ વ્યક્તિ પ્રત્યેનો પ્રેમ અને સ્નેહ ત્યાં સુધી વ્યભિચાર ન ગણાય જ્યાં સુધી તે મહિલા જે તે વ્યક્તિ સાથે શારીરિક સંબંધ બાંધતી હોય. આ અરજી પર સુનાવણી કરતા મધ્યપ્રદેશ હાઈકોર્ટના ન્યાયાધીશ જીએસ અહલુવાલિયાએ પતિ-પત્ની વચ્ચેના મતભેદના મુદ્દા પર એક મહત્વપૂર્ણ ટિપ્પણી કરી છે. કોર્ટનું કહેવું છે કે જો કોઈ સ્ત્રી તેના પતિ સિવાય બીજા કોઈ પુરુષ પ્રત્યે આકર્ષાય છે પણ શારીરિક સંબંધ બાંધતી નથી, તો તેને ‘વ્યભિચાર’ ગણી શકાય નહીં.
જસ્ટિસ જીએસ અહલુવાલિયાની બેન્ચે ટિપ્પણી કરી, “સંબંધમાં વ્યભિચાર અથવા છેતરપિંડી ત્યારે જ થઈ શકે છે જ્યારે વ્યક્તિ લગ્નેતર કોઈ અન્ય વ્યક્તિ સાથે શારીરિક સંબંધ ધરાવે છે. આ સાથે કોર્ટે પતિની અપીલ ફગાવી દીધી કે તેની પત્ની બીજા કોઈને પ્રેમ કરે છે અને તેથી તેને ભરણપોષણનો કોઈ અધિકાર નથી.
છિંદવાડાના રહેવાસી પતિએ મધ્યપ્રદેશ હાઈકોર્ટમાં પૈતૃક સંપત્તિમાંથી કાઢી મુકવા અને ઓછી માસિક આવક ધરાવતી નોકરીનો ઉલ્લેખ કરીને અરજી દાખલ કરી હતી. ભરણપોષણ ભથ્થું ચૂકવવાના નીચલી કોર્ટના આદેશ સામે પતિએ હાઇકોર્ટમાં અરજી કરી હતી. પતિએ કહ્યું હતું કે, તેની પત્ની ભરણપોષણ મેળવવા માટે હકદાર નથી કારણ કે તેણી સાસરિયાનું ઘર છોડીને તેના માતાપિતાના ઘરે ગઈ હતી અને બીજા પુરુષ સાથે પ્રેમ કરવાની વાત કરી રહી હતી.
હાઈકોર્ટે નીચલી કોર્ટના નિર્ણયને માન્ય રાખ્યો જેમાં પતિને તેની પત્નીને ભરણપોષણ ભથ્થા તરીકે 4,000 રૂપિયા ચૂકવવાનો આદેશ આપવામાં આવ્યો હતો. હાઈકોર્ટે કહ્યું કે પતિએ કોઈપણ સંજોગોમાં પત્નીને ભરણપોષણ ભથ્થું ચૂકવવું પડશે.
હાઈકોર્ટે પતિની ઓછી આવકની અરજી ફગાવી દીધી. કોર્ટે કહ્યું કે પતિની ઓછી આવકની દલીલ ભરણપોષણ ભથ્થું ચૂકવવાનો ઇનકાર કરવાનો માપદંડ નથી. જો અરજદારે એવી છોકરી સાથે લગ્ન કર્યા હોય કે તે તેની રોજિંદી જરૂરિયાતો પૂરી કરવા માટે પણ સક્ષમ નથી, તો તે પુરુષ પોતે તેના માટે જવાબદાર છે, પરંતુ જો તે શારીરિક રીતે સક્ષમ વ્યક્તિ હોય તો તેણે તેની પત્નીનું ભરણપોષણ કરવા અથવા ભરણપોષણની રકમ ચૂકવવા માટે કંઈક કમાવાની મહેનત કરવી પડશે.
