મુખ્યમંત્રી ભૂપેન્દ્ર પટેલ વીર બાલ દિવસની થલતેજ ગુરુદ્વારાની ઉજવણીમાં જોડાયા
રિપોર્ટર
હિતેન્દ્ર ગોસાઈ
અમદાવાદ
મુખ્યમંત્રી ભૂપેન્દ્ર પટેલ વીર બાલ દિવસ નિમિત્તે અમદાવાદના થલતેજ ગુરુદ્વારામાં આયોજિત કાર્યક્રમમાં સહભાગી થયા.
શીખ સંપ્રદાયના ગુરુ ગોવિંદસિંહજીના બે નાના પુત્રોએ રાષ્ટ્ર અને ધર્મ રક્ષા માટે આપેલા બલિદાનની યાદમાં વડાપ્રધાન નરેન્દ્ર મોદીની પ્રેરણાથી 2022થી દર વર્ષ 26 ડિસેમ્બરે દેશભરમાં વીર બાલ દિવસ તરીકે ઉજવણી થાય છે.
મુખ્યમંત્રીએ આ પ્રસંગે કહ્યું કે, રાષ્ટ્રના સ્વાભિમાન અને ધર્મ રક્ષા માટે શીખ પરંપરાનું મહત્વ ત્યાગ, તપસ્યા અને બલિદાનથી ભરેલું છે. વીર બાલ દિવસ એ દેશના યુવાનો અને બાળકોમાં રાષ્ટ્ર પ્રથમનો ભાવ પ્રેરિત કરનારો મહત્વનો દિવસ છે.
તેમણે ઉમેર્યું કે, વીર બાલ દિવસ એ સંસ્કૃતિ અને માતૃભૂમિના રક્ષણ માટે આપેલી શૌર્યગાથાનું પ્રતીક છે, જેમાં ધર્મ પરિવર્તન સામે ઝૂકવાના બદલે પ્રાણની આહુતિ આપવાનું શીખવવામાં આવે છે.
મુખ્યમંત્રીએ વડાપ્રધાન નરેન્દ્ર મોદીના વિઝનને બિરદાવતાં કહ્યું કે, દેશના બાળકોની વિશેષ સાહસિકતા અને સફળતાઓને માન્યતા આપવા માટે 26મી જાન્યુઆરીએ આપવામાં આવતો રાષ્ટ્રીય બાળ પુરસ્કાર હવે વીર બાલ દિવસ પર અપાય છે, જે નવી પ્રથા શરૂ કરવામાં આવી છે.
મુખ્યમંત્રીએ થલતેજ ગુરુદ્વારામાં યોજાયેલા શબદ કીર્તનમાં જોડાઈને ભક્તિભાવ પૂર્વક ગુરુ ગ્રંથ સાહેબના દર્શન પૂજન કર્યા અને લંગર સેવામાં જોડાઈને ભોજનprasાદ પીરસ્યું.
આ પ્રસંગે શહેરના મેયર પ્રતિભા જૈન, સાંસદ દિનેશ મકવાણા, ધારાસભ્ય અમિત શાહ, જીતુ પટેલ, અમુલ ભટ્ટ, દર્શના વાઘેલા, ડેપ્યુટી મેયર જતીન પટેલ, સ્ટેન્ડિંગ ચેરમેન દેવાંગ દાણી તેમજ શીખ સમુદાયના મોટી સંખ્યામાં ભાવિકો ઉપસ્થિત રહ્યા હતા.
