MORBI મહાનગરપાલિકા ખાતે “મોરબી કોર્પોરેશન ડે”ની ઉજવણી કરવામાં આવી
મોરબી મહાનગરપાલિકાની ગાર્ડન શાખા દ્વારા મોરબી મહાનગરપાલિકાએ પોતાની સ્થાપનાના સફળ એક વર્ષ પૂર્ણ કર્યા હોવાના ઉપલક્ષ્યમાં “મોરબી કોર્પોરેશન ડે”ની ઉજવણીનું આયોજન કરવામાં આવ્યું છે. આ ઉજવણીના ભાગરૂપે આજે વૃક્ષારોપણ દિવસની ઉજવણી કરવામાં આવી હતી.
આ અંતર્ગત મોરબી મહાનગરપાલિકાની મુખ્ય બિલ્ડિંગ તેમજ શહેરની વિવિધ ક્લસ્ટર ઓફિસોમાં વ્યાપક પાયે વૃક્ષારોપણ કરવામાં આવ્યું હતું. આ અભિયાન દરમિયાન અંદાજે 550થી વધુ વૃક્ષોનું રોપણ કરવામાં આવ્યું હતું. વૃક્ષારોપણ દિવસની આ ઉજવણીથી સમગ્ર મોરબી જિલ્લામાં હરિયાળીમાં નોંધપાત્ર વધારો થશે.
વૃક્ષોના વાવેતરથી વધતું પ્રદૂષણ ઘટાડવામાં મદદ મળશે તેમજ મોરબી શહેરની આબોહવામાં ઓક્સિજનનું પ્રમાણ પણ વધશે, જે પર્યાવરણ અને નાગરિકોના આરોગ્ય માટે લાભદાયી સાબિત થશે.
આ કાર્યક્રમમાં મોરબી મહાનગરપાલિકાના કમિશનરશ્રી સ્વપ્રિલ ખરે (IAS), નાયબ કમિશનર શ્રી કુલદીપસિંહ વાળા તેમજ મહાનગરપાલિકાના અધિકારીઓ અને કર્મચારીઓ ઉપસ્થિત રહ્યા હતા.
