🕌 શંખેશ્વર તીર્થે જહાજ મંદિર એન્કરવાલા ધામે ત્રિદિવસીય ‘શ્રી અર્હદ્ મહાપૂજન’ સંપન્ન

રિપોર્ટ : પુજા ઠક્કર, મુંદરા – કચ્છ.

🕌 શંખેશ્વર તીર્થે જહાજ મંદિર એન્કરવાલા ધામે ત્રિદિવસીય ‘શ્રી અર્હદ્ મહાપૂજન’ સંપન્ન

પવિત્રતા અને મોક્ષમાર્ગની પ્રેરણા આપતા અઠ્ઠમ તપનું આયોજન; હજારો ભાવિકોની ઉપસ્થિતિ

શંખેશ્વર, પાટણ: સુપ્રસિદ્ધ જૈન તીર્થધામ શંખેશ્વર ખાતે આવેલા જહાજ મંદિર એન્કરવાલા ધામમાં યુગપ્રધાન, દાદા ગુરુદેવ, જૈનાચાર્ય શ્રી પાર્શ્વચંદ્રસૂરીશ્વરજી મહારાજાની ૪૭૦મી પુણ્યતિથિ નિમિત્તે એક ભવ્ય ધાર્મિક કાર્યક્રમનું આયોજન કરવામાં આવ્યું હતું. શ્રી પાર્શ્વચંદ્ર ગચ્છ જૈન સંઘ-ચેમ્બર, મુંબઈ દ્વારા આયોજિત સામુહિક અઠ્ઠમ તપના પ્રથમ દિવસે ત્રિદિવસીય “શ્રી અર્હદ્ મહાપૂજન” નું આયોજન થયું હતું. આ મહાપૂજન, જે ત્રણ દિવસ સુધી ચાલે છે, તે અરિહંત પરમાત્માની ઉત્કૃષ્ટ ભક્તિનું સ્વરૂપ છે.

આ પ્રસંગે ઉપસ્થિત મુનિરાજ શ્રી નયશેખર મહારાજ સાહેબએ જણાવ્યું હતું કે, શંખેશ્વરમાં કરાયેલું અઠ્ઠમ તપ જીવનમાં પવિત્રતા, શાંતિ અને મોક્ષમાર્ગની પ્રેરણા આપે છે. તેમણે શ્રી અર્હદ્ મહાપૂજનનું મહત્ત્વ સમજાવતા કહ્યું કે, આ મહાપૂજન બધા જ વિઘ્નોને દૂર કરનારું અને મનવાંછિત તત્વોને પૂર્ણ કરનારું મહાપ્રભાવિક પૂજન છે. પૂજન દરમિયાન ૨૫ કુસુમાંજલિ દ્વારા ભગવાનની ઉત્કૃષ્ટ ભક્તિ કરવામાં આવી હતી, જેમાં સમ્યકદ્રષ્ટિ દેવતાઓનું હોમ દ્વારા આહ્વાન કરાયું હતું.

ત્રણ દિવસના આ ભક્તિમય અનુષ્ઠાનમાં વિવિધ ધાર્મિક વિધિઓ કરવામાં આવી હતી, જેમાં શ્રી આદિનાથ અને શ્રી શાંતિનાથ દાદાની સ્થાપના, અખંડ દીપક સ્થાપના, જિનાર્ચન વિધિઓ, પરમાત્માનો ષડરસ ભોજનથાળ, ગ્રહાદિક દેવોનું પૂજન, સાત દીવાની આરતી અને ૨૫ વિશિષ્ટ ગુણસ્તવના યુક્ત કુસુમાંજલિનો સમાવેશ થાય છે. બીજા દિવસે સપ્તપીઠ પૂજન, પંચપરમેષ્ઠી પીઠ પૂજન, દશદિગ્પાલન, નવગ્રહ અને સોળ વિદ્યાદેવી પીઠ પૂજન જેવી વિધિઓ બાદ ત્રિકોણ હવન કુંડમાં આહુતિ વિધાન થયું હતું. અંતિમ દિવસે શ્રી શાંતિનાથ દાદાનો જન્મ કલ્યાણક મહોત્સવ, ૧૦૮ જન્માભિષેક, અંગવિલેપન, વિવિધ પૂજાઓ (ફલ, પુષ્પ, આભૂષણ) અને શાંતિકળશ સાથે પૂર્ણાહુતિ કરવામાં આવી હતી.

મુંબઈ, અમદાવાદ, કચ્છ, રાજસ્થાન સહિત દેશભરમાંથી મોટી સંખ્યામાં ભાવિકોએ આ ધાર્મિક મહોત્સવમાં ઉપસ્થિત રહીને ધન્યતા અનુભવી હતી.

વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :

-પુજા ઠક્કર,

9426244508,

ptindia112@gmail.com

Sorry, there was a YouTube error.