MORBI:સાવધાન-મોરબીમાં ઓનલાઈન એજ્યુકેશનના નામે છેતરપિંડી
દીકરીના અભ્યાસ માટે ફી ભરીને પિતાએ ગુમાવ્યા રૂ.11 હજાર
વાંકાનેર: ટેકનોલોજીના યુગમાં શિક્ષણ હવે ઓનલાઈન બની રહ્યું છે, ત્યારે તેની સાથે જોડાયેલા સાયબર ફ્રોડના કિસ્સાઓ પણ વધી રહ્યા છે. વાંકાનેર સીટી પોલીસ સ્ટેશનમાં ઓનલાઈન એજ્યુકેશન એપ્લિકેશનના નામે છેતરપિંડી થઈ હોવાની એક ફરિયાદ નોંધાઈ છે, જેમાં એક પિતાએ પોતાની દીકરીના સારા અભ્યાસ માટે ભરેલી ₹11,000ની ફી ગુમાવવાનો વારો આવ્યો છે.
મોરબીમાં રહેતા 45 વર્ષીય ફરિયાદીએ પોતાની ધોરણ-8માં અભ્યાસ કરતી દીકરીનું શૈક્ષણિક સ્તર સુધારવા માટે ‘Pigeon Education Technology’ કંપનીની ‘Oda Class’ નામની મોબાઈલ એપ્લિકેશન ડાઉનલોડ કરી હતી.
શરૂઆતનો વિશ્વાસ: ફરિયાદીએ અગાઉ બે વખત ₹49નું નાનું પેમેન્ટ કરીને કોર્સ કરાવ્યો હતો, જેના કારણે તેમને એપ્લિકેશન પર વિશ્વાસ બેઠો હતો.માસ્ટર કોર્સમાં એડમિશન: ત્યારબાદ, ગત તા. 6/4/2024ના રોજ તેમણે ₹1,000 ભરીને માસ્ટર કોર્સમાં એનરોલમેન્ટ કરાવ્યું હતું.મોટી છેતરપિંડી: નવી બેચ શરૂ થવાની હોવાથી આરોપીઓએ આપેલી લિંક અને UPI ID પર ફરિયાદીએ તા. 7/4/2024ના રોજ ₹11,000 ઓનલાઈન ટ્રાન્સફર કર્યા હતા.ફી ભર્યા હોવા છતાં ‘Oda Class’ એપ્લિકેશનમાં એનરોલમેન્ટનું સ્ટેટસ અપડેટ થયું નહોતું. જ્યારે ફરિયાદીએ જોયું કે તેમની દીકરીની અભ્યાસની બેચ શરૂ થઈ નથી અને ભરેલા ₹11,000નું કોઈ રેકોર્ડ બતાવતું નથી, ત્યારે તેમણે આપેલા નંબરો પર સંપર્ક કર્યો હતો. જોકે, આરોપીઓએ સંતોષકારક જવાબ આપવાનું ટાળતા ફરિયાદીને પોતાની સાથે છેતરપિંડી થઈ હોવાનો અહેસાસ થયો હતો. ફરિયાદીની ફરિયાદને આધારે વાંકાનેર સીટી પોલીસે અજાણ્યા શખ્સો વિરુદ્ધ ગુનો નોંધી આગળની તપાસ હાથ ધરી છે.
