વાત્સલ્યમ્ સમાચાર,
પૂજા ઠક્કર – મુંદરા કચ્છ.
ગુંદાલા કન્યા પ્રાથમિક શાળાની ૨૩૧ બાળાઓ માટે ‘પ્રીતિ ભોજન’નું આયોજન : દાતાની દિલેરીથી મહેકી ઉઠ્યું શિક્ષણધામ
મુંદરા,તા.31: શિક્ષણની સાથે સામાજિક જવાબદારી અને સેવાના ભાવને જોડીને મુંદરા તાલુકાના ગુંદાલા ગામની કન્યા પ્રાથમિક શાળામાં એક પ્રેરણાદાયી પ્રસંગ ઉજવાયો હતો. શાળાની ૨૩૧ દીકરીઓના સ્વાસ્થ્ય અને પોષણને ધ્યાનમાં રાખીને સ્થાનિક દાતાશ્રી મહેશભાઈ દયારામ લોદરીયા (સત્યમ સ્ટેશનરી એન્ડ ઝેરોક્ષ) દ્વારા ‘પ્રીતિ ભોજન’નું ભવ્ય આયોજન કરવામાં આવ્યું હતું. આ કાર્યક્રમ માત્ર ભોજનનો પ્રસંગ ન બની રહેતા સમાજ માટે દીકરીઓના ઉત્કર્ષ અને સ્વાસ્થ્ય પ્રત્યેની જાગૃતિનો સંદેશ બની રહ્યો હતો.
બાળપણમાં મળતું પૌષ્ટિક ભોજન બાળકના સર્વાંગી વિકાસનો પાયો છે. આ બાબતને સાર્થક કરતા દાતાશ્રીએ દીકરીઓને તાજું અને ગુણવત્તાયુક્ત ભોજન પીરસીને તેમની ઉદારતાનો પરિચય આપ્યો હતો. ભોજન દરમિયાન શાળાના પટાંગણમાં દીકરીઓના ચહેરા પરનો આનંદ અને ઉત્સાહ વર્તાતો હતો. શાળાના આચાર્યા ભાવનાબેન મકવાણાએ આ તકે જણાવ્યું હતું કે આવા સેવાકીય કાર્યોથી શાળામાં વિદ્યાર્થીઓની હાજરી અને ઉત્સાહમાં નોંધપાત્ર વધારો થાય છે જે અંતે બાળકના શૈક્ષણિક પરિણામો પર હકારાત્મક અસર કરે છે.
આ પ્રસંગે શાળા પરિવાર દ્વારા દાતાશ્રી મહેશભાઈ લોદરીયા તેમજ સહયોગી બિપીનભાઈ નવીનચંદ્ર જોષીનો હૃદયપૂર્વક આભાર વ્યક્ત કરવામાં આવ્યો હતો. સમાજમાં જ્યારે શિક્ષણ અને દીકરીઓના આરોગ્ય માટે વ્યક્તિગત સ્તરે આવા પ્રયાસો થાય છે ત્યારે તે બીજા અનેક સેવાભાવી લોકો માટે દીવાદાંડી સમાન બની રહે છે. ગુંદાલા ગામની દીકરીઓ પ્રત્યે દાતાઓએ દાખવેલી આ દિલેરી ખરા અર્થમાં સમાજસેવાનું ઉત્તમ ઉદાહરણ પૂરું પાડે છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
