Rajkot: સરકારી પોલીટેકનીક અને ‘MONK9’ ટેક પ્રાઈવેટ લીમીટેડ વચ્ચે એમ.ઓ.યુ. કરાર કરાયા
તા.૨૯/૧૧/૨૦૨૫
વાત્સલ્યમ્ સમાચાર
Rajkot: રાજકોટ સ્થિત સરકારી પોલીટેકનીક ખાતે રાજકોટની સેમીકંડકટર ટેકનોલોજી ક્ષેત્રમાં અગ્રણી ‘MONK9’ ટેક પ્રાઈવેટ લીમીટેડ અને પોલીટેકનીક આઈ.સી.ટી વિભાગ તથા આઈ.ટી. વિભાગ વચ્ચે એમ.ઓ.યુ. કરાર કરાયા હતા.
આ MOU કરાર અંતર્ગત ‘MONK9’ ટેક પ્રાઈવેટ લીમીટેડ પોલિટેકનીક સંસ્થાના વિદ્યાર્થીઓને સેમીકંડકટર ટેકનોલોજીને અંગે માર્ગદર્શન, ઇન્ટર્નશિપ, પ્રોજેકટ ગાઈડલાઈન્સ પુરા પાડવા સહિતની બાબતોમાં સહમત થઇ હતી. જેના અનુસંધાને સરકારી પોલિટેકનીક રાજકોટના આઈ.ટી., આઈ.સી.ટી., ઈલેકટ્રીકલ, મીકેનીકલ અને કેમીકલ વિભાગના વિદ્યાર્થીઓને અભ્યાસની સાથે ટ્રેનીંગ અને સ્ટાઇપેન્ડનો બહોળો લાભ પ્રાપ્ત થશે. MONK9 ટેક પ્રાઈવેટ લીમીટેડના ફાઉન્ડર તથા સી.ઈ.ઓ. શ્રી માર્મિક ભટ્ટે “From services to silicon: The Rise of the indian fabless startups” વિષય પર વ્યાખ્યાન આપ્યું હતું. તેઓએ વ્યાખ્યાનમાં સેમીકંડકટર ટેકનોલોજીનું ભારત માટે મહત્વ, વિદ્યાર્થીઓ માટે કારકિર્દીની તકો વિશે તેમજ સેમીકંડકટર ટેકનોલોજીની વિસ્તૃત માહિતી આપી હતી.
આ કાર્યક્રમમાં સંસ્થાના આચાર્યશ્રી ડો. એ.એસ.પંડ્યા, સંસ્થાના આઈ.સી.ટી.(ઈ.સી.) વિભાગના ઇન્ચાર્જ વડાશ્રી એચ.કે.પ્રજાપતિ, આઈ.ટી. વિભાગના ઇન્ચાર્જ વડાશ્રી એમ. ટી. વસા, વ્યાખ્યાતાઓ શ્રી એસ.જી. ચુડાસમા, શ્રી એ.આર. નાગરિયા, શ્રી એ.બી. મકવાણા, શ્રી એન.સી. દુતીયા તથા શ્રી પી. એન. કરગટિયા ઉપસ્થિત રહ્યા હતા.
