નર્મદા જિલ્લા કક્ષાના બાળ વૈજ્ઞાનિક પ્રદર્શન-૨૦૨૫નું ઉદ્ઘાટન કરતાં સાંસદ મનસુખભાઈ વસાવા
૪૫થી વધુ વિદ્યાર્થીઓએ રજૂ કરી વૈજ્ઞાનિક કૃતિઓ : નિષ્ણાંત જજીસે દરેક કૃતિનું ઝીણવટભર્યું અવલોકન અને તટસ્થ મૂલ્યાંકન કર્યુ
રાજપીપલા : જુનેદ ખત્રી
ભરૂચ લોકસભા સાંસદ મનસુખભાઈ વસાવાએ શ્રી નવદુર્ગા હાઈસ્કુલ, રાજપીપલા ખાતે ૨૭મીએ નર્મદા જિલ્લા કક્ષાના બાળ વૈજ્ઞાનિક પ્રદર્શન ૨૦૨૫ નું ઉદ્ઘાટન કરાવતાં જણાવ્યું કે, ભારતને વર્ષ ૨૦૪૭ સુધીમાં વિકસિત ભારત બનાવવા સમગ્ર દેશ અવિરત પ્રયત્નશીલ છે, અને આવનારી પેઢીના વિદ્યાર્થીઓની વૈજ્ઞાનિક દ્રષ્ટિ તેનું સૌથી મોટું હથિયાર છે. વધુમાં તેઓએ બાળકોને પ્રેરક માર્ગદર્શન પુરુ પાડ્યું હતું.
પ્રદર્શનમાં પ્રાથમિક શ્રેણીની ૨૫ તથા માધ્યમિક-ઉચ્ચતર માધ્યમિક શ્રેણીની ૨૦ એમ કુલ ૪૫ વૈજ્ઞાનિક કૃતિઓનું પ્રદર્શન કરવામાં આવ્યું હતું. જિલ્લાના ૧૫ વિષય નિષ્ણાંત તથા જજીસ દ્વારા દરેક કૃતિનું ઝીણવટભર્યું અવલોકન કરી વિદ્યાર્થીઓ પાસેથી સમજૂતી મેળવી તટસ્થ મૂલ્યાંકન કરાયું હતું.
ગુજરાત શૈક્ષણિક સંશોધન અને તાલીમ પરિષદ, ગાંધીનગરના માર્ગદર્શન હેઠળ જિલ્લા શિક્ષણ અને તાલીમ ભવન, રાજપીપળા, જિલ્લા શિક્ષણ અધિકારીની કચેરી નર્મદા, જિલ્લા પ્રાથમિક શિક્ષણ અધિકારીની કચેરી નર્મદા તથા બીઆરસી ભવન નાંદોદના સંયુક્ત ઉપક્રમે આ બાળ વૈજ્ઞાનિક પ્રદર્શન યોજાયો હતો.
