નર્મદા: ગુજરાતના પોલીસ વડા વિકાસ સહાયની અધ્યક્ષતામાં રાષ્ટ્રીય એકતા પરેડ અંગે સમીક્ષા બેઠક યોજાઈ
એકતાનગર ખાતે યોજાનાર બે દિવસીય કાર્યક્રમ દરમિયાન સુરક્ષા વ્યવસ્થા, ટ્રાફિક સંચાલન, આમંત્રિતતોને કાર્યક્રમ સ્થળ સુધી લઈ જવા તેમજ વાહન પાર્કિંગની વ્યવસ્થા અંગે જિલ્લા વહીવટ તંત્રના અધિકારીઓ સાથે જરૂરી ચર્ચા કરી
રાજપીપલા : જુનેદ ખત્રી
એકતા નગર ખાતે આગામી તારીખ ૩૦ અને ૩૧ મી ઓક્ટોબર -૨૦૨૫ના રોજ સરદાર સાહેબની ૧૫૦મી જન્મ જયંતિના અવસરે વડાપ્રધાન નરેન્દ્રભાઈ મોદીની ઉપસ્થિતિમાં રાષ્ટ્રીય એકતા દિવસની ભવ્ય ઉજવણી થનાર છે. જેના સંદર્ભે સુરક્ષા વ્યવસ્થાની કામગીરી અને વિવિધ સમિતીઓ દ્વારા કરવામાં આવી રહેલી પૂર્વ તૈયારીઓની સમીક્ષા અર્થે ગુજરાતના પોલીસ મહાનિર્દેશક શ્રી વિકાસ સહાયની અધ્યક્ષતામાં VVIP સર્કિટ હાઉસ એકતાનગરના કોન્ફરન્સ હોલમાં બેઠક યોજાઈ હતી.
એકતાનગર વીવીઆઈપી સર્કિટ હાઉસ ખાતે પોલીસ મહાનિર્દેશક વિકાસ સહાય આવી પહોંચતા ગાર્ડ ઓફ ઓનર સાથે પોલીસ જવાનો દ્વારા તેઓનું સ્વાગત કરવામાં આવ્યું હતું. બાદમાં પોલીસ વિભાગ, રેન્જ આઈજી સ્ટેચ્યૂ ઓફ યુનિટી અને જિલ્લા વહીવટી તંત્રના અધિકારીઓએ સ્વાગત કર્યું હતું.
આ બેઠક દરમિયાન પોલીસ મહાનિર્દેશક વિકાસ સહાયે રાષ્ટ્રીય એકતા દિવસની ઉજવણીમાં સહભાગી થનારા વીવીઆઈપીના રહેઠાણની આસપાસની સુરક્ષા વ્યવસ્થા અને સાફ-સફાઈની કાળજી રાખવા પર ખાસ ભાર મૂક્યો હતો. સાથે એકતા પરેડમાં પ્રદર્શિત થનાર ટેબ્લોની કામગીરી સત્વરે પૂર્ણ કરવા તથા આ કામગીરીનું સતત ઓબ્ઝર્વેશન થાય તે માટે જવાબદાર અધિકારીઓની નિમણૂંક કરવી, ટેબ્લો માટે બોલાવેલા ખાસ ડ્રાઈવર્સને લાવવા-પરત જવાની વ્યવસ્થા અને રહેઠાણ અંગે પણ જરૂરી ચર્ચા કરી હતી.
જિલ્લા પોલીસ અધિક્ષક વિશાખા ડબરાલ દ્વારા પાવરપોઈન્ટ પ્રેસન્ટેશનના માધ્યમથી તા. 30મી અને 31મી ઓક્ટોબર બંને દિવસની પોલીસ બંદોબસ્ત, સમગ્ર એકતાનગરની સુરક્ષા વ્યવસ્થા, આમંત્રિતોને કાર્યક્રમ સ્થળ સુધી લઈ જવા માટે કાર અને બસની સુવિધા, ટ્રાફિક મેનેજમેન્ટ, પાર્કીંગ અને વાહન વ્યવહારના રૂટ સહિતના આયોજન અંગેની વિગતવાર જાણકારી આપી હતી.
