નર્મદા : જમ્મુ-કાશ્મીરના મુખ્યમંત્રી ઓમર અબ્દુલ્લાએ સ્ટેચ્યુ ઓફ યુનિટીની મુલાકાત લીધી
જમ્મુ-કાશ્મીરના મુખ્યમંત્રી ઓમર અબ્દુલ્લાની ગુજરાત પ્રવાસ દરમિયાન નર્મદા જિલ્લામાં વિશ્વની સૌથી ઊંચી પ્રતિમા સ્ટેચ્યુ ઓફ યુનિટીની યાદગાર મુલાકાત
રાજપીપલા : જુનેદ ખત્રી
જમ્મુ-કાશ્મીરના મુખ્યમંત્રી ઓમર અબ્દુલ્લાએ પોતાના બે દિવસીય ગુજરાત પ્રવાસના અવસરે નર્મદા જિલ્લાના વૈશ્વિક પર્યટન સ્થળ સ્ટેચ્યુ ઓફ યુનિટી અને પ્રાકૃતિક સૌંદર્યનો નજારો અને મા નર્મદાના દર્શન કરી સરદાર સરોવર નર્મદા ડેમની મુલાકાત લઈ વિશાળ જળ રાશીના દર્શન સાથે ગુજરાતની પ્રગતિ અને ઇજનેરી કૌશલ્યની મુક્તમને પ્રસંશા કરી હતી.
મુખ્યમંત્રી ઓમર અબ્દુલ્લા સૌ પ્રથમ એકતાનગર હેલીપેડ ખાતે આવી પહોંચતા જિલ્લા વહીવટીતંત્રના ઉચ્ચ અધિકારીઓએ સ્વાગત કર્યુ હતું ત્યારબાદ સ્ટેચ્યુ ઓફ યુનિટી પરિસરમાં આવી પહોંચતાં SoUના મુખ્ય કારોબારી અધિકારી અમિત અરોરા, જિલ્લા કલેક્ટર એસ.કે.મોદી અને નાયબ વન સંરક્ષક અગ્નિશ્વર વ્યાસે આવકાર્યા હતાં.
જમ્મુ-કાશ્મીરના મુખ્યમંત્રીએ વિશ્વની સૌથી ઊંચી પ્રતિમા સ્ટેચ્યુ ઓફ યુનિટી નિહાળી પ્રભાવિત થઇને ગૌરવ સાથે કહ્યું કે, “આ સરદાર સાહેબે દેશ માટે કરેલા અવિસ્મરણીય કાર્યો માટેની આ સાચી શ્રદ્ધાંજલિ છે.” તેમણે વધુમાં જણાવ્યું કે, સરદાર વલ્લભભાઈ પટેલે દેશના એકીકરણ માટે જે દ્રષ્ટિકોણ અપનાવ્યો તે યુવા પેઢી માટે પ્રેરણારૂપ છે.
આ પ્રવાસ દરમિયાન મુખ્યમંત્રી સાથે જમ્મુ-કાશ્મીર રાજ્યનું પ્રતિનિધિ મંડળ પણ જોડાયું હતું. મુખ્યમંત્રીએ સ્ટેચ્યુ ઓફ યુનિટી પરિસરમાં પ્રવાસે આવેલા રાજસ્થાનના બિકાનેર નજીક ચુરુ ડિસ્ટ્રીક્ટમાંથી આવેલા પ્રવાસી વિજયભાઈ બોત્રા અને તેમના પરિવાર સાથે સંવાદ સ્થાપિત કરી વાતચીત કરી, ફોટોગ્રાફી કરાવી અને એસઓયૂની મુલાકાત અંગેના પ્રવાસીઓ પાસેથી તેમના અનુભવો અંગે પણ જાણકારી મેળવી હતી. મુખ્યમંત્રીએ સ્ટેચ્યુ ઓફ યુનિટી પરિસરના પ્રવાસે આવેલા શાળાના બાળકો-વિદ્યાર્થીઓ સાથે પણ હર્ષભેર સંવાદ સાધ્યો હતો.
સ્ટેચ્યુ ઓફ યુનિટી બાદ મુખ્યમંત્રીએ ગુજરાતની જીવાદોરી સમાન સરદાર સરોવર નર્મદા ડેમની પણ મુલાકાત લીધી હતી. નર્મદાના નીરથી ગુજરાતના રણ પ્રદેશ કચ્છ સહિત સુકી ધરા વિસ્તારોમાં પાણી પહોંચાડતી આ યોજના અંગે તેમણે અત્યંત ઉત્સાહ વ્યક્ત કર્યો હતો. તેમણે નર્મદા યોજનાને દેશમાં પાણી વ્યવસ્થાપનનું શ્રેષ્ઠ ઉદાહરણો પૈકી એક ગણાવતાં કહ્યું કે, “ગુજરાતે નર્મદા યોજના દ્વારા દેશને સૌંદર્ય, કૃષિ અને વિકાસની દિશામાં મજબૂત પાયો આપ્યો છે.”
