નરેશપરમાર. કરજણ,
કરજણમાંથી ૧.૯૨૦ કિલો ગાંજાના જથ્થા સાથે પેડલરની ધરપકડ
નશાકારક વનસ્પતિજન્ય માદક પદાર્થ ગાંજા સહિત કુલ કિ.રૂ.૫૦,૮૧૦/- ના મુદ્દામાલ સાથે એક ઇસમને ઝડપી પાડતી વડોદરા ગ્રામ્ય SOG
કરજણ પોલીસ મથકની હદમાંથી જિલ્લા એસઓજી ટીમે મોપેડની ડિકીમા ગાંજો લઇ પસાર થઇ રહેલા એક પેડલરને ઝડપી પાડી કાર્યવાહી હાથ ધરી છે. પોલીસે આરોપી પાસેથી ૧.૯૨૦ કિલો ગાંજાનો જથ્થો, મોપેડ સહિત રૂપિયા ૫૦ હજાર ઉપરાંતનો મુદ્દામાલ કબજે કર્યો છે. જ્યારે આ જથ્થો આપનાર આરોપીને વોન્ટેડ જાહેર કરી તેની ઘરપકડના ચક્રો ગતિમાન કર્યા છે. જિલ્લામાં નશાખોરો પર લગામ ક્સવા માટે સ્પેશિયલ ઓપરેશન ગ્રુપ દ્વારા સતત પેટ્રોલીંગ કરવામાં આવે છે. ગ્રામ્ય સ્પેશિયલ ઓપરેશન ગ્રુપના પીઆઈ જે.એમ. ચાવડાની સુચના મુજબ પીએસઆઈ એચ.એમ. જાળીયા, પીએસઆઈ એ.ઓ. ભરવાડ તથા સ્ટાફના એએસઆઇ ફરકાન ઇબ્રાહિમ, પ્રદિપભાઇ, નરવતસિહ, મુકેશભાઈ અને અનાર્મ હેડ કોન્સ્ટેબલ લાલજીભાઈ કરજણ પોલીસ મથક વિસ્તારમાં પેટ્રોલીંગમાં હતી. દરમિયાન એક શંકાસ્પદ મોપેડ ઉપર પસાર થઇ રહ્યું હતું. તેને ઉભો રાખી મોપેડની ડિકીમાં તપાસ કરતાં તેમાંથી ૧.૯૨૦ કિલો ગાંજો મળી આવ્યો હતો. પોલીસે આરોપી શકીલ ઇકબાલભાઇ મલેક (રહે. બ્રાહ્મણ ફળિયું, કણભા, કરજણ)ની ધરકપકડ કરી તપાસ હાથ ધરી હતી. પકડાયેલા શકીલ પાસેથી પોલીસે ગાંજો, એક્ટીવા, મોબાઇલ, રોકડા, ઇલેક્ટ્રીક વજન કાંટો, અને બેગ મળી રૂપિયા ૫૦,૮૧૦ નો મુદ્દામાલ કબજે કર્યો હતો. પોલીસે આરોપીની ગાંજાના જથ્થા અંગે પૂછપરછ કરતા તેણે આ જથ્થો વિનોદ નામના વ્યક્તિ પાસેથી લાવ્યો હોવાનું જણાવ્યું હતું. પોલીસે તેણે વોન્ટેડ જાહેર કરી તેની ધરપકડના ચક્રો ગતિમાન કર્યા છે. આ બનાવ અંગે એસઓજીએ કરજણ પોલીસ મથકમાં એનડીપીએસ એક્ટ અંતર્ગત ગુનો દાખલ કરાવ્યો હતો. આ મામલાની વધુ તપાસ શિનોર પોલીસ મથકના પીઆઇને સોંપવામાં આવી છે. તપાસ દરમિયાન ચોકાવનારી વિગતો બહાર આવે તેવી શક્યતાઓ છે.
