Rajkot: દિવ્યાંગ બાળકોના સશક્તિકરણ અર્થે રાજકોટમાં યોજાશે “પર્પલ ફેર – ૨૦૨૫”
તા.૨૭/૧૧/૨૦૨૫
વાત્સલ્યમ્ સમાચાર
ચિત્ર સ્પર્ધા સહિત ૧૭૦ થી વધુ વિશેષ બાળકો સાંસ્કૃતિક કાર્યક્રમમાં પ્રતિભાનું પ્રદર્શન કરશે
Rajkot: ગુજરાતમાં પ્રથમ વખત રાજકોટ શહેરમાં એક અનોખો અને સમાવેશક કાર્યક્રમ “પર્પલ ફેર ૨૦૨૫” યોજાવા જઈ રહ્યો છે. સમકિત ક્ષેત્રિય કેન્દ્ર કૌશલ્ય વિકાસ, પુનર્વસન તથા દિવ્યાંગજન સશક્તિકરણ માટે કાર્યરત સી.આર.સી. અમદાવાદ, દિવ્યાંગજન સશક્તિકરણ વિભાગ, સામાજિક ન્યાય અને સશક્તિકરણ મંત્રાલય, ભારત સરકારના સહયોગથી આગામી તા. ૨૯ નવેમ્બરના રોજ પ્રયાસ પેરેન્ટ્સ એસોસિએશન, સરોજિની નાયડુ ગર્લ્સ હાઇસ્કૂલ પરિસર,કૃષ્ણનગર રોડ,રાજકોટ ખાતે કાર્યક્રમ યોજાશે.
કાર્યક્રમના મુખ્ય અતિથિ તરીકે સાંસદશ્રી પુરુષોતમ રૂપાલા, શ્રીમતી પુજા પટેલ (ઈ.સી. મેમ્બર, આર.સી.આઈ., દિલ્હી તેમજ ડાયરેક્ટર, પ્રયાસ પેરેન્ટ્સ એસોસિએશન, રાજકોટ) ડો. અજિત કુમાર (ડાયરેક્ટર, સી.આર.સી.,અમદાવાદ), શ્રી રાજેન્દ્રકુમાર પરમાર (પ્રોગ્રામ કો-ઓર્ડીનેટર) તેમજ રાજકોટ જિલ્લાની દિવ્યાંગ ક્ષેત્રે કાર્ય કરતી ૧૨ સંસ્થાઓ સહીત દિવ્યાંગ બાળકો, દિવ્યાંગ બાળકોના માતાપિતા કાર્યક્રમમાં ઉપસ્થિત રહેશે.
આ મેળાનો મુખ્ય હેતુ દિવ્યાંગ બાળકો અને તેમના પરિવારજનોને સશક્ત બનાવવા, સમાજમાં જાગૃતિ ફેલાવવી અને તેમને એક મંચ પર લાવવાનો હોવાનું આયોજક શ્રી પૂજા પટેલે જણાવી આ કાર્યક્રમમાં ૧૭૦ થી વધુ વિશેષ બાળકો વિવિધ સાંસ્કૃતિક કાર્યક્રમોમાં ભાગ લેશે અને પોતાની પ્રતિભાનું પ્રદર્શન કરશે, તેમ જણાવ્યું હતું. સાથે બાળકો માટે વિશેષ ચિત્ર સ્પર્ધાનું પણ આયોજન કરવામાં આવ્યું હોવાનું જણાવ્યું છે.
મેળા દરમિયાન દિવ્યાંગજન સંબંધિત માહિતી આપવા માટે વિવિધ માહિતી સ્ટોલ રહેશે, જ્યાં સરકારની યોજનાઓ, સેવાઓ અને પુનર્વસન સુવિધાઓ વિશે માર્ગદર્શન આપવામાં આવશે. ઉપરાંત, જનજાગૃતિ ફેલાવવા માટે વિશેષ જાગૃતિ સ્ટોલ પણ રહેશે. કાર્યક્રમના વિશેષ આકર્ષણ તરીકે દિવ્યાંગ બાળકોના માતા-પિતાઓ દ્વારા ફૂડ સ્ટોલ્સનું આયોજન કરવામાં આવી રહ્યું છે, જેનાથી આત્મનિર્ભરતા અને સ્વરોજગારને પ્રોત્સાહન મળશે.
આ તકે સી.આર.સી. અમદાવાદ સંસ્થા દ્વારા રાજકોટના નાગરિકો, શિક્ષકો, વાલીઓ, સામાજિક સંસ્થાઓ અને તમામ હિતધારકોને આ મહત્ત્વપૂર્ણ કાર્યક્રમમાં ભાગ લેવા માટે ભાવભર્યું આમંત્રણ પાઠવ્યું છે.
