તા.૪/૪/૨૦૨૫
વાત્સલ્યમ્ સમાચાર
હીટસ્ટ્રોકનાં લક્ષણ જણાય તો નજીકના આરોગ્ય કેન્દ્રનો તાત્કાલિક સંપર્ક કરવો
Rajkot: ઉનાળાની કાળઝાળ ગરમીમાં સાયલન્ટ ડિઝાસ્ટર હીટવેવથી માનવજીવન ખૂબ જ પ્રભાવિત થાય છે. ગુજરાતના નાગરિકો ઉનાળાની ગરમીમાં પરિવારને હીટવેવની વિપરીત અસરોથી બચાવી શકે, તે માટે રાહત કમિશનરની કચેરી દ્વારા હિટવેવ માટે માર્ગદર્શિકા જાહેર કરવામાં આવી છે. જેમાં ઉનાળામાં હીટવેવની સંભવિત અસરોને નિવારીને રક્ષણ મેળવી શકાય, તે અર્થે માર્ગદર્શિકામાં હીટવેવના લક્ષણો અને તેનાથી બચવાના ઉપાયો દર્શાવવામાં આવ્યા છે.
લૂ અથવા હીટસ્ટ્રોકથી બચવાના ઉપાય
પુષ્કળ પ્રમાણમાં ઠંડુ પાણી, લીંબુ શરબત, છાશ, તાડફળી, નારીયેળનું પાણી, ખાંડ-મીઠાનું દ્રાવણ અને ઓ.આર.એસ. જેવા પ્રવાહીનું સેવન કરવું જોઈએ.
નાગરીકોએ વધુ પડતો શ્રમ ટાળવો અને શક્ય હોય ત્યાં સુધી તડકામાં ફરવાનું પણ ટાળવું જોઈએ.
ભરબપોરે કામ પર જતા સમયે થોડો સમય છાયડામાં આરામ કરવો જોઈએ.
ઠંડક માટે માથા પર ઠંડુ ભીનું કપડું રાખવું અને શ્રમિકોએ કામના સમયે ઉઘાડા શરીરે ફરવું નહીં.
ઉપવાસ કરવાનું ટાળવું જોઈએ.
મંદિર, મસ્જિદ, થિયેટર, શોપીંગ મોલ જેવા ઠંડકવાળા સ્થળોએ જવું જોઈએ.
ઘર, ઓફીસ અથવા અન્ય કામ કરવાના સ્થળોએ પંખા, કુલર તેમજ એ.સી.નો ઉપયોગ કરવો જોઈએ.
સગર્ભા, બાળકો, વૃદ્ધો તેમજ અશક્ત અને બીમાર વ્યકિતઓનું ખાસ ધ્યાન રાખવું જોઈએ.
હીટવેવ દરમિયાન શક્ય હોય ત્યાં સુધી બહાર નીકળવાનું ટાળવું જોઈએ.
બહાર નીકળતા સમયે આખું શરીર અને માથું ઢંકાય તેવા સફેદ-સુતરાઉ અને ખુલ્લા કપડાં પહેરવા જોઈએ.
બહાર નીકળતી વખતે ટોપી, ચશ્માં અને છત્રીનો ઉપયોગ કરવો જોઈએ.
હીટવેવની આગાહીના દિવસોમાં બપોરે બે વાગ્યાથી સાંજે ચાર વાગ્યા સુધીમાં બહાર નીકળવાનું ટાળવું જોઈએ.
બાળકો માટે કેસુડાનાં ફુલ તથા લીમડાના પાનનો નાહવાના પાણીમાં ઉપયોગ કરવો જોઈએ.
બજારમાં મળતો ખુલ્લો, વાસી ખોરાક ખાવો નહી, બજારમાં મળતા બરફનો ઉપયોગ પણ ટાળવો જોઈએ.
લગ્ન પ્રસંગે દૂધ-માવાની બનાવેલી વાનગીઓ ખાવી નહી.
ચા-કોફી અને દારૂના સેવનથી લૂ લાગવાની શક્યતા વધે છે. તેથી, તેનું સેવન ટાળવું જોઈએ.
ઘરની છત પર સફેદ રંગ, સફેદ ચૂનો અથવા સફેદ ટાઇલ્સ લગાવવી, જે ઘરનું તાપમાન ઘટાડશે.
લૂ લાગવાના લક્ષણો*
માથું દુ:ખવું, પગની પીંડીઓમાં દુઃખાવો થવો
શરીરનું તાપમાન વધી જવું
ખૂબ તરસ લાગવી
શરીરમાંથી પાણી ઓછું થઈ જવું
વધુ તાવ આવવો
ગરમ અને સૂકી ત્વચા
નાડીના ધબકારા વધવા
ઉલ્ટી થવી, ઉબકા આવવા
ચકકર આવવા, આંખે અંધારા આવવા
બેભાન થઈ જવું
સુધબુધ ગુમાવી દેવી
અતિ ગંભીર કિસ્સામાં ખેંચ આવવી
હીટવેવની આગાહી દરમિયાન આવા લક્ષણ કોઈ પણ વ્યક્તિમાં જણાય તો તાત્કાલીક નજીકના ડોક્ટર, આરોગ્ય કેન્દ્ર અથવા સરકારી દવાખાનાનો સંપર્ક કરવો જોઈએ. આપાતકાલીન સ્થિતિમાં ૧૦૮ એમ્બ્યુલન્સને ફોન કરવો જોઈએ.
