તા.૨૭/૧૧/૨૦૨૫
વાત્સલ્યમ્ સમાચાર
ગ્રાહકોના ફીડબેકથી મને અને ખેડૂતોને પ્રોત્સાહન મળે છે: સંચાલક યશ પટેલ
Rajkot: રાજકોટ શહેર અને જિલ્લામાં પ્રાકૃતિક કૃષિનાં ઉત્પાદનોની માંગ વધી રહી છે. પ્રાકૃતિક કૃષિ અનેક રીતે ફાયદાકારક હોવાનું નિષ્ણાતો કહે છે. હવે શાકભાજી તાજા અને કેમિકલમુક્ત મળે તે ગૃહિણીઓની પ્રાથમિકતા બની રહી છે. આવી જ રીતે અનાજ હોય કે મસાલા, ફળ હોય કે કઠોળ, અનેક પરિવારો પોતાના ઘરમાં રાસાયણિક ખેતીના ઉત્પાદનને “ના” કહી પ્રાકૃતિક કૃષિ પેદાશોની ખરીદી કરી રહ્યા છે.
રાજકોટના ૧૫૦ ફૂટ રીંગ રોડ, બિગ બજાર પાસે આવેલા ‘સમય નેચરલ ઓર્ગેનિક માર્ટ’ ગ્રાહકો માટે પ્રાકૃતિક ખેતીથી ઉત્પાદિત વસ્તુઓની ખરીદી માટેનું વિશ્વાસપાત્ર સ્થળ બન્યું છે. સ્ટોરના સંચાલક યશ પટેલ કહે છે કે, સમય નેચરલમાં અમે શાકભાજી, ફ્રૂટ્સ, અનાજ, કઠોળ સહિત વસ્તુઓ જે પ્રાકૃતિક કૃષિથી ઉત્પાદિત થઈ હોય તે વેચીએ છીએ. શરૂઆતમાં તેના વેચાણમાં ખૂબ મુશ્કેલી થતી, પરંતુ અત્યારે ગ્રાહકો રસાયણમુક્ત વસ્તુઓને પ્રાથમિકતા આપી પૂરતી કિંમત આપીને પ્રાકૃતિક વસ્તુઓ ખરીદે છે.
શ્રી યશભાઈ પટેલે કહ્યું કે, નાગરિકોને સારી વસ્તુઓ તેમજ ખેડૂતોને પ્રોત્સાહન મળે તે ખૂબ જરૂરી છે. સાત વર્ષથી કાર્યરત આ સ્ટોર રસાયણમુક્ત ઉત્પાદનોનું વેચાણ કરતો સ્ટોર છે. ગ્રાહકોના સારા ફીડબેકથી મને અને ખેડૂતોને પ્રોત્સાહન મળે છે. પ્રાકૃતિક ખેત ઉત્પાદિત વસ્તુઓની મીઠાશ અનેરી હોય છે. પ્રાકૃતિક કૃષિનું માર્કેટ વધી રહ્યું છે, જે સમાજ તથા ખેડૂતો માટે ખૂબ સારી બાબત છે.
ગાયનું ઘી, શાકભાજી, સીઝનલ ફ્રૂટ્સ, કઠોળ, અનાજ, મસાલા, હર્બલ વસ્તુઓ સહિતની વસ્તુઓનું વેચાણ કરતા યશભાઈ પ્રાકૃતિક કૃષિથી ઉત્પાદિત વસ્તુઓના વેચાણ તરફ આગળ વધવા ઈચ્છતા યુવાનો માટે પ્રેરણારૂપ બન્યા છે.
રાજકોટના અંકિતભાઈ પીપરીયાએ છેલ્લા પાંચ વર્ષથી પોતાના ઘરનું રસોડું રસાયણમુક્ત બનાવ્યું છે. અંકિતભાઈએ કહ્યું કે, પ્રાકૃતિક વસ્તુઓની સરખામણીએ રસાયણયુક્ત વસ્તુઓનો સ્વાદ તો ફીક્કો હોય જ છે ઉપરાંત તે આપણા આરોગ્ય માટે પણ નુકસાનકારક છે. અત્યારની જનરેશન જો પ્રાકૃતિક વસ્તુઓ તરફ વળશે તો તેઓ ફીટ રહી શકશે. રસાયણમુક્ત આહાર ખૂબ જરૂરી છે, માટે નેચરલ પ્રોડક્ટ અપનાવવી અનિવાર્ય છે. સ્ટોર પર ખરીદી કરવા આવેલા અન્ય એક ગ્રાહક મીનાબહેન ચનિયારાએ પ્રાકૃતિક કૃષિ અભિયાનને આવકાર્યું હતું. શ્રી મીનાબહેને પોતાની વાતમાં ઉમેર્યું કે, મારા બાળક માટે ફ્રૂટ્સ હોય કે ઘરનું રાશન હોય, હું રસાયણ વગરની વસ્તુઓ ખરીદવા ટેવાયેલી છું. કેમિકલયુક્ત વસ્તુઓ આપણા આરોગ્ય માટે સારી નથી. દરેક નાગરિકે પ્રાકૃતિક કૃષિથી ઉત્પાદિત વસ્તુઓની ખરીદી કરી ખેડૂતોને પ્રોત્સાહન આપવું જોઈએ.
આમ, રાજકોટ સહિત રાજ્યભરમાં પ્રાકૃતિક કૃષિના વેચાણને પ્રોત્સાહન મળી રહ્યું છે, જેથી વધુને વધુ ખેડૂતો આ પદ્ધતિ અપનાવી રહ્યા છે.
