રિપોર્ટ : પુજા ઠક્કર, મુંદરા – કચ્છ.
ટેટ પરીક્ષાની તારીખ લંબાવવા અને કચ્છને કેન્દ્ર ફાળવવા મુખ્યમંત્રીશ્રીને વિનંતી
રતાડીયા,તા.30 : કચ્છના વિદ્યાર્થીઓ અને વાલીઓ વતી માનનીય મુખ્યમંત્રીશ્રીને શિક્ષક યોગ્યતા કસોટી (ટેટ) પરીક્ષાની તારીખ લંબાવવા અને પરીક્ષા કેન્દ્ર કચ્છ જિલ્લામાં જ ફાળવવા માટે આવેદનપત્ર આપવામાં આવ્યું છે.
આવેદનપત્રમાં રજૂઆત કરવામાં આવી છે કે તાજેતરમાં કચ્છ જિલ્લામાં રાજય પરીક્ષા બોર્ડ દ્વારા એસ.એસ.ઈ. અને પી.એસ.ઈ.ની બોર્ડની પરીક્ષાઓ સફળતાપૂર્વક યોજાઈ હતી જેમાં 5469 જેટલા વિદ્યાર્થીઓએ કોઈ પણ વિઘ્ન વિના ભાગ લીધો હતો. આ સફળ આયોજન પરથી સ્પષ્ટ સાબિત થાય છે કે કચ્છનું જિલ્લા શિક્ષણ તંત્ર મોટી રાજ્યસ્તરીય પરીક્ષાઓનું આયોજન કરવા માટે પૂરતી વ્યવસ્થા, માનવીય સંસાધન અને વહીવટી ક્ષમતા ધરાવે છે.
હાલમાં ટેટ પરીક્ષાની સંભવિત તારીખ ૨૧ ડિસેમ્બર જાહેર કરવામાં આવી છે જે ઉમેદવારો તેમજ વહીવટી તંત્ર બંને માટે તૈયારી કરવા માટે અત્યંત ટૂંકો સમયગાળો છે. આ સમયગાળામાં પૂરતી તૈયારી કરવી મુશ્કેલ છે. જો આ પરીક્ષાની તારીખ બે મહિના પાછળ લંબાવવામાં આવે તો ભરતી પ્રક્રિયાનું આયોજન સુવ્યવસ્થિત રીતે થઈ શકે છે. તારીખ લંબાવવાથી વેકેશન દરમિયાન શિક્ષકોની જિલ્લા બદલીઓ સરળતાથી થઈ શકશે અને નવું શૈક્ષણિક સત્ર શરૂ થાય ત્યાં સુધીમાં એટલે કે જૂન-જુલાઈમાં શાળાઓમાં વિદ્યાર્થીઓને ભણાવવા માટે પૂરતા સંખ્યામાં શિક્ષકો ઉપલબ્ધ થઈ શકશે. આ ઉપરાંત આગામી પંદર દિવસોમાં જ્ઞાન સહાયક દ્વારા બાકી રહેલી જગ્યાઓ ભરવાની હોવાથી હાલના શૈક્ષણિક કાર્યમાં કોઈ વિક્ષેપ પડવાનો પ્રશ્ન રહેતો નથી.
આથી વિદ્યાર્થીઓ અને વાલીઓ વતી રતાડીયા જલારામ સખી મંડળના પ્રમુખ તિતિક્ષાબેન પ્રકાશચંદ્ર ઠક્કર દ્વારા સરકારશ્રીને વિનંતી કરવામાં આવી છે કે તેઓ શિક્ષણના હિતમાં અને પરીક્ષાર્થીઓના ભવિષ્યને ધ્યાનમાં રાખીને ટેટ પરીક્ષાની તારીખ લંબાવવાનો અને પરીક્ષા કચ્છ જિલ્લામાં જ યોજવાનો યોગ્ય નિર્ણય લે. શિક્ષણ પ્રત્યે હંમેશા સંવેદનશીલ નિર્ણય લેનાર ગુજરાત સરકાર વિદ્યાર્થીઓના હિતમાં વધુ એક વખત સાનુકૂળ નિર્ણય લે તેવી લોકો અપેક્ષા રાખી રહ્યા છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
