“CCRS”ની અમલવારી અને માર્ગ સંબંધિત ફરિયાદોના તાત્કાલિક નિકાલ માટે નવસારી મહાનગરપાલિકાના મહત્વપૂર્ણ પગલાં…
વાત્સલ્યમ સમાચાર
મદન વૈષ્ણવ
ગુજરાત ભરમા પડી રહેલા ભારે વરસાદના પગલે મોટાભાગના વિસ્તારોમાં અનેક રસ્તાઓ- પુલ ક્ષતિગ્રસ્ત બન્યા છે. આ રસ્તા-પુલનું તાત્કાલિક ધોરણે સમારકામ કરવા મુખ્યમંત્રી ભુપેન્દ્રભાઈ પટેલે માર્ગ અને મકાન વિભાગ,નગરપાલિકા અને મહાનગરપાલિકાઓને કડક સૂચના આપી હતી જેને લઈ હાલમાં રોડ રસ્તા રિપેર,ચકાસણી તથા અન્ય ગુણવત્તાવર્ધક કામગીરીઓ રાજ્યભરમાં યુદ્ધના ધોરણે ચાલી રહી છે. નવસારી મહાનગરપાલિકા દ્વારા મુખ્યમંત્રીશ્રી ભુપેન્દ્રભાઈ પટેલના માર્ગદર્શન તથા મ્યુનિસિપલ કમિશનરશ્રી દેવ ચૌધરી ના નેતૃત્વમાં નાગરિક સુવિધાઓના ઝડપી નિકાલ અને માર્ગ સંબંધી સમસ્યાઓના ઝડપી સમાધાન માટે મહત્વપૂર્ણ પગલાં લેવામાં આવ્યા છે. ૮ જુલાઈ ૨૦૨૫ના રોજ “CCRS – Comprehensive Complaint Redressal System” અંતર્ગત ખાસ કામગીરીનો આરંભ કરવામાં આવ્યો હતો. જે મુજબ CCRS અંતર્ગત નાગરિકોને તેમની આસપાસની રસ્તાની ખામી કે ખાડા અંગે તાત્કાલિક ફરિયાદ નોંધાવવા માટે વોટ્સએપ હેલ્પલાઇન નંબર (૮૭૯૯૨ ૨૩૦૪૬) જાહેર કરવામાં આવ્યો છે. નાગરિકો પોતાનું લોકેશન સાથેનો ફોટો મોકલી શકે છે. આ વ્યવસ્થાના અમલ પછી, સરેરાશ રોજે ૮૦ જેટલી ફરિયાદો મળતી હોય છે. મહાનગરપાલિકા દ્વારા તેમાંથી અંદાજે ૮૫% ફરિયાદો એજ દિવસે પૂર્ણ કરી દેવામાં આવતી હોય છે. જયારે બાકી રહેતી ફરિયાદોનો ૨૪ કલાકની અંદર નિવારણ કરવામાં આવી રહ્યો છે. વરસાદ ન હોય ત્યારે પેચ વર્કના કામ (થોડા અંશે ડામર તથા કોલ્ડ મિક્સથી) નિયમિતપણે હાથ ધરવામાં આવી રહ્યા છે જેથી ખાડાઓનો ઝડપી નિકાલ થાય અને જનતા સુરક્ષિત મુસાફરી કરી શકે. આ કામગીરી માટે વિશિષ્ટ મોબાઈલ ટીમ પણ ગઠિત કરવામાં આવી છે. જાહેર જનતાના વોટ્સએપ દ્વારા મળતા પ્રતિસાદને વધુ કાર્યક્ષમ બનાવવા માટે, ૯ જુલાઈ ૨૦૨૫ ના રોજ NMC Connect એપમાં “Road Demand Request” નામની નવી ફીચર ઉમેરી છે. આ ફીચર દ્વારા નાગરિકો સરળતાથી તેમના વિસ્તારમાં રસ્તાની જરૂરિયાત કે માંગ નોંધાવી શકે છે. આ માહિતી સીધા CCRS પોર્ટલ સાથે સંકળાયેલ હોવાથી, તાત્કાલિક સમીક્ષા કરી કામગીરી શરૂ કરી શકાય છે.નવસારી મહાનગરપાલિકા આધુનિક ટેકનોલોજીના સહારે રીસ્પોન્સ ટાઈમ ઘટાડવા તેમજ નાગરિકોની અસુવિધા દૂર કરવા સતત પ્શીલ છે.
