વાત્સલ્યમ સમાચાર
મદન વૈષ્ણવ
ડાંગ જિલ્લાનાં સુબીર તાલુકાનાં કેસબંધ ગામ ખાતે સરકારી બોરમાં મોટર નાખી વેપલો કરનાર સામે ગ્રામજનોએ ફરિયાદ કરી હતી જેને લઈને અખબારમાં અહેવાલ પ્રસિદ્ધ કરવામાં આવ્યો હતો. ત્યારે અહેવાલ પ્રસિદ્ધ થતા વહીવટી તંત્ર દ્વારા સરકારી બોરમાંથી મોટર કાઢી લઈ હેન્ડપંપ ફીટ કરવામાં આવેલ છે. જેને લઈને ગ્રામજનોમાં ખુશી જોવા મળી રહી છે.સુબીર તાલુકાના કેસબંધ ગામે નીચલા ફળિયામાં હાલ 30 જેટલા ઘરો આવેલા છે અને તેમાં આશરે 125 જેટલા લોકો વસવાટ કરે છે. આ નીચલા ફળિયામાં રહેતા ઈસમ ઉંમરસીંગભાઈ તાન્યાભાઈ ઠેંગળના સર્વે નંબર-81 વાળા ખેતરમાં પાણી પુરવઠા કચેરી,આહવા દ્વારા આજથી આશરે 6 વર્ષ પહેલા સરકારી બોરવેલ કરીને તેમાં હેડપંપ નાંખવામાં આવેલ હતો અને તેમાંથી પુરા ગામને પાણી મળી રહેતુ હતુ.પરંતુ આ બોરવેલમાં છેલ્લા 5 વર્ષથી ગામના આ નીચલા ફળિયામાં રહેતા ઈસમ ઉમરસીંગભાઈ તાન્યાભાઈ ઠેંગળ દ્વારા આ હેડપંપ કાઢી નાંખીને તેમાં મોટર પંપ નાંખી પોતાની ખેતી કરતા હતા. અને પાણીના ટેન્કર મારફતે ગામમાં આશરે 200/- રૂપિયાનું ટેન્કરદીઠ પાણી વેચાણ કરી ધંધો કરતા હતા .અને આ ટેન્કરવાળા ગામમાં આશરે રૂા.800/- રૂપિયાનું લોકોને પાણીનું વેચાણ કરતા હતા. અને આ તે રીતે ગામમાં પાણીની વિકટ સમસ્યા ઉભી થતી જોવા મળી હતી.અને આ ઇસમ દ્વારા સરકારી સંપતિનો નાશ કરીને, સરકારી બોરવેલમાંથી ખેતી અને ધંધો કરી ગામના લોકોનું હાલે શોષણ કરી રહ્યા હતા.આ બાબતે ગામના સરપંચ તથા આગેવાનો અને અગ્રણીઓએ પણ આ નીચલા ફળિયામાં રહેતા ઈસમ ઉંમરસીંગભાઈ તાન્યાભાઈ ઠેંગળને વારંવાર આ બાબતે રજૂઆત કરીને જણાવેલ છે કે, આ મોટર કાઢી લો અથવા ગામના લોકોને જરૂરીયાત મુજબ મફતમાં પાણી મળે તે માટે વ્યવસ્થા કરો.પરંતુ તે બાબતે આ ઈસમ એકના બે થવા તૈયાર નહોતા. અને કહતા હતા કે, આ મારી જમીનમાં મારો બોર છે આમાં કોઈએ પણ મારી મોટર કાઢીને બીજી મોટર નાંખવી નહી અને હું તમને કોઈને પાણી પણ આપવાની નથી. તમારાથી થાય તે કરી લેવાની ધાકધમકીઓ આપતા હતા.જેથી પાણી પુરવઠા વિભાગનાં નાયબ કાર્યપાલક ઇજનેર દ્વારા આ ફરિયાદના આધારે યોગ્ય કાર્યવાહી કરવામાં આવે તેવી માંગ સ્થાનિકો દ્વારા કરવામાં આવી હતી.ત્યારે આ સમગ્ર મામલે અખબારમાં અહેવાલ પ્રસિદ્ધ કરવામાં આવ્યો હતો જે બાદ વહીવટી તંત્ર દ્વારા તાત્કાલિક ધોરણે કામગીરી કરવામાં આવી હતી.જેમાં સરકારી બોર માંથી મોટર કાઢી લઈ બોરિંગ પંપ બેસાડી દેવામાં આવેલ છે જેને લઇને સ્થાનિકોમાં ખુશી અને રાહત જોવા મળી રહી છે..
