વાત્સલ્યમ સમાચાર
મદન વૈષ્ણવ
*વર્તમાન સરકારે પ્રજાની તકલીફને સમજીને તેના નિવારણરૂપ વિવિધ યોજનાઓ ઘડી ગ્રામ્યજીવનને વિકાસનો મોકળો માર્ગ પ્રદાન કર્યો છે.-નાણામંત્રી કનુભાઇ દેસાઇ*
*બ્રિજના નિર્માણથી પીપલગભાણ, આમધરા, મોગરાવાડી, ધોલાર, રૂમલા ૫ જેટલા ગામોની આશરે ૨૪૬૭૨ની વસ્તીને વાહનવ્યવહાર માટે સરળતા રહેશે*
નવસારી,તા.૨૯: આજરોજ નાણામંત્રીશ્રી કનુભાઈ દેસાઈના વરદ હસ્તે ચીખલી તાલુકા આમધરા ગામ ખાતે ખરેરા નદી પરના અંદાજિત ૧૦ કરોડના ખર્ચે નવનિર્મિત મેજર બ્રિજનું લોકાર્પણ કરાયું હતું.
નાણાં,ઊર્જા અને પેટ્રોકેમિકલ્સના વિભાગના કેબિનેટ મંત્રીશ્રી કનુભાઈ દેસાઈએ આ પ્રસંગે ગ્રામજનોને અભિનંદન પાઠવતા જણાવ્યું હતું કે, તત્કાલીન મુખ્યમંત્રીશ્રી નરેન્દ્રભાઇ મોદીએ ગુજરાતના વિકાસ કાર્યોનું સુકાન સંભાળ્યું હતું. તેમના બાદ મુખ્યમંત્રી આનંદીબેન પટેલ, સ્વ.વિજયભાઇ રૂપાણી, અને ત્યાર બાદ ભુપેન્દ્રભાઇ પટેલ દ્વારા ગુજરાતના વિકાસ કાર્યોને આગળ ધપાવ્યા છે. તે સમયે શરૂ કરવામાં આવેલ મુખ્યમંત્રી સડક યોજનામાં રોડ રસ્તાઓ માટે દરેક બજેટમાં અંદાજીત 10 હજાર કરોડ ફાળવવામાં આવે છે. આજે ખરેરા નદીના બ્રિજનું લોકાર્પણ કરતી વેળા નવસારી જિલ્લા તંત્ર અને ગુજરાત સરકાર બન્ને અભિનંદનને પાત્ર છે. જેમણે પ્રજાની તકલીફને સમજીને તેના નિવારણરૂપ વિવિધ યોજનાઓ ઘડી ગ્રામ્યજીવનને વિકાસનો મોકળો માર્ગ પ્રદાન કર્યો છે.
મંત્રીશ્રીએ આ સાથે નલ સે જલ યોજના, જ્યોતિગ્રામ યોજના, આદિવાસી બાંધવો અને સાગર ખેડુઓને સ્પર્સતી વિવિધ યોજનાઓના મધ્યમથી નાગરિકોના જીવનમા આવેલ સકારાત્મક પરિવર્તન અંગે પણ ચર્ચા કરી હતી.અને અંતે લોકોની સમસ્યાઓના નિવારણ માટે આપણે સૌએ સહિયારા પ્રયાસ કરવા જોઇએ એમ અનુરોધ કર્યો હતો.
આ પ્રસંગે લોકસભા દંડક અને વલસાડ સાંસદ ધવલભાઇ પટેલે પ્રાસંગિક ઉદબોધન કરતા જણાવ્યું હતું કે, લોકોને વિકાસ માર્ગે લઇ જવા રોડ રસ્તાની કનેકટીવીટી આપવી ગુજરાત સરકારનું પ્રાધાન્ય રહ્યું છે. તેમણે આજે લોકાર્પણ થયેલા બ્રિજ પણ આ વિસ્તારનો વિકાસ માર્ગ બનશે એમ જણાવ્યું હતું.
કાર્યક્રમમાં ગણદેવી ધારાસભ્ય નરેશભાઇ પટેલે ગ્રામજનોને અભિનંદન પાઠવી આ રસ્તા સાથે સંકળાયેલા પોતાના નાનપણના દિવસોની તકliફ ભરી સ્મૃતિ વર્ણવી હતી. ત્યાર બાદ તેમણે મંત્રીશ્રી કનુભાઇ દેસાઇ અને વર્તમાન સરકાર દ્વારા લોકોની માંગણીને ધ્યાને લઇ મંજુર કરવામાં આવેલ વિવિધ રસ્તાઓ અને તેના દ્વારા લોકોની સુખાકારીમાં થયેલ વધારા અંગે સરાહના કરી હતી.
*બોક્ષ-*
પહેલા ખરેરા નદી પર મોટો ડુબાઉ કોઝ-વે હતો જેના કારણે રસ્તો ચોમાસા દરમિયાન અવારનવાર ડુબી જતા વાહનવ્યવહાર બંધ થઈ જતા જનજીવન ખોરવાઇ જતુ હતું.
ખરેરા નદી પર મોટો ડુબાઉ કોઝ-વેની લંબાઇ ૨૦ ગાળા × ૫૦ મીટર છે. આ પુલ સાંકડો અને લો લેવલનો હોવાથી નવસારી જિલ્લામાં પુરનાં પાણીનાં કારણે ચોમાસામાં અવારનવાર રસ્તા ડુબી જતા હતા. જેના કારણે વાહનવ્યવહાર બંધ થઈ જતા ગ્રામ્ય જીવન ખોરવાઇ જતુ હતું. આ બાબતને ધ્યાને લેતા લો-લેવલ પુલની જગ્યાએ નવો હાઈ લેવલ મેજર બ્રિજ બાંધવાની જરૂરીયાત વર્તાઇ હતી.
જે અન્વયે નવસારી જિલ્લા તંત્ર દ્વારા ચીખલી તાલુકાના પીપલગભાણ આમધરા મોગરાવાડી રૂમલા રોડ મુખ્ય જિલ્લા માર્ગ કિ.મી.૦/૦ થી ૧૧/૩ હયાત ૫.૫૦ મીટર પહોળાઈ ધરાવતો ડામર સપાટી ધરાવતો મેજર બ્રિજ માર્ગ અને મકાન વિભાગ નવસારી દ્વારા નિર્માણ કરવામાં આવ્યો છે. આ રસ્તો ચીખલી ખેરગામ ધરમપુર રોડ રાજય ધોરીમાર્ગ તથા સણવલ્લા ટાંકલ રાનકુવા રૂમલા કરંજવેરી રોડ રાજય ધોરીમાર્ગને જોડતો રસ્તો છે. આ બ્રિજના નિર્માણથી પીપલગભાણ, આમધરા, મોગરાવાડી, ધોલાર, રૂમલા ૫ જેટલા ગામોની આશરે ૨૪૬૭૨ની વસ્તીને વાહનવ્યવહાર માટે સરળતા રહેશે.
કાર્યક્રમની શરૂઆતમાં માર્ગ અને મકાન વિભાગ નવસારીના કા.પા.ઇ એમ.એસ.પટેલ દ્વારા સ્વાગત પ્રવચન થકી આ બ્રિજની કામગીરી વિશે વિગતવાર જાણકારી આપવામાં આવી હતી.
કાર્યક્રમના સ્થળે જિ.પં.પ્રમુખ પરેશભાઇ દેસાઇ, વલસાડ ધારાસાભ્યશ્રી ભરતભાઇ પટેલ સહિત સંબંધિત વિભાગના અધિકારી કર્મચારીઓ અને ગ્રામજનો બહોળી સંખ્યામાં ઉપસ્થિત રહ્યા હતા.
