તા.૦૭.૦૯.૨૦૨૫
વાત્સલ્યમ્ સમાચાર
અજય સાંસી દાહોદ
Dahod:દાહોદ તાલુકાની પુંસરી પ્રાથમિક શાળાના શિક્ષક સુરેશભાઈ રમેશભાઈ માળીને રાજયકક્ષાનો શ્રેષ્ઠ શિક્ષકનો એવોર્ડ એનાયત
દાહોદ જિલ્લાની દાહોદ તાલુકાની પુંસરી પ્રાથમિક શાળાના શિક્ષક સુરેશભાઈ રમેશભાઈ માળીએ શિક્ષણ ક્ષેત્રે કરેલી વિશિષ્ટ કાર્ય નિષ્ઠાની નોંધ લઈ રાજ્ય સરકારે ગુજરાતના શ્રેષ્ઠ પ્રાથમિક શિક્ષક તરીકે પસંદગી કરી છે, જે દાહોદવાસીઓ માટે ગૌરવ સમાન છે. તેઓને પાંચમી સપ્ટેમ્બરે શિક્ષક દિને મુખ્યમંત્રીશ્રી માન. શ્રી ભૂપેન્દ્રભાઈ પટેલ, શિક્ષણ મંત્રી માન. શ્રી કુબેરભાઈ ડિંડોર તથા અગ્ર સચિવ શ્રી મુકેશકુમારના વરદ હસ્તે વર્ષ ૨૦૨૫ માટે રાજ્યના શ્રેષ્ઠ પ્રાથમિક શિક્ષક તરીકેના એવોર્ડથી સન્માનવામાં આવ્યા હતા. જે સમગ્ર શિક્ષક સમાજ તથા દાહોદ જિલ્લા માટે ગૌરવ છે. તેઓને સાલ ઓઢાડીને પ્રમાણપત્ર તથા ૫૧ હજાર સ્ત્રપિયાની રકમનો ડીડી આપીને સન્માન કરવામાં આવ્યું હતું.
વિદ્યાર્થીઓના ઉત્થાનના કાર્યોમાં પ્રવૃત્તિશીલ રહેવાનું પરિણામ મળ્યુંઃ
સુરેશભાઈ રમેશભાઈ માળી
સમાજના ઉત્તમ ઘડવૈયા શ્રેષ્ઠ શિક્ષકો સાથે વિચાર ગોષ્ઠી કાર્યક્રમ શિક્ષક દિનની પૂર્વ સંધ્યાએ દિ. ૪ સપ્ટેમ્બરે વિદ્યાસમિક્ષા કેન્દ્ર ગાંધીનગર મુકામે શિક્ષણ મંત્રી શ્રી કુબેરભાઈ ડીંડોર દ્વારા શ્રેષ્ઠ શિક્ષકોને સન્માનિત કરવામાં આવ્યા હતા. તેઓશ્ ૨૦૦૩ થી પ્રાથમિક શિક્ષક તરીકે જોડાયા. તેઓશ્રી દ્વારા પોતાની ફરજના ૨૨ વર્ષ દરમિયાન બાળકોની શૈક્ષણિક કારકિર્દી ઘડવા ઉપરાંત શૈક્ષણિક અને સામાજિક ક્ષેત્રે અનેક સેવાકીય પ્રવૃત્તિઓ અને નવિન ઇનોવેશનો કરીને શૈક્ષણિક ક્ષેત્રે શ્રેષ્ઠ યોગદાન આપ્યું છે. જેમાં શિક્ષણમાં ભાર વગરનું ભણતર તથા નવા અભિગમ શિક્ષણમાં નવાચાર સાથે શિક્ષકોને શાળામાં કામગીરી દરમિયાન પડતી મુશ્કેલીઓના નિવારણ માટે ક્રિયાત્મક સંશોધન પણ કરવામાં આવ્યું છે. રાજ્યમાં અંગ્રેજી વિષયના વિષય શિક્ષક તરીકે પસંદગી પામીને હસતા રમતા કેવી રીતે અંગ્રેજી શીખી શકાય તે દિશામાં શ્રેષ્ઠ કામગીરીની સમગ્ર રાજ્યમાં નોંધ લેવામાં આવી હતી સંગીતમાં પણ એમની કલાનો લાભ બાળકોને મળ્યો છે સાથે સાથે કલા મહાકુંભ કલા ઉત્સવ વગેરે જેવા સાંસ્કૃતિક કાર્યક્રમોમાં વિદ્યાર્થીઓને તૈયાર કરી તેનામાં રહેલા કૌશલ્યને ઉજાગર કરવા માર્ગદર્શકની ભૂમિકા ભજવી જિલ્લા અને રાજ્ય કક્ષાએ કલા ક્ષેત્રે બાળકોને આગળ લાવ્યા છે. આ પારિતોષિકનો શ્રેય પોતે ન લેતાં શ્રી પુંસરી પ્રાથમિક શાળાના આચાર્યશ્રી, શિક્ષક ગણ, શાળાના વિદ્યાર્થીઓ, શિક્ષક સંઘ, પરિવાર, મિત્રોને સમર્પિત કરી પોતાની નિખાલસતા, સરળતા અને મહાનતા અભિવ્યક્ત કરે છે.
