નર્મદા જિલ્લામાં નાંદોદ મતવિસ્તારના ત્રણ બીએલઓને જિલ્લા કલેક્ટર દ્વારા સન્માન
૧૦૦ ટકા એન્યુમરેશન ફોર્મ વિતરણની સાથે ૨૪ નવેમ્બર પહેલાં પૂર્ણ કર્યું ૧૦૦ ટકા ડિજિટાઇઝેશન
રાજપીપળા : જુનેદ ખત્રી
ભારત ચૂંટણી પંચ દ્વારા ૧ જાન્યુઆરી ૨૦૨૬ની લાયકાત તારીખને ધ્યાનમાં રાખીને ચલાવવામાં આવી રહેલા મતદારયાદીના ખાસ સઘન સુધારણા કાર્યક્રમ (સ્પેશિયલ ઇન્ટેન્સિવ રિવિઝન – SIR) માં નર્મદા જિલ્લાના બૂથ લેવલ ઓફિસરો (બીએલઓ) એ ઉત્કૃષ્ટ કામગીરી કરી છે.
આ કામગીરીમાં સૌથી આગળ રહેનારા ૧૪૮ નાંદોદ વિધાનસભા મતવિસ્તારના ત્રણ બીએલઓએ પોતાના મતદાન મથકોના દરેક મતદારનું ૧૦૦ ટકા એન્યુમરેશન ફોર્મ વિતરણ અને તા. ૨૪ નવેમ્બર ૨૦૨૫ પહેલાં જ ૧૦૦ ટકા ડિજિટાઇઝેશન પૂર્ણ કરી છે.
૧૪૮-નાંદોદ વિધાનસભા મતવિસ્તારમાં સ્પેશિયલ ઇન્ટેન્સિવ રિવિઝન (SIR) દરમિયાન મુકેશભાઈ પટેલ (મતદાન મથક ૧૮૬-વાવડી), રજનીકાંત પરમાર (મતદાન મથક ૭૬-નરખડી) તથા કેવલભાઈ માછી (મતદાન મથક ૨૨૧-બારખાડી, કમોદિયા)એ પોતાના મતદાન મથકોમાં ૧૦૦ ટકા એન્યુમરેશન ફોર્મ વિતરણ તેમજ રેકોર્ડ સમયમાં ૧૦૦ ટકા ડિજિટાઇઝેશન પૂર્ણ કરીને અત્યંત ઉત્કૃષ્ટ કામગીરી કરી છે.
આ ત્રણેય બીએલઓએ ખૂબ જ ટૂંકા સમયમાં પોતાના વિસ્તારમાં ડોર ટુ ડોર પહોંચીને ફોર્મ ભરાવ્યા, તેનું મેપિંગ કર્યું અને બીએલઓ એપ દ્વારા સંપૂર્ણ ડેટા ડિજિટલ સ્વરૂપે અપલોડ કર્યો છે. આ અદભૂત કામગીરીને જિલ્લા કલેક્ટર તથા જિલ્લા ચૂંટણી અધિકારી એસ. કે. મોદીએ બિરદાવીને ત્રણેય બીએલઓને પ્રશસ્તિપત્ર આપીને સન્માનિત કર્યા અને તેમની નિષ્ઠા, સમર્પણ તથા કાર્યક્ષમતાની ખૂબ પ્રશંસા કરી હતી.
હાલ આ કાર્યક્રમ તા. ૦૪ ડિસેમ્બર, ૨૦૨૫ સુધી ગણતરીનો (ઈ.એફ.) તબક્કો ચાલશે. જિલ્લાનાં તમામ બીએલઓ દ્વારા તમામ મતદારોનું ગણતરી ફોર્મ પરત મેળવીને તેઓનાં મેપિંગ કરીને ઇ.એફ. ડિજિટાઈઝ્ડ કરવાની કામગીરી ચાલી રહી છે.
