SVPI એરપોર્ટ ખાતે ગુજરાતના સ્વતંત્રતા સંગ્રામ, ઉત્સવો અને વારસાની ભવ્ય ઝલક દર્શાવતા નવા સ્થાપનોનું અનાવરણ
રિપોર્ટર
હિતેન્દ્ર ગોસાઈ
અમદાવાદ
અમદાવાદ, 16 સપ્ટેમ્બર 2025: સરદાર વલ્લભભાઈ પટેલ આંતરરાષ્ટ્રીય (SVPI) એરપોર્ટ પર્યટકો અને મુસાફરોને માત્ર સુવિધાજનક યાત્રા જ નહીં પરંતુ ગુજરાતના ઐતિહાસિક અને સાંસ્કૃતિક વારસાનો અનોખો અનુભવ કરાવવા સતત પ્રયત્નશીલ છે. આ જ પ્રયત્નોની કડીરૂપે ટર્મિનલ-2 ખાતે ત્રણ થીમ આધારિત કલા સ્થાપનોનું ભવ્ય અનાવરણ કરવામાં આવ્યું છે, જે રાજ્યના સ્વતંત્રતા સંગ્રામ, પરંપરાઓ અને ઉત્સવની ભાવના ઉજાગર કરે છે.
સ્વતંત્રતાની ચળવળની ઝાંખી
ડિપાર્ચર્સ ચેક-ઇન હોલમાં મુકાયેલા મહાત્મા ગાંધી અને સરદાર વલ્લભભાઈ પટેલના આકર્ષક શિલ્પો ભારતના સ્વાતંત્ર્ય સંગ્રામમાં ગુજરાતની અગત્યની ભૂમિકાની યાદ અપાવે છે. લગભગ 350 મીટર લાંબા ધાતુના પટ પર કોતરાયેલા આ ભીંતચિત્રો પિત્તળ અને તાંબાની ત્રિ-પરિમાણીય કળા દ્વારા રચાયા છે, જે દેશની સ્વતંત્રતાની યાત્રાને શ્રદ્ધાંજલિ અર્પે છે.
ઉત્સવ વોલ – નવરાત્રી અને ઉત્તરાયણની ઉજવણી
આગમન વિભાગના બેગેજ ક્લેમ હોલમાં બનાવવામાં આવેલું “ઉત્સવ વોલ” ગુજરાતના પ્રખ્યાત તહેવારો નવરાત્રી અને ઉત્તરાયણની જીવંત ઉજવણીને પ્રસ્તુત કરે છે. પિત્તળની પટ્ટીઓ અને મોડ્યુલર શીટ બ્લોક્સથી બનેલા આ ત્રિ-પરિમાણીય સ્થાપનમાં ગરબાના નર્તકો અને આકાશમાં ઉડતા રંગબેરંગી પતંગોની સુંદર રજૂઆત જોવા મળે છે. આ દ્રશ્યો પ્રવાસીઓને પરંપરા, આનંદ અને ગૌરવ સાથે સ્વાગત કરે છે.
પ્રગતિ-ની-પતંગ
ટર્મિનલ-2ના ડોમેસ્ટિક અરાઇવલ વિસ્તારમાં બનાવવામાં આવેલું આ અનોખું શિલ્પ ગુજરાતની પતંગ ઉડાવવાની પરંપરા સાથે સંકળાયેલી ઉર્જા અને પ્રગતિની ભાવના વ્યક્ત કરે છે. કાંસ્યમાંથી બનાવાયેલા જીવનકદના બાળકોના શિલ્પો તેમની આનંદભરી અભિવ્યક્તિ દર્શાવે છે, જ્યારે સ્ટીલ અને એક્રેલિકથી બનેલા પતંગો તેજસ્વી પ્રકાશ સાથે આકાશમાં ઉડતા જોવા મળે છે. આ સ્થાપત્ય આશા, ઉન્નતિ અને નવી પેઢીની અમર્યાદિત આકાંક્ષાઓને પ્રતીકરૂપે વ્યક્ત કરે છે.
SVPI એરપોર્ટ સંચાલન સમિતિના જણાવ્યા મુજબ, આવા કલાત્મક સ્થાપનો મુસાફરોને એક અનોખી ઓળખ આપશે અને ગુજરાતના સમૃદ્ધ સાંસ્કૃતિક વારસાની યાદગાર ઝલક તેમની યાદોમાં છોડી જશે. એરપોર્ટને માત્ર પ્રવાસનું કેન્દ્ર ન રાખીને તેને સાંસ્કૃતિક દર્પણમાં પરિવર્તિત કરવાનો આ પ્રયાસ આગલા દિવસોમાં પણ ચાલુ રહેશે.
