Upleta: ઉપલેટાની નવ્યાની જન્મજાત હૃદયની ખામી દૂર કરી નવજીવન આપતું “રાષ્ટ્રીય બાળ સ્વાસ્થ્ય કાર્યક્રમ”
તા.૧૯/૬/૨૦૨૫
વાત્સલ્યમ્ સમાચાર
Rajkot, Upleta: સરકારશ્રીના “રાષ્ટ્રીય બાળ સુરક્ષા કાર્યક્રમ” હેઠળ બાળકોને નિ:શુલ્ક સારવાર દ્વારા સ્વસ્થતા પ્રદાન કરવામાં આવે છે. આ યોજના અન્વયે રાજકોટ જિલ્લાના ઉપલેટા તાલુકાના પડવલા ગામની શ્રી નવ્યાબેન કરોતરાની જન્મથી જ હૃદયની ખામીની નિ:શુલ્ક સારવાર કરીને સ્વસ્થ જીવન પ્રદાન કરવામાં આવ્યું હતું.
વર્ષ ૨૦૧૭માં જન્મેલી શ્રી નવ્યાનો પરિવાર આર્થિક રીતે નબળો છે. તેમના પિતા શ્રી પંકજભાઈ કરોતરા પશુપાલનના વ્યવસાય સાથે સંકળાયેલા છે. નવ્યા નાનપણથી જ વારંવાર બીમાર રહેતી હતી. તેણીને ઊપલેટામાં બાળકોના ડોકટર ભાલોડીયા પાસે તપાસ કરાવી ત્યારે નવ્યાને હૃદયની બીમારી હોવાનું પ્રાથમિક નિદાન કરવામાં આવ્યું હતું.
ત્યારબાદ નવ્યાને ડી.ઈ.આઈ.સી.(DEIC) સિવીલ હોસ્પિટલ રાજકોટ ખાતે વધુ તપાસ માટે રીફર કર્યા તે વખતે તેણીને હૃદયની ખામી હોવાનું નિદાન થયું તથા વધુ સારવાર માટે યુ.એન. મહેતા હોસ્પિટલ અમદાવાદ ખાતે જવા જણાવ્યું હતું.
આ સાંભળી નવ્યાના માતા-પિતા દુઃખી થયાં એ દરમિયાન આર.બી.એસ.કે. ટીમ અને સિવિલ હોસ્પિટલના ડોકટર્સની ટીમે રાષ્ટ્રીય બાળ સ્વાસ્થ્ય કાર્યક્રમ વિશે માહિતગાર કર્યા હતા. તેમજ સરકારશ્રીના આર.બી.એસ.કે. અન્વયે તમામ ખર્ચ ઉઠાવવામાં આવશે તેમ જણાવ્યું હતું. આ વાત જાણ્યા બાદ નવ્યાના માતા-પિતાને હાશકારો થયો. અને નવ્યાની સારવાર કરાવવા સંમત થયા હતા.
અમદાવાદ સ્થિત યુ.એન. મહેતા હોસ્પિટલના નિષ્ણાંત તબીબોએ નવ્યાનું ઓપરેશન સફળતા પૂર્વક પૂર્ણ કર્યું હતું અને ઓપરેશન પછીના ફોલોઅપ પણ કરવામાં આવ્યા હતા.
જિલ્લા વિકાસ અધિકારીશ્રી અનંદુ સુરેશ ગોવિંદ અને મુખ્ય જિલ્લા આરોગ્ય અધિકારીશ્રી ડો.આર.આર. ફુલમાલીના માર્ગદર્શન મુજબ “રાષ્ટ્રીય બાળ સ્વાસ્થ્ય કાર્યક્રમ” હેઠળ જિલ્લામાં થતી સારી કામગીરી માટે દીકરી નવ્યાના માતા-પિતાએ આભાર વ્યક્ત કર્યો હતો.
