વિજાપુર હિરપુરા ગામે ગણપત યુનિવર્સિટી દ્વારા NSS અંતર્ગત નિશુલ્ક ફિઝિયોથેરાપી કેમ્પ યોજાયો 50 થી વધુ લોકોએ કેમ્પનો લાભ લીધો
વિજાપુર હિરપુરા ગામે ગણપત યુનિવર્સિટી દ્વારા NSS અંતર્ગત નિશુલ્ક ફિઝિયોથેરાપી કેમ્પ યોજાયો
50 થી વધુ લોકોએ કેમ્પનો લાભ લીધો
વાત્સલ્યમ સમાચાર
સૈયદજી બુખારી વિજાપુર
ગણપત યુનિવર્સિટી ની સુભદ્રાબેન સુરેશચંદ્ર ઇન્સ્ટિટ્યૂટ ઓફ ફિઝિયોથેરાપી (GUNI–SSIOP) દ્વારા રાષ્ટ્રીય સેવા યોજના (NSS) અંતર્ગત હિરપુરા ગામે નિશુલ્ક ફિઝિયોથેરાપી આરોગ્ય જાગૃતિ તથા સારવાર કેમ્પનું સફળ આયોજન કરવામાં આવ્યું હતું.આ કેમ્પનું આયોજન એ.એમ. પટેલ ઇન્સ્ટિટ્યૂટ ઓફ કોમ્પ્યુટર સાયન્સિસના સહયોગથી કરવામાં આવ્યું હતું.
કેમ્પનો મુખ્ય હેતુ ગ્રામ્ય વિસ્તારમાં ફિઝિયોથેરાપી અંગે જાગૃતિ ફેલાવવી, મફત મૂલ્યાંકન તથા મૂળભૂત સારવાર આપવી અને રોગપ્રતિકારક આરોગ્ય સંભાળ તથા ઘરઆધારિત કસરતો અંગે માર્ગદર્શન આપવાનો હતો. સાથે જ વિદ્યાર્થીઓ અને વાલીઓને ફિઝિયોથેરાપી ક્ષેત્રમાં શિક્ષણ અને કારકિર્દી અવસરો અંગે માહિતી આપવામાં આવી હતી.
આ કેમ્પમાં 50થી વધુ ગ્રામજનોએ લાભ લીધો હતો. પીઠ, ગરદન તથા ઘૂંટણના દુખાવા, પોસ્ચરલ સમસ્યાઓ તેમજ વયજન્ય માસપેશી અને સાંધાના દુખાવાની તપાસ કરી મફત સલાહ અને મૂળભૂત ફિઝિયોથેરાપી સારવાર આપવામાં આવી હતી. ફેકલ્ટી સભ્યો દ્વારા ઘરકસરત કાર્યક્રમો અને જીવનશૈલી સુધારણા અંગે માર્ગદર્શન પણ આપવામાં આવ્યું હતું.
કેમ્પનું સંકલન ડૉ. પેરી પટેલ અને ડૉ. વૈશાલી મોદી દ્વારા કરવામાં આવ્યું હતું. NSSના પાંચ વિદ્યાર્થી સ્વયંસેવકોએ નોંધણી, વ્યવસ્થાપન અને આરોગ્ય જાગૃતિ પ્રવૃત્તિઓમાં મહત્વપૂર્ણ ભૂમિકા ભજવી હતી. ગ્રામજનો તરફથી કેમ્પને ઉત્સાહજનક પ્રતિસાદ મળ્યો હતો.
આ પ્રસંગે ગણપત યુનિવર્સિટીના ગ્રુપ પ્રો-ચાન્સેલર ડૉ. મહેન્દ્ર શર્મા, સિનિયર પ્રો. વાઇસ ચાન્સેલર તથા ડાયરેક્ટર જનરલ ડૉ. આર.કે. પટેલ અને ફિઝિયોથેરાપી કોલેજના ઇનચાર્જ પ્રિન્સિપાલ ડૉ. હેમાંગ જાનીએ ફેકલ્ટી અને વિદ્યાર્થીઓને શુભેચ્છાઓ પાઠવી હતી. આ પ્રવૃત્તિ દ્વારા સંયુક્ત રાષ્ટ્રના સસ્ટેનેબલ ડેવલપમેન્ટ ગોલ્સ અંતર્ગત SDG–3 (સારા આરોગ્ય અને કલ્યાણ) તથા SDG–4 (ગુણવત્તાપૂર્ણ શિક્ષણ)ના લક્ષ્યોને સમર્થન મળ્યું હોવાનું આયોજકો દ્વારા જણાવામાં આવ્યું હતું.
