વાત્સલ્યમ્ સમાચાર,
પૂજા ઠક્કર – મુંદરા કચ્છ.
વિશ્વ જળ દિવસે જ મુંદરામાં જળ હોનારત: લાખો લિટર પાણીનો બગાડ અને જર્જરિત ટાંકાથી દુર્ઘટનાનો ભય
મુંદરા, તા. ૨૨ માર્ચ ૨૦૨૬
આજે જ્યારે સમગ્ર વિશ્વ ‘વર્લ્ડ વોટર ડે’ ની ઉજવણી કરી રહ્યું છે અને પાણીના ટીપે-ટીપાનો સંગ્રહ કરવાના શપથ લેવાઈ રહ્યા છે, ત્યારે કચ્છના મુંદરામાં વરવી વાસ્તવિકતા સામે આવી છે. મુંદરાના વસંત હેરીટેજ અને આશાપુરા નગર વિસ્તારમાં છેલ્લા ત્રણ મહિનાથી તંત્રની ઘોર બેદરકારીને કારણે લાખો લિટર પીવાનું શુદ્ધ પાણી ગટરમાં વહી રહ્યું છે. જલ જીવન મિશનના મોટા દાવાઓ વચ્ચે સ્થાનિક તંત્રની નિષ્ક્રિયતા સામે લોકરોષ ફાટી નીકળ્યો છે.
ત્રણ માસથી લીકેજ, તંત્ર ઘોર નિદ્રામાં
સ્થાનિક રહેવાસીઓના જણાવ્યા અનુસાર રહેણાંક વિસ્તારમાં આવેલા પાણીના ટાંકાની મુખ્ય લાઈનમાં મોટું ભંગાણ પડ્યું છે. આ લીકેજને કારણે દરરોજ હજારો લિટર પાણીનો વ્યય થઈ રહ્યો છે. આશ્ચર્યની વાત એ છે કે છેલ્લા ૯૦ દિવસથી આ સમસ્યા હોવા છતાં જવાબદાર અધિકારીઓના પેટનું પાણી હલતું નથી. જળ સંરક્ષણની વાતો માત્ર કાગળ પર જ રહી હોય તેવું સ્પષ્ટ દેખાય છે.
ગંભીર બીમારીઓ અને ધરાશાયી થવાનો ખતરો
ટાંકાની આસપાસ સતત પાણી ભરાઈ રહેવાને કારણે આ વિસ્તાર અત્યારે મચ્છરોનો અડ્ડો બની ગયો છે જેનાથી ડેન્ગ્યુ અને મેલેરિયા જેવી બીમારીઓ ફેલાવાની દહેશત વર્તાઈ રહી છે. વધુ ચિંતાજનક બાબત એ છે કે સતત જળબંબાકારને કારણે ટાંકાની આસપાસની જમીન પોચી પડી ગઈ છે. રહેણાંક વિસ્તારની મધ્યમાં આવેલો આ વિશાળ ટાંકો ગમે ત્યારે ધરાશાયી થઈ શકે છે જે મોટી જાનહાનિ નોતરી શકે તેમ છે.
“કથની અને કરણીમાં મોટું અંતર” – અબ્દુલ મજીદ સમા
આ ગંભીર મુદ્દે સામાજિક કાર્યકર અબ્દુલ મજીદ સમાએ રોષ વ્યક્ત કરતા જણાવ્યું હતું કે “સરકાર એક તરફ પાણી બચાવવા કરોડોનો ધુમાડો કરી રહી છે અને બીજી તરફ મુંદરામાં તંત્રની આંખ સામે જળ સંપત્તિની હત્યા થઈ રહી છે. આ માત્ર પાણીનો બગાડ નથી, પરંતુ જનતાના ટેક્સના પૈસા અને કુદરતી સ્ત્રોતોનો દ્રોહ છે.”
સ્થાનિકોની ઉગ્ર માંગ
વસંત હેરીટેજ અને આશાપુરા નગરના રહીશોએ ચીમકી ઉચ્ચારી છે કે જો તાત્કાલિક અસરથી આ લીકેજ બંધ કરવામાં નહીં આવે અને જવાબદાર અધિકારીઓ સામે કડક પગલાં લેવામાં નહીં આવે તો આગામી દિવસોમાં ઉગ્ર આંદોલન કરવામાં આવશે. તંત્ર આ બાબતે જાગે અને કોઈ મોટી દુર્ઘટના સર્જાય તે પહેલા કાયમી ઉકેલ લાવે તેવી માંગણી ઉઠી છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
