અદાણી લાંચ કેસ મામલે ન્યૂયોર્ક કોર્ટે ત્રણય કેસને એક ડિસ્ટ્રીક્ટ કોર્ટને સોંપી દેવા હુકમ કર્યો
અમેરિકામાં ઉદ્યોગપતિ ગૌતમ અદાણી અને અન્યો સામે રિશ્વતખોરીના આરોપોમાં મોટું અપડેટ આવ્યું છે. ન્યૂયોર્કની એક અદાલતે $265 મિલિયન ડોલરના લાંચના આરોપમાં ચાલી રહેલ બે કેસોમાં અન્ય કેસની એક સાથે ત્રણ મામલાની એક સાથે સુનાવણી કરવાનો આદેશ આપ્યો છે. કોર્ટે આપેલા આદેશમાં કહેવાયું છે કે આ ત્રણેય કેસની સુનાવણી એક જ કોર્ટમાં એકસાથે કરવામાં આવે. કોર્ટે આ નિર્ણય ત્યારે આપ્યો જ્યારે કોર્ટને જાણવા મળ્યું કે ત્રણેય કેસ સમાન આરોપો અને વ્યવહારો સાથે સંબંધિત છે. જેથી ત્રણેય કેસ એક જ અદાલતને સોંપવામાં આવ્યા છે.
આ કેસો સિંગલ જજ સમક્ષ એટલા માટે મૂકવામાં આવ્યા છે જેથી કરીને કોઈપણ પ્રકારના કોન્ફ્લિક્ટને ટાળી શકાય. અદાણી ગૃપ સામે સિવિલ અને ફોજદારી કેસને યુએસ ડિસ્ટ્રિક્ટ જજ ગારોફિસને સોંપવામાં આવ્યો છે. આ કેસની સુનાવણી એકસાથે થશે પરંતુ અલગ અલગ બની રહેશે. જેનો સીધો મતલબ એ થાય કે સિવિલ અને ક્રિમીનલ કેસોની સુનાવણી કર્યા બાદ તે જ કોર્ટ આદેશ આપશે.
યુએસ જસ્ટિસ ડિપાર્ટમેન્ટના પ્રવક્તાએ આ મામલે જણાવ્યું કે યુએસ સિક્યોરિટીઝ એન્ડ એક્સચેન્જ કમિશન સમક્ષ દાખલ કરાયેલ સિવિલ કેસ અને ન્યૂયોર્કના પૂર્વીય જિલ્લા સમક્ષ દાખલ કરાયેલા ક્રિમીનલ કેસ હવે એક ન્યાયાધીશને સોંપવામાં આવ્યા છે. પરંતુ આ બંને કેસને મર્જ કરાયા નથી. ઉલ્લેખનીય છે કે નવેમ્બરમાં અદાણી ગૃપના ચેરમેન ગૌતમ અદાણી પર અમેરિકન વકીલોએ લાંચનો આરોપ લગાવ્યો હતો. આ ખબર બાદ શેરબજારમાં અદાણી ગૃપના શેરોમાં નોંધપાત્ર ઘટાડો જોવા મળ્યો હતો.
થોડા સમય પહેલા અમેરિકામાં ગૌતમ અદાણી અને તેમના કેટલાક સાથીઓ પર આરોપ લગાવવામાં આવ્યો હતો કે તેઓએ સોલર એનર્જીનો કોન્ટ્રાક્ટ મેળવવા માટે લગભગ 2300 કરોડ રૂપિયાની લાંચ આપી હતી. યુએસ પ્રોસિક્યુટર્સે એવો પણ આરોપ લગાવ્યો હતો કે આ ફેક્ટ તેવા રોકાણકારો અને અમેરિકન બેંકોથી છુપાવવામાં આવ્યું હતું જેમાંથી પ્રોજેક્ટ માટે પૈસા ભેગા કરવામાં આવ્યા હતા. પરંતુ અદાણી ગૃપે આ તમામ આરોપોને પાયાવિહોણા ગણાવ્યા હતા. ગૃપ દ્વારા કહેવાયું હતું કે, તેઓ હંમેશા કાયદાનું પાલન કરે છે અને આવું કંઈ જ કર્યું નથી.
