યુક્રેન જ્યાં સુધી શાંતિ મંત્રણા માટે પ્રતિબદ્ધતા નહીં દાખવે ત્યાં સુધી લશ્કરી સહાય બંધ રહેશે : ટ્રમ્પ

યુક્રેનના અધિકારીઓએ જણાવ્યું હતું કે અમેરિકાએ અત્યાર સુધી કરેલી મદદ માટે અમે આભારી છીએ અને તેની સાથે હાલમાં તથા ભવિષ્યમાં પણ કામ કરવાનું જારી રાખવા માંગીએ છીએ. આમ છતાં કોઈપણ શાંતિ મંત્રણામાં યુક્રેન હજી પણ સુરક્ષાની ખાતરી ઇચ્છે છે અને તે યુક્રેનની કોઈપણ જમીન પણ રશિયાનો કબ્જો રહે તેમ ઇચ્છતું નથી.

વ્હાઇટ હાઉસના અધિકારીએ જણાવ્યું હતું કે તે વર્તમાન યુદ્ધનો અંત લાવવા માટે આ સહાય રોકી રહ્યા છે. યુક્રેન શાંતિ મંત્રણા માટે પ્રતિબદ્દતા દર્શાવે નહીં ત્યાં સુધી અમેરિકા આ સહાય રોકેલી રાખશે.

રશિયાએ યુદ્ધ શરૂ કર્યુ ત્યારથી યુક્રેન સહાય માટે મોટાપાયા પર તેના પર આધારિત હતુ. અમેરિકા તેને અત્યાર સુધીમાં ૭૦ અબજ ડોલરની સહાય કરી ચૂક્યું છે. અમેરિકાની આ સહાયે યુક્રેનને યુદ્ધમાં ટકી રહેવામાં નોંધપાત્ર મદદ કરી છે.

ઝેલેન્સ્કીએ જણાવ્યું હતું કે ટ્રમ્પ સાથેની જીભાજોડી બદલ તેને ખેદ છે, હવે તે આ વાતને પાછળ છોડીને આગળ વધવા માંગે છે. તેમની સાથે કામ કરવા તૈયાર છે. તેમણે જણાવ્યું હતું કે ટ્રમ્પની ઓફરમાં તેમને હજી પણ રસ છે. યુક્રેનને નાટોનું સભ્યપદ ન મળે તો વાંધો નહી, પણ કમસેકમ તેને સિક્યોરિટીની ગેરંટી મળવી જોઈએ.