નવી દિલ્હી : કેન્દ્ર સરકારે મેસેજિંગ એપ્સ માટે અત્યંત મહત્ત્વનો આદેશ જારી કર્યો છે. તેના કારણે દેશમાં એપનો યુઝ કરતાં કરોડો લોકોની એપનો ઉપયોગ કરવાની પદ્ધતિ બદલાઈ શકે છે. હવેથી વોટ્સએપ, ટેલિગ્રામ, સિગ્નલ, સ્નેપચેટ, શેરચેટ, જિયોચેટ, અરાટ્ટાઈ અને જોશ જેવા લોકપ્રિય એપ એક્ટિવ સિમકાર્ડ વગર ચાલી નહી શકે. કેન્દ્રના દૂરસંચાર વિભાગે આ નિયમ અમલી બનાવ્યો છે.
આ નિયમનો અમલ ટેલિકમ્યુનિકેશન સાઇબર સિક્યોરિટી અમેન્ડમેન્ટ રુલ્સ ૨૦૨૫ હેઠળ કરવામાં આવી રહ્યો છે. આમ દેશમાં હવે એવું પહેલી વખત થયું છે કે એપ આધારિત સેવાઓને પણ ટેલિકોમના નિયમો હેઠળ લાવવામાં આવ્યા છે. નવો સિમ બાઇન્ડિંગ નિયમ આ એપ્સ પર પણ તે જ પ્રણાલિ અમલી બનાવશે જેવી બેન્કિગ અને યુપીઆઈ એપ્સમાં હોય છે. જ્યાં સિમ એક્ટિવ જ નહીં હોય ત્યાં લોગ ઇન જ નહીં થઈ શકે.
સરકારે આ એપ્સને ટેલિકમ્યુનિકેશન આઇડેન્ટિફાયર યુઝર એન્ટાઇટીઝની શ્રેણીમાં મૂક્યા છે. હવે આ પ્લેટફોર્મ્સે સુનિશ્ચિત કરવું પડશે કે યુઝર્સ સિમકાર્ડ સાથે જ આ પ્લેટફોર્મ પર જોડાયેલો હોય. એપ્સે ૯૦ દિવસની અંદર આ નિયમનો અમલ કરવો પડશે. આ જ રીતે વેબ બ્રાઉઝરથી વેબનો ઉપયોગ કરનારાઓ માટે પણ મોટો ફેરફાર કરવામાં આવ્યો છે.તેના હેઠળ દર છ કલાકે એપ ઓટો લોગઆઉટ થઈ જશે. ફરીથી લોગ-ઇન કરવા માટે યુઝરે ફરીથી લોગ-ઇન કરવું પડશે અને યુઝરે ફરીથી ક્યુઆર કોડ દાખલ કરવો પડશે.
સરકારનું કહેવું છે કે તેના કારણે ગુનેગારોને રિમોટથી નકલી એકાઉન્ટ ચલાવવું અઘરું પડશે. તેનું કારણ એ છે કે દરેક વખતે એક્ટિવ અને વેરિફાઇડ સીમની જરૂર પડશે. ટેલિકમ્યુનિકેશન વિભાગના જણાવ્યા મુજબ મોટાભાગના મેસેજિંગ એપ પહેલી વખત ઇન્સ્ટોલ કરતાં સમયે જ મોબાઇલ નંબર વેરિફાઈ કરે છે. તેનો ફાયદો ઉઠાવીને સાઇબર ગુનેગાર સિમ બદલ્યા પછી કે બંધ કર્યા પછી પણ એપનો ઉપયોગ જારી રાખી શકે છે. તેનું લોકેશન, કોલ રેકોર્ડ કે કેરિયર ડેટા ટ્રેસ થઈ શકતો નથી.
સાઇબર નિષ્ણાતોનું કહેવું છે કે આના કારણે છેતરપિંડીની સંભાવનામાં ખાસ્સો ઘટાડો થઈ શકે છે. યુઝર, ડિવાઇસ અને સિમ કાર્ડનું ટ્રેકિંગ સરળ હશે. જ્યારે બીજા કેટલાક નિષ્ણાતો જણાવે છે કે ગુનેગાર તો બનાવટી કે ખોટા દસ્તાવેજોના આધારે જ સિમ કાર્ડ મેળવતો હોવાથી તેના ફાયદા મર્યાદિત રહેશે.
આ પગલાંથી કરોડો ભારતીય યુઝર્સની દૈનિક ડિજિટલ આદતોમાં ફેરફાર આવી શકે છે, કારણ કે યુઝર દિવસોના દિવસો સુધી વોટ્સેપ વગેરે ખુલ્લા રાખી નહી શકે. દર છ કલાકે લોગઆઉટ થશે. તમારુ સિમ બંધ થયું છે કે સિમ સ્લોટમાં નથી તો એપ ખુલશે જ નહીં.
