હા, મોદીનો કોઈ વિકલ્પ નથી !

જાણીતા લેખક ઉર્વિશ કોઠારીએ લોકસભા ચૂંટણી-2024ના સંભવિત પરિણામ અંગે ફેસબૂક પર 1 જૂન 2024ના રેજ પોસ્ટ મૂકી છે. જેમાં તેમનું આંકલન છે કે “NDAને સાદી કે સ્પષ્ટ બહુમતી મળશે ! મોદીને આજીવન ચૂંટણી થકી સત્તાસ્થાનેથી હટાવી શકાય, એવી આ છેલ્લી ચૂંટણી બની રહેશે. કારણ કે પક્ષમાં કે વિપક્ષમાં ગરીમાપૂર્વક સત્તાથી બહાર રહી શકાય એવી જગ્યા તેમણે રાજકારણમાં રાખી જ નથી. આપણા દેશની દુર્દશામાં રહી ગયેલી કસર પૂરી થશે અને દેશભક્તિનો દાવો કરનારા ભક્તો તેનો ઉત્સવ મનાવશે. ત્યારે અમારા જેવા લોકોને એક સંતોષ રહેશે : મોદી-ભક્તો-ગોદી મિડીયા-ઘણા ધનપતિઓ-ચાલુ ‘તટસ્થો’; આ બધા ભેગા મળીને સક્રિયપણે દેશને અભૂતપૂર્વ પતનના માર્ગે લઈ જતા હતા, ત્યારે લોકોને ચેતવવા માટે વ્યક્તિગત ધોરણે જે સૂઝ્યું અને થઈ શક્યું, તે કર્યું. ચાલુ ગાડીએ ચડી ગયેલા કે આંખે પાટા બાંધીને ભક્તિ કરતા કે ખુલ્લી આંખે છેતરાતા લોકોને આવી ભૂમિકા ન સમજાય, એવું બને. કારણ કે, તેમની પાસે એક જ માપદંડ છેઃ ચૂંટણીમાં હાર અને જીત. મોદી જીતે એટલે ભક્તો માટે લદ્દાખની સરહદે ચીનની ઘૂસણખોરી, લશ્કરમાં રાજકારણ, બ્રિજભૂષણ જેવા છેડતીબાજોને અપાતો રાજ્યાશ્રય, રોજેરોજ ઉચ્ચારાતાં જૂઠાણાં અને ઝેરીલાં ભાષણો, સામાજિક વેરઝેર, અમર્યાદ ભપકાબાજી સહિતના બધા જ મુદ્દે ચર્ચાનો અંત આવી જાય છે. કારણ? ચૂંટણી જીતાઈ ગઈ છે. આવી માનસિકતા ધરાવતા લોકોને સંવાદથી-તથ્યોથી સમજાવી શકાતા નથી. બાકી, નોટબંધીથી લઈને કોરોના મિસમેનેજમેન્ટ સુધીની અને બીજી અનેક સરકારસર્જિત આફતો વખતે તેમની આંખ જાતે જ ઉઘડી હોત !”