વાત્સલ્યમ્ સમાચાર.
રિપોર્ટ :- રમેશ મહેશ્વરી- માંડવી કચ્છ.
માંડવી કચ્છ,તા.14: સરહદી જિલ્લો કચ્છ હંમેશા પોતાની આગવી સંસ્કૃતિ, ભાષા અને ભૌગોલિક પરિસ્થિતિ માટે જાણીતો રહ્યો છે. જો કે, છેલ્લા કેટલાક વર્ષોથી કચ્છનું શિક્ષણ તંત્ર ગંભીર સમસ્યાઓનો સામનો કરી રહ્યું છે. જિલ્લામાં શિક્ષકોની કાયમી ઘટ હોવાના કારણે અહીંના બાળકો ગુણવત્તાયુક્ત પ્રાથમિક અને માધ્યમિક શિક્ષણ મેળવી શકતા નથી.ગુજરાત સરકાર દ્વારા દર વર્ષે થતી શિક્ષકોની ભરતીઓમાં કચ્છમાં શિક્ષકોની નિમણૂક તો કરવામાં આવે છે, પરંતુ મોટાભાગના શિક્ષકો ટૂંક સમયમાં જ પોતાના વતન જિલ્લામાં બદલી કરાવી લેતા હોવાથી કચ્છમાં શિક્ષકોની ઘટ યથાવત રહે છે. આના કારણે કચ્છના બાળકો શિક્ષક વગર અભ્યાસ કરવા માટે મજબૂર બન્યા છે. ઘણી શાળાઓમાં તો એક પણ શિક્ષક ઉપલબ્ધ નથી, અને જે શિક્ષકો છે તેમને સ્થાનિક ભાષા કચ્છીનું જ્ઞાન ન હોવાથી તેઓ વિદ્યાર્થીઓ સાથે અસરકારક રીતે જોડાઈ શકતા નથી.
વર્ષ 2000માં કચ્છના વિદ્યાર્થીઓના જોરદાર આંદોલનના પરિણામે સરકારે મેરિટના ધોરણે સ્થાનિક વિદ્યાર્થીઓની શિક્ષક તરીકે ભરતી કરી હતી, જે સફળ સાબિત થઈ છે અને તે શિક્ષકો આજે પણ કચ્છમાં સેવા આપી રહ્યા છે. કચ્છના લોકોની એવી જ માંગણી છે કે આ વખતે પણ ખાલી પડેલી જગ્યાઓ પર સ્થાનિક વિદ્યાર્થીઓની તેમની શૈક્ષણિક લાયકાતના આધારે મેરિટના ધોરણે ભરતી કરવામાં આવે.
સરકારે કચ્છની આ સમસ્યાને ધ્યાનમાં લઈને “કચ્છ જિલ્લા માટેની ખાસ ભરતી” નામનો પરિપત્ર તો બહાર પાડ્યો છે, જેમાં “જ્યાં નિમણૂક ત્યાં નિવૃત્તિ”ની શરત પણ મૂકવામાં આવી છે, જે આવકાર્ય છે. પરંતુ આ પરિપત્રમાં કચ્છી ભાષાની જાણકારી ધરાવતા ઉમેદવારોને જ અરજી કરવાની પ્રાથમિકતા આપવાને બદલે, ત્રણ પરિસ્થિતિઓમાં બદલીની મંજૂરી આપવાની જોગવાઈ ઉમેરવામાં આવી છે, જે કચ્છના લોકોની અપેક્ષાઓ વિરુદ્ધ છે.
કચ્છના હજારો વિદ્યાર્થીઓ ટેટ જેવી અઘરી પરીક્ષા આપવા માટે કચ્છની બહાર મુસાફરી કરીને જાય છે અને થાકેલી હાલતમાં પરીક્ષા આપે છે, જેના કારણે તેઓ સફળ થઈ શકતા નથી. વર્ષ 2023ની ટેટ પરીક્ષાનું પરિણામ પણ આ વાતની સાક્ષી પૂરે છે, જેમાં પાસ થનારા વિદ્યાર્થીઓમાં કચ્છના વિદ્યાર્થીઓની સંખ્યા ખૂબ જ ઓછી છે.
કચ્છના લોકો ઉદાર છે અને બહારના શિક્ષકોને સ્વીકારવા માટે તૈયાર છે, પરંતુ તેમની એક જ માંગણી છે કે કચ્છમાં આવનાર શિક્ષક આજીવન અહીં સેવા આપે અને નિમણૂક પહેલાં કચ્છી ભાષાની પ્રાથમિક જાણકારી ધરાવતી પરીક્ષા પાસ કરે.
અમારી સરકારને નમ્ર વિનંતી છે કે કચ્છના બાળકોના ભવિષ્યને ધ્યાનમાં રાખીને તાત્કાલિક અસરથી આ ભરતી પ્રક્રિયાને રોકવામાં આવે અને સુધારેલો પરિપત્ર બહાર પાડવામાં આવે, જેમાં નીચેની બાબતોનો સમાવેશ કરવામાં આવે:
કચ્છની તમામ ખાલી પડેલી જગ્યાઓ પર સ્થાનિક લાયકાત ધરાવતા વિદ્યાર્થીઓની મેરિટના ધોરણે ભરતી કરવામાં આવે.
જો બહારના ઉમેદવારોની ભરતી કરવી અનિવાર્ય હોય તો તેઓ માટે કચ્છી ભાષાની જાણકારીની પરીક્ષા પાસ કરવી ફરજિયાત બનાવવામાં આવે, જે કચ્છની સરકાર માન્ય સંસ્થા દ્વારા લેવામાં આવે.
પરિપત્રમાં બદલીની ત્રણ શરતોને રદ કરવામાં આવે અને “જ્યાં નિમણૂક ત્યાં નિવૃત્તિ”ની શરતનું કડક પાલન કરવામાં આવે.
વધુમાં, લાઈવ ડિબેટના મંચ પર એવી ચર્ચા કરવામાં આવી છે કે જો લોકો દ્વારા ચૂંટાયેલા પ્રતિનિધિઓ આ અંગે કોઈ સકારાત્મક કાર્યવાહી નહીં કરે તો વિરોધ પક્ષના કોઈપણ સભ્ય દ્વારા જાહેર હિતની અરજી દાખલ કરીને આ ભરતી પ્રક્રિયાને રોકવામાં આવશે.
અમે આશા રાખીએ છીએ કે સરકાર કચ્છના લોકોની આ લાગણીઓને સમજશે અને યોગ્ય પગલાં લેશે, જેથી કચ્છના બાળકોને ગુણવત્તાયુક્ત શિક્ષણ મળી શકે અને સ્થાનિક યુવાનોને રોજગારીની તકો પ્રાપ્ત થાય.
