રિપોર્ટ : પુજા ઠક્કર, મુંદરા-કચ્છ.
મુંદરાના ભોરારા પ્રાથમિક શાળામાં હિન્દી દિવસની ઉજવણી
ભોરારા (તા.મુંદરા): ૧૪મી સપ્ટેમ્બર એટલે રાષ્ટ્રભાષા હિન્દીનો ગૌરવ દિવસ. આ દિવસની ઉજવણીના ભાગરૂપે મુંદરા તાલુકાની ભોરારા પ્રાથમિક શાળામાં પણ “હિન્દી દિવસ” ની ઉત્સાહભેર ઉજવણી કરવામાં આવી. આ કાર્યક્રમમાં ધોરણ ૫ થી ૮ ના વિદ્યાર્થીઓએ ખૂબ જ ઉત્સાહપૂર્વક ભાગ લીધો હતો.
કાર્યક્રમની શરૂઆત દોહા અને સમૂહ ગાનથી થઈ, જેણે વાતાવરણને હિન્દીમય બનાવી દીધું. વિદ્યાર્થીઓએ અભિનય ગીત, હિન્દીમાં પોતાનો પરિચય અને કાવ્ય ગાન જેવી વિવિધ રજૂઆતો કરી સૌને મંત્રમુગ્ધ કર્યા. ખાસ કરીને ધોરણ ૫ ના વિદ્યાર્થીઓએ હિન્દી દિવસને અનુરૂપ સુંદર ચિત્રો રજૂ કરીને પોતાની કલાનો પરિચય આપ્યો. આ ઉપરાંત, વિદ્યાર્થીઓએ હિન્દી ગિનતીનું સચોટ પઠન કરીને ભાષા પરની તેમની પકડ બતાવી.
આ પ્રસંગે શિક્ષક કાનજીભાઈ ગઢવીએ હિન્દી દિવસ શા માટે ઉજવવામાં આવે છે અને આપણી રાષ્ટ્રભાષાનું શું મહત્વ છે તે વિશે વિસ્તૃત માહિતી આપી. તેમના વક્તવ્યથી વિદ્યાર્થીઓમાં હિન્દી ભાષા પ્રત્યેની રુચિ વધુ વધી. કાર્યક્રમના અંતે, શાળાના આચાર્યા શ્રીમતી મંજુબેન ચાવડા દ્વારા આભારવિધિ કરવામાં આવી. સમગ્ર કાર્યક્રમનું સફળતાપૂર્વક સંચાલન કાનજીભાઈ ગઢવી દ્વારા કરવામાં આવ્યું હતું.
આ ભવ્ય કાર્યક્રમને સફળ બનાવવા માટે ઉત્થાન સહાયક શિક્ષિકા જયશ્રીબેન ગઢવી, શાળાના તમામ શિક્ષકો અને વિદ્યાર્થીઓએ ખૂબ જ જહેમત ઉઠાવી હતી. આ પ્રકારના કાર્યક્રમોથી વિદ્યાર્થીઓમાં સાંસ્કૃતિક અને ભાષાકીય જ્ઞાન વધુ મજબૂત થાય છે.
(વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો : પુજા ઠક્કર, 9426244508, ptindia112@gmail.com)
