અમદાવાદ જિલ્લામાં રસ્તાઓના સમારકામની કામગીરી યુદ્ધના ધોરણે શરૂ, નવ તાલુકામાં ડામર પેચ વર્ક પૂરજોશમાં
રિપોર્ટર
હિતેન્દ્ર ગોસાઈ
અમદાવાદ
અમદાવાદ: ચોમાસાના વિરામ બાદ અમદાવાદ જિલ્લામાં રસ્તાઓની સમારકામ કામગીરી માર્ગ અને મકાન પંચાયત વિભાગ દ્વારા યુદ્ધના ધોરણે હાથ ધરાઈ છે. વરસાદને કારણે મોટા પાયે ક્ષતિ પામેલા માર્ગો પર તાત્કાલિક ડામર પેચ વર્ક શરૂ કરવામાં આવ્યું છે, જેથી નાગરિકો માટે વાહનવ્યવહાર સુરક્ષિત અને સરળ બની રહે.
હાલમાં ધોળકા, દસક્રોઇ, સાણંદ, બાવળા, વિરમગામ, માંડલ, દેત્રોજ, ધંધુકા અને ધોલેરા તાલુકામાં હોટ મિક્સ, રોલર અને પેવર દ્વારા પેચ વર્કનું કામ પૂરજોશમાં ચાલી રહ્યું છે. ખાસ કરીને ઓડકી એપ્રોચ રોડ, કોકતા-નદીયાણા-જોષીપુરા રોડ, લિયા-કરકથલ રોડ, માંડલ-દાલોદ (ODR), કમોડ-પીરાણા (ODR) અને પીરાણા-નાઝ-જેતલપુર (MDR) જેવા મુખ્ય માર્ગો પર સમારકામ થઈ રહ્યું છે. આ માર્ગો પર મુસાફરોની સલામતીને ધ્યાનમાં રાખીને ક્ષતિગ્રસ્ત વિસ્તારોમાં તાત્કાલિક મરામત કરવામાં આવી રહી છે.
ધંધુકા વિધાનસભા મતવિસ્તારના ધોલેરા-રાહતળાવ રોડનું કામ પણ ઝડપી ગતિએ પ્રગતિમાં છે. આ ઉપરાંત, છેલ્લા સાત વર્ષથી રી-સરફેસિંગ ન થયેલા માર્ગોના નવીનીકરણનું કામ પણ શરૂ કરવામાં આવ્યું છે. વિભાગના અધિકારીઓ જણાવે છે કે આ કામગીરીનો હેતુ માત્ર પેચ વર્ક પૂરતો જ નહીં, પરંતુ રસ્તાઓની ગુણવત્તા અને ટકાઉપણું બંનેમાં સુધારો કરવાનો છે.
જિલ્લા પંચાયત અધિકારીઓએ જણાવ્યું કે ચોમાસા બાદ રસ્તાઓની ખરાબ હાલતને કારણે નાગરિકોને ભારે મુશ્કેલીનો સામનો કરવો પડતો હતો. ખાસ કરીને ગ્રામ્ય વિસ્તારોમાં વાહનવ્યવહાર મુશ્કેલ બની ગયો હતો. હવે આ કાર્ય પૂર્ણ થતાં લોકોના રોજિંદા પ્રવાસમાં સરળતા આવશે અને કૃષિ ઉત્પાદનોનું પરિવહન પણ વધુ ઝડપથી થઈ શકશે.
આ પહેલને સ્થાનિક નાગરિકો તરફથી વખાણ મળી રહ્યા છે. લોકોનું માનવું છે કે સમયસર હાથ ધરાયેલી આ કામગીરીથી માર્ગ સલામતીમાં સુધારો થશે અને જિલ્લામાં વિકાસના ગતિચક્રને વધુ ગતિ મળશે.
