ઝઘડિયાના ભાલોદ ગામે એક મકાનમાં આગ, સર્વસ્વ ગુમાવનાર પરિવારની વ્હારે આવ્યા ધારાસભ્ય
.
ભરૂચ જિલ્લાના ઝઘડિયા તાલુકાના ભાલોદ ગામે આગની એક દુઃખદ ઘટના સામે આવી છે, જેમાં અરવિંદ ભાઈ માછીના પરિવારનું રહેણાંક મકાન આગની લપેટમાં આવી ગયું હતું. આ ભયાનક આગમાં ઘરમાં રહેલો તમામ કિંમતી સામાન અને ઘરવખરી બળીને ખાખ થઈ ગઈ, જેના કારણે આ પરિવાર નિરાધાર બની ગયો હતો.
પરંતુ, સંકટના આ સમયમાં ઝઘડિયા વિધાનસભાના ધારાસભ્ય રિતેશ વસાવા અસરગ્રસ્ત પરિવારના પડખે ઊભા રહ્યા અને માનવતાનું ઉત્તમ ઉદાહરણ પૂરું પાડ્યું.ઝઘડિયા તાલુકાના ભાલોદ ગામે બનેલી આ ઘટનામાં, અરવિંદ ભાઈ માછીના મકાનમાં અચાનક આગ લાગી હતી. આગ એટલી વિકરાળ હતી કે તેઓ પોતાનો કોઈ સામાન બચાવી શક્યા નહોતા. પરિવાર માટે જીવનનિર્વાહનું એકમાત્ર સાધન એવી તમામ ઘરવખરી અને જરૂરી ચીજવસ્તુઓ બળી જતાં પરિવાર પર આભ તૂટી પડ્યું હતું.
ઘટના બન્યા બાદ આજ રોજ ધારાસભ્ય રિતેશ વસાવા ભાલોદ ગામે દોડી આવ્યા હતા. તેમણે અસરગ્રસ્ત અરવિંદ ભાઈ માછી અને તેમના પરિવારની મુલાકાત લીધી અને તેમની સાથે વાતચીત કરી, આશ્વાસન આપ્યું.ધારાસભ્યએ માત્ર આશ્વાસન આપીને સંતોષ ન માન્યો, પરંતુ પરિવારને ફરીથી બેઠો કરવાના હેતુથી તેમણે સ્થળ પર જ અસરગ્રસ્ત અરવિંદભાઈ માછીના પરિવારને તાત્કાલિક આર્થિક સહાય કરી મદદ પૂરી પાડી હતી. ધારાસભ્યના આ હૂંફાળા અને સંવેદનશીલ પગલાથી પીડિત પરિવારે તેમનો આભાર વ્યક્ત કર્યો હતો.ધારાસભ્ય રિતેશ વસાવાએ ખાતરી આપી હતી કે તેઓ સરકાર તરફથી મળવાપાત્ર તમામ સહાય પણ પરિવારને વહેલી તકે મળે તે માટે પ્રયત્નો કરશે.ધારાસભ્ય રિતેશ વસાવાની આ ત્વરિત અને સંવેદનશીલ મદદ ખરેખર પ્રશંસનીય છે અને અન્ય લોકો માટે પણ પ્રેરણારૂપ છે.
ઈરફાન ખત્રી
રાજપારડી
