GUJARAT KUTCH MUNDRA

🇮🇳 સરદાર પટેલની ૧૫૦મી જન્મજયંતી નિમિત્તે મુંદરા આર. ડી. આર્ટ્સ એન્ડ કોમર્સ કોલેજ દ્વારા ‘યુનિટી માર્ચ’નું સફળ સમાપન

રાષ્ટ્રીય એકતાનો સંદેશ ફેલાવતી ભવ્ય પદયાત્રા

POOJA THACKERNovember 20, 2025Last Updated: November 20, 2025

7 1 minute read

રિપોર્ટ : પુજા ઠક્કર, મુંદરા – કચ્છ.

🇮🇳 સરદાર પટેલની ૧૫૦મી જન્મજયંતી નિમિત્તે મુંદરા આર. ડી. આર્ટ્સ એન્ડ કોમર્સ કોલેજ દ્વારા ‘યુનિટી માર્ચ’નું સફળ સમાપન

રાષ્ટ્રીય એકતાનો સંદેશ ફેલાવતી ભવ્ય પદયાત્રા

ભારતના લોખંડી પુરુષ અને રાષ્ટ્રીય એકીકરણના શિલ્પી સરદાર વલ્લભભાઈ પટેલની ૧૫૦મી જન્મજયંતીની ભવ્ય ઉજવણીના ભાગરૂપે આજે તારીખ ૨૦ નવેમ્બર ૨૦૨૫ના રોજ મુંદરા આર. ડી. આર્ટ્સ એન્ડ કોમર્સ કોલેજ દ્વારા “યુનિટી માર્ચ” (એકતા યાત્રા) પદયાત્રાનું સફળતાપૂર્વક આયોજન કરવામાં આવ્યું હતું. આ કાર્યક્રમનો મૂળભૂત હેતુ વિદ્યાર્થીઓ અને સામાન્ય જનતામાં રાષ્ટ્રીય એકતા અને અખંડિતતાનો સંદેશ પ્રબળ રીતે ફેલાવવાનો હતો જે સરદાર સાહેબના જીવનનો મુખ્ય મંત્ર હતો.

સવારે નિર્ધારિત સમયે કોલેજ કેમ્પસ ખાતે આચાર્યશ્રી, અધ્યાપકગણ અને મોટી સંખ્યામાં ઉત્સાહી વિદ્યાર્થીઓ એકત્ર થયા હતા. પદયાત્રાના પ્રારંભ પૂર્વે કોલેજના પ્રિન્સિપાલ ડો. દીપકભાઈ ખરાડીએ સરદાર પટેલના રાષ્ટ્ર નિર્માણ અને દેશી રજવાડાઓના એકીકરણમાં આપેલા અમૂલ્ય યોગદાનને યાદ કરી યુવાનોને તેમના આદર્શો અને દૂરંદેશીને જીવનમાં અપનાવવા માટે પ્રેરણા આપી હતી.

🚩 ‘યુનિટી માર્ચ’નું સફળ સમાપન

કોલેજ પરિસરથી આરંભ થયેલી આ પદયાત્રા શહેરના મુખ્ય માર્ગો ખાસ કરીને ઉમિયા નગરથી થઈને ભારે ઉત્સાહના માહોલમાં પુનઃ કોલેજ પરિસરમાં પરત ફરી હતી. રસ્તા પર ચાલી રહેલા નાગરિકોએ પણ દેશભક્તિના આ સંદેશને ઉત્સાહભેર વધાવી લીધો હતો જેના કારણે સમગ્ર માહોલ રાષ્ટ્રભાવનાથી તરબોળ બન્યો હતો.

પદયાત્રાના સફળ સમાપન બાદ ડો.ખરાડીએ આ કાર્યક્રમમાં ભાગ લેનાર તમામ વિદ્યાર્થીઓ, અધ્યાપકો અને સહભાગી નાગરિકોનો આભાર વ્યક્ત કર્યો હતો. તેમણે જણાવ્યું હતું કે, “આ યુનિટી માર્ચ માત્ર પગપાળા યાત્રા નહોતી પરંતુ રાષ્ટ્ર માટે સમર્પણ અને સૌને સાથે લઈને ચાલવાની સરદાર સાહેબની ભાવનાને જીવંત રાખવાનો સંકલ્પ હતો. યુવાનોએ આ સંકલ્પને બિરદાવીને પદયાત્રાને સફળ બનાવી તે પ્રશંસનીય છે.”

આર. ડી. આર્ટ્સ એન્ડ કોમર્સ કોલેજે આ ભવ્ય આયોજન દ્વારા સરદાર પટેલની વિરાસતને સન્માનિત કરીને દેશની નવી પેઢીમાં એકતા અને અખંડિતતાનું મૂલ્ય મજબૂત કર્યું છે.