ભારતીય વિદ્યા ભવન ખાતે પારિવારિક કોમેડી નાટક ‘વાતનું વતેસર’નું સફળ મંચન, દર્શકોને હાસ્યથી તરબોળ કર્યું
રિપોર્ટર
હિતેન્દ્ર ગોસાઈ
અમદાવાદ
ભારતીય વિદ્યા ભવન અને ઇન્ફોસિસ ફાઉન્ડેશનના સંયુક્ત ઉપક્રમે આયોજિત કલ્ચરલ આઉટરીચ કાર્યક્રમની શ્રેણી અંતર્ગત ૧૩૩મા કાર્યક્રમ તરીકે પારિવારિક કોમેડી નાટક ‘વાતનું વતેસર’નું સફળ મંચન કરવામાં આવ્યું હતું. આ નાટક ૬ જાન્યુઆરી ૨૦૨૬ના રોજ ભારતીય વિદ્યા ભવન, ભવન્સ કોલેજ, ખાનપુર ખાતે યોજાયું હતું અને તેને દર્શકો તરફથી ઉષ્માભર્યો પ્રતિસાદ પ્રાપ્ત થયો હતો.
નાટકનું લેખન, દિગ્દર્શન અને મુખ્ય ભૂમિકાઓ જીગીશા ત્રિવેદી, હેમંત મિસ્ત્રી અને અર્ચન ત્રિવેદી દ્વારા ભજવવામાં આવી હતી. નાટકની વાર્તા ઘરેલું જીવનમાંથી ઉદ્ભવતી નાની-નાની વાતોને કેન્દ્રમાં રાખી રચાઈ છે, જેમાં પતિ-પત્ની વચ્ચે સામાન્ય મુદ્દે થતી બોલાચાલી ધીમે ધીમે હાસ્યજનક પરાકાષ્ઠા સુધી પહોંચે છે.
વાર્તામાં કલ્પનાશીલ પત્ની નાની વાતને ‘વાતનું વતેસર’ બનાવી દે છે, જેમાં તેને એક સેવાભાવી અને મિત્રભાવ ધરાવતા પાત્ર હેમંતનો સહકાર મળે છે. બંને મળીને ભલા-ભોળા પતિને અજીબોગરીબ અને રમૂજી પરિસ્થિતિઓમાં મૂકી દે છે. આ પરિસ્થિતિઓમાંથી ઉદ્ભવતું હાસ્ય સમગ્ર નાટકને જીવંત બનાવે છે અને દર્શકોને શરૂઆતથી અંત સુધી જોડીને રાખે છે.
નાટકની રજૂઆત દરમિયાન હાસ્યરસ અને લાગણીરસનું સુંદર સંયોજન જોવા મળ્યું હતું. કલાકારોના સ્વાભાવિક સંવાદ, ચહેરા પરના જીવંત હાવભાવ અને અભિવ્યક્તિપૂર્ણ ભાષાએ પાત્રોને વધુ પ્રભાવશાળી બનાવ્યા હતા. દૈનિક જીવનની સત્ય ઘટના સમાન લાગતી પરિસ્થિતિઓને હળવી અને રમૂજી શૈલીમાં રજૂ કરવામાં આવતાં દર્શકો વારંવાર ઠહાકા મારી ઉઠ્યા હતા.
મંચન દરમિયાન સાદી પરંતુ અસરકારક રજૂઆત, યોગ્ય સમયબંધ સંવાદો અને પાત્રોની આપસી સમજણ નાટકની ખાસિયત બની રહી. પારિવારિક મૂલ્યો, સંબંધોની મીઠાશ અને હાસ્યસભર સંદેશ સાથે ‘વાતનું વતેસર’ નાટકે મનોરંજન સાથે સામાજિક સંદેશ પણ સુંદર રીતે પ્રસ્તુત કર્યો હતો.
કાર્યક્રમના અંતે ઉપસ્થિત દર્શકોએ ઉલ્લાસભેર તાળી વગાડી કલાકારોના અભિનયને વધાવ્યો હતો. કલ્ચરલ આઉટરીચ કાર્યક્રમ અંતર્ગત યોજાયેલ આ નાટક શહેરના રંગમંચ પ્રેમીઓ માટે યાદગાર અનુભવ બન્યું હોવાનું ઉપસ્થિતોએ જણાવ્યું હતું.
