શહેરમાં ગેસની લાઇનો, ગામડામાં ચૂલાના રોટલા નો સ્વાદ!
રાજ્યના મોટા શહેરોમાં હાલ LPG ગેસ સિલિન્ડરની અછતનો માહોલ છે. મિડલ ઈસ્ટમાં ચાલી રહેલા તણાવ અને સપ્લાય ચેઇનમાં વિક્ષેપને કારણે ઘરેલુ અને ખાસ કરીને કોમર્શિયલ સિલિન્ડરનો પુરવઠો અસરગ્રસ્ત થયો છે. અમદાવાદ, સુરત સહિતના શહેરોમાં ગેસ એજન્સીઓ બહાર લાંબી કતારો લાગી રહી છે, બુકિંગમાં વિલંબ થઈ રહ્યો છે અને લોકોમાં પેનિક ખરીદીનો ડર પણ જોવા મળી રહ્યો છે. સરકારે કહ્યું છે કે ઘરેલુ વપરાશ માટે પૂરતો સ્ટોક છે અને 25 દિવસનું ગેપ રાખીને બુકિંગ કરવાનું નિયમ લાગુ કર્યું છે જેથી હોર્ડિંગ અટકે, પણ રોજિંદા જીવનમાં આ અસર સ્પષ્ટ દેખાઈ રહી છે.
આ તરફ સાબરકાંઠા જિલ્લાના ઈડર તાલુકાના આદિવાસી ગામડાઓમાં આ બધી ચિંતાઓથી દૂર એક અલગ જ દુનિયા છે. અહીં ઘરોમાં લાકડાના ચૂલા પર જ રસોઈ થાય છે. 60 વર્ષથી વધુ ઉંમરની એક બહેન કહે છે,
“અમને તો ગેસના બોટલાની જરૂર જ નથી. ચૂલા પર બાજરી-મકાઈની રોટલી, શાક-ભાજી બનાવીએ છીએ. આંમાંથી જે સ્વાદ આવે છે એ શહેરના ગેસ-સ્ટવ પર ક્યારેય નથી આવતો. ખાવાનું ફિક્કું લાગે છે!”
ગામમાં લાકડું મેળવવું પણ સરળ છે – માત્ર 100 રૂપિયામાં 20 કિલો મળી જાય છે, અને ઘણી વખત ખેતર કે આસપાસના વૃક્ષોમાંથી મફતમાં જ મળી જાય છે. કોઈ બુકિંગ, કોઈ લાઇન, કોઈ અનિશ્ચિતતા નથી. ગામલોકો કહે છે કે ચૂલા પર બનેલું ભોજન વધુ પૌષ્ટિક અને સ્વાદિષ્ટ હોય છે. આ તો અમારી પરંપરા છે – પૂર્વજોએ પણ આ જ રીતે જીવ્યા છે. મોડર્નાઇઝેશનના નામે ગેસ-ઇલેક્ટ્રિક સ્ટવમાં જોખમ વધ્યું છે, પણ અહીં શાંતિ અને સંતોષ છે.
આ તુલના આપણને વિચારવા મજબૂર કરે છે – શહેરોમાં ગેસની અછત અને લાંબી લાઇનો વચ્ચે ગામડાઓ આત્મનિર્ભરતાનું જીવંત ઉદાહરણ બની રહ્યા છે. જ્યાં ચૂલો સળગે છે ત્યાં જીવન પણ સળગે છે, સ્વાદ અને સુખની સાચી રસોઈ બને છે!
“શહેરનો ગેસ બંધ પણ ગામડાનો ચૂલો ચાલુ છે – અને તેમાં જ સાચું સુખ છે!”
અહેવાલ જયંતિ પરમાર સાબરકાંઠા
